Փաստ ինֆո

Հավաքական անվտանգության պայմանագրի կազմակերպության (ՀԱՊԿ) գլխավոր քարտուղար Ստանիսլավ Զասը կոչ է անում Հայաստանին եւ Ադրբեջանին ձեռնպահ մնալ սադրիչ գործողություններից: Այս մասին ՏԱՍՍ-ին հայտնել Է ՀԱՊԿ մամուլի քարտուղար Վլադիմիր Զայնետդինովը։ Նույն աղբյուրի փոխանցմամբ՝ գլխավոր քարտուղարը անհրաժեշտ է համարել  անհապաղ վերականգնել հրադադարի ռեժիմը և վերադառնալ ԵԱՀԿ Մինսկի խմբի շրջանակներում ընթացող բանակցային գործընթացին: Այս մասին հայտարարությունը տեղադրված է ՀԱՊԿ-ի պաշտոնական կայքում:

ՀԱՊԿ գլխավոր քարտուղար Ստանիսլավ Զասը լուրջ անհանգստություն և մտահոգություն է հայտնում ս.թ. սեպտեմբերի 27-ին Լեռնային Ղարաբաղում զինված հակամարտության վերսկսման կապակցությամբ, որի ընթացքում երկու կողմից կան զոհեր և վիրավորներ, այդ թվում ՝ խաղաղ բնակչության շրջանում: Խախտվել է հրադադարի ռեժիմը, կիրառվում է ծանր սպառազինություն, այդ թվում՝ հրետանի, տանկեր և ավիացիա, ինչպես նաև հարվածային անօդաչու թռչող սարքեր։

Ստեղծված իրավիճակը չի նպաստում 1994 թ. հրադադարի մասին համաձայնագրի և Լեռնային Ղարաբաղի հակամարտության խաղաղ կարգավորման շրջանակներում ուժ չկիրառելու փոխադարձ պարտավորությունների կատարմանը: Անհրաժեշտ է անհապաղ վերականգնել հրադադարի ռեժիմը և վերադառնալ բանակցային գործընթացին, որը վարում են ԵԱՀԿ Մինսկի խմբի համանախագահները։ Լեռնային Ղարաբաղի հակամարտության լուծումը հնարավոր է միայն քաղաքական-դիվանագիտական մեթոդներով։

Հավաքական անվտանգության խորհուրդը, ՀԱՊԿ արտգործնախարարների խորհուրդը իրենց հայտարարություններում բազմիցս կոչ են արել կողմերին հասնել հակամարտության իրավիճակների կարգավորմանը բացառապես խաղաղ ճանապարհով եւ ձեռնպահ մնալ սադրիչ գործողություններից՝ լարվածության էսկալացիան թույլ չտալու նպատակով:

Հիշեցնենք, որ սեպտեմբերի 27-ի վաղ առավոտյան ղարաբաղա-ադրբեջանական շփման գծի ամբողջ երկայնքով թշնամին վերսկսել է  ռազմական ագրեսիան։ Ընդ որում՝ Ադրբեջանն օգտագործում է ոչ միայն թուրքական զինտեխնիկան, այլ նաեւ արցախցիների դեմ կռվում են թուրքական զորամիավորումները, վարձկանները:

ԱՀ նախագահ Արայիկ Հարությունյանը հայտարարել է, որ Արցախի դեմ կռվում է ոչ թե Ադրբեջանը, այլ Թուրքիան։ «Փաստացիորեն ստեղծվել է մի իրավիճակ, երբ Արցախի ժողովուրդը մարտնչում է թուրք-ադրբեջանական դաշինքի դեմ։ Թուրքիան, որը մեկ դար առաջ բնաջնջել է իր պատմական հայրենիքում ապրող հայ ժողովրդին և մինչ օրս արդարացնում է այդ ոճիրը, ներկայումս հնարավոր բոլոր միջոցներով սատարում է Ադրբեջանին՝ այդ նույն ցեղասպան գործողությունները Հարավային Կովկասում իրականացնելու համար: Թուրք-ադրբեջանական այս ցեղասպան դաշինքը լուրջ սպառնալիք է տարածաշրջանի ժողովուրդների համար»,- այսօր հայտարարել է ՀՀ ԱԳՆ-ն՝ նշելով, որ Թուրքիան հավաքագրում է օտարազգի ահաբեկիչ զինյալների և տեղափոխում նրանց  Ադրբեջան։

Արցախում ու Հայաստանում հայտարարվել է ռազմական դրություն ու զորահավաք։

Աղբյուր` Փաստինֆո