Փաստ ինֆո

ԱՀ նախագահ Արայիկ Հարությունյանը Արցախի Հանրապետության Ազգային ժողովում քիչ առաջ հայտարարեց, որ ռազմական դրության պայմաններում ստորագրելու է համատարած զորահավաք։ 

«Արդեն մի քանի օր է Ադրբեջանի ամբողջ քաղաքական էլիտան տարբեր ձևաչափերով աշխարհին նախապատրաստում է պատերազմի։ Տարբեր շեշտադրումները կապված իբր Սիրիայից կամ այլ երկրներից քուրդ կամ այլազգի վարձկաններ կան Արցախում։ Այսինքն նրանք հայտարարում էին՝ իբր մենք անում ենք այն, ինչ իրենք են անում։ Մենք ինֆորմացիա ունենք, որ վերջին մի քանի օրերին իրենք ինքնաթիռներով Թուրքիայից և այլ երկրներից կամավորականներ, վարձկաններ են տեղափոխել Ադրբեջան։ Արդեն երկար ժամանակ է Թուրքիայի բանակը գտնվում է փաստացի Ադրբեջանում զորավարժության անվան տակ, բայց մենք հասկանում ենք՝ նպատակը որն է եղել։ Արդեն մի քանի օր է, համատարած մոբիլիզացիա են սկսել՝ իհարկե ներկայացնելով կեղծ օրակարգ, որ իբր Հայաստանը պատրաստում է պատերազմի։ Մենք միշտ պատրաստվել ենք պատերազմի, բայց պատերազմի կողմնակից չենք։ Աշխարհում ամենաշատը խաղաղություն Արցախում են ուզում և արցախցին է ուզում։ Ցանկացած պատերազմ սկսվելու պատասխանատվություն կրելու է Ադրբեջանի իշխանությունը ոչ միայն այսօր, վաղը և ապագայում։ Ամեն մի զոհի համար պատասխան են տալու»,-ասաց Արայիկ Հարությունյանը։

ԱՀ նախագահը նշեց, որ մենք արդեն ունենք կորուստներ։ Մարտունիում ունենք նաև երեխայի կորուստ. «Մենք չենք ուզել պատերազմ։ Մեզ պարտադրել են պատերազմ։ Չհայտարարած պատերազմ, բայց հայտարարված պատերազմ, քանի որ արդեն ամիսներ շարունակ հայտարարում են։ Մենք կողմնակից ենք խաղաղ բանակցությունների։ Այսօր էլ հայտարարում ենք՝ ուշ չէ, խելքի եկեք։ Այն հումանիտար աղետը, որը սպասում է տարածաշրջանում, ապմբողջ պատասխանատվությունը կրելու է Ալիևը և նրա սերունդները։ Առավոտյան արդեն մի քանի ժամ է լայնածավալ հրթիռակոծություն է, օգտագործում են իրենց ձեռքի տակ եղած ինչ կա չկա։ Ինֆորմացիա ունենք, որ ուղղաթիռներ, ինքնաթիռներ ևս առաջնագծում եղել են։ Ոչ միայն հրթիռակոծել են զինվորական, այլև քաղաքացիական բնակավայրերը։ Ունենք քաղաքացիական շրջանում զոհեր, տասնյակ վիրավորներ։ Ռազմական դրության պայմաններում մի քանի րոպե հետո ստորագրելու եմ համատարած զորահավաք և ամբողջ ազգին կոչ եմ անում համախմբվել Արցախի և Հայաստանի Հանրապետության իշխանությունների շուրջը։ Բոլոր բնագավառներում պայքար սկսել ագրեսոր, մարդասպան Ադրբեջանի իշխանության դեմ, պատերազմ հայտարարել ոչ թե Ստեփանակերտում, առաջնագծում, այլև ամբողջ աշխարհով մեկ։ Պատասխանը ստանալու են, որովհետև մենք արդար ենք, մենք խաղաղություն ենք ուզում, բայց պատրաստ ենք ամբողջ գնով, ազգով, մեր կյանքով պաշտպանել մեր հայրենիքը»,-ասաց ԱՀ նախագահը։

Արայիկ Հարությունյանը կոչով դիմեց մարդկանց՝ խնդրելով սահմանափակել տեղաշարժը, շարժվել միայն անհրաժեշտության դեպքում, որովհետև արդեն ճանապարհներն էլ են վերցրել նշանառության տակ։

«Կենաց մահու պատերազմ է, կենաց մահու պատերազմ ենք տալու բոլորս։ Ազգովի պատերազմ ենք մղելու և ազգովի հաղթելու ենք»,-ընդգծեց Արայիկ Հարությունյանը։

Աղբյուր` Փաստինֆո