Փաստ ինֆո

Այսօր ԱՀ Ազգային ժողովում չկան հին կուսակցություններ։ Այսօր ԱԺ-ում կա մեկ կուսակցություն. դա Արցախի ժողովրդի կուսակցությունն է։ Այս մասին այսօր ճեպազրույցի ժամանակ ասաց ԱՀ ԱԺ նախագահ Արթուր Թովմասյանը։

«Այս պատերազմին խառնվել է նաև Թուրքիան և Ադրբեջան-Թուրքիա տանդեմն է հիմա աշխատում ամբողջ առաջնագծի երկայնքով։ Հավաստիացնում ենք ձեզ, որ արդեն մեր բանակը կասեցրել է թշնամու գրոհը, և մեր բանակն ի վիճակի է այն տեղափոխելու թշնամու տարածք և մարտի ելքը վճռել այնպես, ինչպես եղավ 1992-1994 թթ.-ին ադրբեջանաղարբաղյան առաջին պատերազմի ժամանակ, ինչպես եղավ 2016թ.-ի ապրիլյան պատերազմի ժամանակ, ինչպես եղավ Տավուշի դեպքերի ժամանակ»,-նշեց Արթուր Թովմասյանը։

Վերջինս նշեց, որ սպասում են քաղաքակիրթ աշխարհի կողմից որևէ պետության Արցախի անկախության ճանաչումը. «Խաղաղ բանակցությունների այլընտրանքը պատերազմն է։ Պատերազմի ժամանակ ոչ թե վտանգված է, այլ զրոյական փուլ են տեղափոխվում բանակցությունները։ Եթե պատերազմը երկարեց, ապա ԱՀ ԱԺ-ն գտնում է, որ ՀՀ-ի ԱԺ-ում պետք է քննարկվի Արցախի անկախության ճանաչման հարցը։ Տեսանք, որ ՀՀ վարչապետ Նիկոլ Փաշինյանն ասաց, որ այդ հարցը կքննարկվի, հարցն օրակարգում է։ Ժողովուրդ ո՞նց կարելի է հայ-թուրքական արձանագրությունները երկու տարի պահել ՀՀ-ի ԱԺ-ի օրակարգում, բայց Արցախի ճանաչման հարցը գոնե մեկ տարի չպահել օրակարգում։ Ի՞նչ է տալու դա մեզ։ Եթե ՀՀ ԱԺ-ում այդ հարցը քննարկվեց, դա զսպաշապիկ կլինի Ադրբեջանի Հանրապետությանը, որ պատերազմը շարունակելու դեպքում ընդամենը մնում է քվեարկել։ Բայց Արցախի անկախության ճանաչման հարցը չպետք է դառնա քաղաքական թեմա։ Պետք է բոլոր 132 պատգամավորներով մտնի օրակարգ, պետք է ՀՀ ԱԺ-ում ներկայացված երեք քաղաքական ուժերը միասին մտնեն»,-նշեց Արթուր Թովմասյանը։

Աղբյուր` Փաստինֆո