Փաստ ինֆո

«Այն ինչ անում է Ադրբեջանը վաղ առավոտից Արցախի շփման գծի ողջ երկայնքով, պատերազմական հանցագործություն է։ Ադրբեջանի կողմից Արցախի շփման գծի երկայնքով պատերազմական գործողություններ են սանձազերծվել, ինչը հակասում է ինչպես ՄԱԿ-ի կանոնադրության 2-րդ հոդվածի 3-րդ կետի, այնպես էլ Ժնևյան 4-րդ կոնվենցիայի ամենակարևոր դրույթին, որով պայմանավորված՝ հատկապես քաղաքացիական օբյեկտների վրա հարձակումը անթույլատրելի է»,- «Փաստինֆո»-ի հետ զրույցում հայտարարել է ՄԻԵԴ-ում ՀՀ նախկին ներկայացուցիչ, ՀՀ նախկին գլխավոր դատախազ Գեւորգ Կոստանյանը։

Նա ընդգծել է՝ վաղ առավոտից Ադրբեջանի կողմից փաստացիորեն պատերազմական հանցագործություն է իրագործվում, որը Ադրբեջանի Հանրապետության համար վստահաբար և անկասկած ունենալու է և՛ քաղաքական, և՛ քաղաքակա-իրավական հետևանքներ։

Ինչպես արդեն տեղեկացրել ենք`այսօր վաղ առավոտյան, շփման գծի ողջ երկայնքով ադրբեջանական կողմը ակտիվ հրետակոծություն է սկսել՝ թիրախավորելով նաև խաղաղ բնակավայրերը, այդ թվում՝ մայրաքաղաք Ստեփանակերտը: Օդուժի հարվածներին զուգահեռ հակառակորդն անցել է նաեւ ցամաքային գործողությունների։

ՊԲ հրամանատար, գեներալ-մայոր Ջալալ Հարությունյանը հայտարարել է, որ ադրբեջանական զորքերը ժամը 07:10-ին հարձակման են անցել շփման գծի ամբողջ երկարությամբ։

Ադրբեջանական զորքերի՝ մի քանի ուղղությամբ հարձակումները հետ են մղվել՝ պատճառելով զգալի կորուստներ։Հայաստանում ու

Արցախում ռազմական դրություն ու զորահավաք է հայտարարվել։

Ցավոք խաղաղ բնակավայրերի վրա կատարված հրետակոծության հետեւանքով զոհեր ունի նաեւ հայկական կողմը։ Այս պահի դրությամբ հաստատվել է Մարտունու երկու բնակչի՝ տատ ու թոռան մահվան փաստը։

Աղբյուր` Փաստինֆո