Փաստ ինֆո

ՀՀ Ազգային ժողովում գումարվել է հատուկ նիստ, որի ժամանակ ելույթ ունեցավ ՀՀ վարչապետ Նիկոլ Փաշինյանը և արձանագրեց՝ ստեղծված ռազմաքաղաքական իրավիճակում կա նաև Հայաստանի սահմանների վրա հարձակման անմիջական սպառնալիք, կառավարությունը հայտարարել է ռազմական դրություն և ընդհանուր զորահավաք։ 

«Ուզում եմ տեղեկացնել, որ այս պահի դրությամբ իրականացվում է առաջին շարակարգի՝ մասնակի զորահավաք, բայց մենք որոշել ենք, հենց այդպիսի որոշում ընդունենք, որպեսզի այդ իրավիճակին օպերատիվ արձագանքելու հնարավորություն ունենանք ըստ անհրաժեշտության։ Արցախի ՊԲ-ն շփման գծի ողջ երկայնքով ՝ հատկապես հյուսիս-արևելքում և հարավ-արևելքում մղում է մարտեր, իրադրությունը լարված է։ Հասկանում եմ, որ բոլորիս հետաքրքրում է մանրամասներ, ցավոք սրտի ունենք զոհեր ընդ որում, քանի որ ի սկզբանե թիրախավորվել են նաև քաղաքացիական ենթակառուցվածքները, զոհեր ունենք ոչ միայն զինվորականների, այլև քաղաքացիական անձանց շրջանում։ Հարված է հասցվել մայրաքաղաքին, այլ բնակավայրերին և ՊԲ-ն կատարում է իր առջև դրված խնդիրը՝ կանգնեցնելու հարձակումը և ագրեսիան»,- ասաց Նիկոլ Փաշինյանը և տեղեկացրեց, որ այս պահին մենք ֆիքսված իրավիճակ չունենք, իրավիճակը գտնվում է զարգացման մեջ։

«Մեր զինվորականներն ասում են, որ գնահատականը հետևյալն է՝ լարված է, բայց առայժմ ամբողջական գնահատական տալու համար վաղ է։ Տեղի ունեցածի մեջ ռազմավարական առումով անսպասելի որևէ բան չկա, որովհետև ըստ էության, կոնտեքստը այս պատմության հետևյալն է՝ մեր ժողովրդի առաջ խնդիր է դրվել և կդրվի՝ ըստ էության հրաժարվել Արցախի ժողովրդի իրավունքներից, կամ ստանալ պատերազմ։ Այս ողջ ընթացքում Ադրբեջանի դիրքորոշումը, ըստ էության եղել է այսպիսին և բանակցային գործընթացում Ադրբեջանը երկար տարիներ զարգացրել է այս գիծը՝ կամ հրաժարվում ենք ինքնորոշման իրավունքից, կամ ստանում ենք պատերազմ։ Այս կոնտեքստն է, որ մեզ այսօր բերում է այսպիսի կոնֆլիկտի։ Մեզ չպետք է ընկճեն, մենք պետք է ամուր կանգնենք մեր ոտքերի վրա և պաշտպանենք, այս սրբազան հողի վրա ապրելու մեր իրավունքը։

Այսօր ես չեմ եկել ասելու, որպես գերագույն հրամանատար, թե ինչի են պատրաստ մեր զինվորները, մեր գեներալները, այսօր եկել եմ ասելու, թե ինչի եմ պատրաստ ես։ Ես պատրաստ եմ զոհվելու հանուն մեր հայրենիքի, հայ ժողովուրդը ծնկած չի եղել և չի լինի, հայ ժողովուրդը ամուր ողնաշարով, պարզ մտքով պետք է կանգնի այս հողի վրա, և երբ որ ասում ենք մենք բոլորս զինվորներ ենք, ասում ենք մի բան ՝ ծեր թե երիտասարդ, կին, թե տղամարդ, պաշտոնյա թե գործազուրկ, այսօր մենք մի ուղերձ ունենք հղելու իրար ու աշխարհին՝ մենք պատրաստ ենք զոհվելու հանուն մեր հայրենիքի, մենք մեր հայրենիքը ոչ մի մմ չենք զիջի, մենք պիտի հաղթենք, որովհետև պարտվելու տարբերակ չունենք, ՀՀ-ն ու Արցախը պետք է գոյություն ունենան հավիտյան, Արցախը պետք է լինի հզոր, ինքնուրույն՝ ինչպես եղել է»։

Նիկոլ Փաշինյանը վստահեցրեց, որ այսօրվա նիստը միասնության, վճռականության մասին է ասաց, որ պատրաստենք մեզ նվիրումի, հաղթանակի, զոհողության։

Մանրամասները՝ տեսանյութում։

Աղբյուր` Փաստինֆո