Փաստ ինֆո

«Ով հայ ժողովուրդ, քո միակ փրկությունը քո հավաքական ուժի մեջ է։ Այս տողերը ասելու շատ առիթներ եմ ունեցել, բայց հիմա թերևս ամենաարդիական պահն է, որովհետև մենք ելել ենք պայքարի արժեքների արժեքի՝ հայրենիքի պաշտպանության համար և, ինչպես տեսնում ենք, հույսներս մեզ վրա պետք է դնենք, - ասում է դերասան, «Սև հովազներ» ջոկատի ազատամարտիկ Արտաշես Ալեքսանյանը «Փաստինֆո»-ի հետ զրույցում վերլուծելով նախօրեից Արցախի հետ շփման գծի ողջ երկայնքով ադրբեջանաթուրքական ռազմական ագրեսիան։

Ա.Ալեքսանյանը նշեց, որ իրենց ջոկատը եւս այս օրերին արդեն կորուստներ է ունեցել։ «Ցավով պետք է ասեմ, մեր ջոկատն էլ արդեն մարդկային կորուստներ ունի, ինչի համար ես ցավակցում եմ մեր հերոս տղաների ընտանիքներին, մեր տղաներն իրենց կյանքը չխնայեցին ու դրեցին մեր հայրենիքի, օդ ու ջրի պաշտպանության գործին»,- ասաց նա։

Անդրադառնալով ռազմական ագրեսիայի ընթացքում թուրքական կողմի ներգրավվածությանը՝ Արտաշես Ալեքսանյանը նկատում է՝ ի տարբերություն նախորդ անգամների, այս անգամ Թուրքիան թաքուն չի մտել ռազմական գործողությունների մեջ, այդ մասին թուրքական կողմը նախիջևանյան զորավարժություններից ի վեր բարձրաձայնում է.«Նրանք բարձրաձայն հայտարարում էին, որ պատրաստվում են ավարտին հասցնել իրենց պապերի սկսած գործը, որն այլ կերպ ասած, պանթուրքիզմի ծրագիրն է, այնպես որ պատահական չէ, որ հիմա ադրբեջանական կողմից մեր տղաների դեմ կռվի են ելել հատուկ պատրաստություն անցած թուրք ջոկատայինները, բայց մեր բանակն անկոտրում է, հայի ոգին անպարտ է»,- ասում է դերասանը։

Մանրամասները՝ տեսանյութում

Հեղինակ՝ Նվարդ Մանվելյան

Աղբյուր` Փաստինֆո