Փաստ ինֆո

Կրեմլը Լեռնային Ղարաբաղում իրավիճակի կապակցությամբ բոլոր կողմերին առավելագույն զսպվածության կոչ է անում։ Նման հայտարարություն է արել ՌԴ նախագահի մամուլի քարտուղար Դմիտրի Պեսկովը՝ լրագրողների հետ զրույցում։

«Այս պահին մենք բոլոր կողմերին, առաջին հերթին, հակամարտության կողմերին կոչ ենք անում առավելագույն զսպվածության, գործերի վարման ռազմական մեթոդներից եւ ցանկացած քայլերից հրաժարվելուն, որոնք կարող են հրահրել իրավիճակի հետագա անցանկալի սրում, որն առանց այդ էլ գտնվում է ըստ էության ռազմական բախման փուլում», - նշել է Պեսկովը:

Պեսկովի խոսքով՝ Ռուսաստանի նախագահ Վլադիմիր Պուտինը անհրաժեշտության դեպքում հեռախոսազրույց կունենա Ադրբեջանի ղեկավարության հետ:

«Անհրաժեշտության դեպքում նրանք (շփումներն Ադրբեջանի ղեկավարության հետ), իհարկե, տեղի կունենան», - ասել է Կրեմլի ներկայացուցիչը՝ պատասխանելով ադրբեջանական կողմի հետ Պուտինի հնարավոր զրույցի մասին հարցին, քանի որ ավելի վաղ՝ կիրակի օրը, ՌԴ նախագահ Վլադիմիր Պուտինը հեռախոսազրույց է ունեցել Հայաստանի վարչապետ Նիկոլ Փաշինյանի հետ:

Միևնույն ժամանակ, Պեսկովը ուշադրություն է հրավիրել այն հանգամանքի վրա, որ «ռազմական գործողությունների վերսկսումից ի վեր Ռուսաստանի արտգործնախարար Սերգեյ Լավրովը մշտական կապի մեջ է մտել իր գործընկերների հետ»:

Հիշեցնենք, որ սեպտեմբերի 27-ի վաղ առավոտյան ղարաբաղա-ադրբեջանական շփման գծի ամբողջ երկայնքով թշնամին վերսկսել է  ռազմական ագրեսիան։ Ընդ որում՝ Ադրբեջանն օգտագործում է ոչ միայն թուրքական զինտեխնիկան, այլ նաեւ արցախցիների դեմ կռվում են թուրքական զորամիավորումները, վարձկանները։

ԱՀ նախագահ Արայիկ Հարությունյանը սեպտեմբերի 27-ի երեկոյան տեղի ունեցած ասուլիսում հայտարարել է, որ Արցախի դեմ կռվում է ոչ թե Ադրբեջանը, այլ Թուրքիան։ «Փաստացիորեն ստեղծվել է մի իրավիճակ, երբ Արցախի ժողովուրդը մարտնչում է թուրք-ադրբեջանական դաշինքի դեմ։ Թուրքիան, որը մեկ դար առաջ բնաջնջել է իր պատմական հայրենիքում ապրող հայ ժողովրդին և մինչ օրս արդարացնում է այդ ոճիրը, ներկայումս հնարավոր բոլոր միջոցներով սատարում է Ադրբեջանին՝ այդ նույն ցեղասպան գործողությունները Հարավային Կովկասում իրականացնելու համար: Թուրք-ադրբեջանական այս ցեղասպան դաշինքը լուրջ սպառնալիք է տարածաշրջանի ժողովուրդների համար»,- սեպտեմբերի 28-ին  հայտարարել է ՀՀ ԱԳՆ-ն՝ նշելով, որ Թուրքիան հավաքագրում է օտարազգի ահաբեկիչ զինյալների և տեղափոխում նրանց  Ադրբեջան։

Արցախում ու Հայաստանում հայտարարվել է ռազմական դրություն ու զորահավաք։

Աղբյուր` Փաստինֆո