Փաստ ինֆո

Արցախի նախագահի խոսնակ Վահրամ Պողոսյանը հայտարարել է, որ ադրբեջանական ագրեսիան սպասելի էր եւ 2016 թվականի նման անակնկալ չի եղել։

«Ժամանակահատվածի հետ կապված, այո, մենք սպասում էինք, չենք կարող ասել՝ 2016-ի պես է»,- Արցախում տեղի ունեցած ասուլիսում ասել է Վ.Պողոսյանը։

«Խնդիրն այն է, որ չնայած մենք ոչինչ չէինք կարող բացառել Ադրբեջանի ագրեսիվ քաղաքականության հետ կապված, բայց որ կթիրախավորեին քաղաքացիական բնակավայրերը, այս առումով կանխատեսումներ չկային։ Որոշակի էսկալացիաներ սպասվում էին առաջնագծում, դա ցույց էին տալիս վերլուծությունները Ադրբեջանի կողմից վերջին շրջանում տարվող ակտիվ քարոզչական աշխատանքով»,- ասաց Պողոսյանը։

Նրա խոսքով՝ ԱՀ նախագահի գլխավորությամբ այս պահին վերահսկվում է իրավիճակը թե՛ տնտեսական առումով, թե՛ քաղաքացիական կյանքում և, թե՛ առաջնագծում։ Պողոսյանը հորդորեց բոլորին, որպեսզի շարունակեն մնալ թաքստոցներում և ամենակարևորը՝ պահպանեն հանգստություն և խուճապի չմատնվեն։

ԱԳՆ տեղեկատվական վարչության պետ Արտակ Ներսիսյանը նշեց, որ այս իրավիճակը ադրբեջանական կողմի՝ նախկինում չստացված գործողությունների հետևանքն է։
«Մենք գնահատում ենք իրավիճակը հետևյալ կերպ՝ Ադրբեջանը 2016 թվականից հետո չկարողանալով տարբեր, այդ թվում նաև շանտաժի միջոցով կորզել միակողմանի զիջումներ հայկական կողմից՝ սկսեց ինտենսիվացնել ռազմատենչ հռետորաբանությունը, որը ուղեկցվում էր բացահայտ սպառնալիքներով և այս իրավիճակը հետևանքն է ադրբեջանական կողմի գործընթացի»։

Աղբյուր` Փաստինֆո