Փաստ ինֆո

«Իմ փաստաբանն առավոտյան ժամը 7-ին միջնորդություն է ներկայացրել Գլխավոր դատախազություն և Հատուկ քննչական ծառայություն, որպեսզի իմ նկատմամբ հետախուզումն, առնվազն, վերացվի և ես անմիջապես կարողանամ վերադառնալ Հայաստան։ Հիմա ես արդեն ինքնաթիռի տոմսեր ձեռք բերելու աշխատանքներով եմ զբաղված, որպեսզի հենց այսօր վերադառնամ,- «Փաստինֆո»-ի հետ զրույցում ասել է ՀՀ նախկին դատախազ Գևորգ Կոստանյանը։

Նա նշել է, որ իրեն օդանավակայանից մեկնել թույլ չեն տա, եթե հետախուզումը չդադարեցվի։ «Խնդիրը նրանում է, որ եթե հայկական կողմը չհանի իմ նկատմամբ հայտարարած հետախուզումը, ռուսական սահմանապահները հենց օդանավակայանից ինձ թույլ չեն տա լքել այս երկրի սահմանները, էլ չեմ խոսում Հայաստանի Հանրապետություն մուտք գործելու խնդրի մասին»,- ասաց Գ.Կոստանյանը։

«Փաստինֆո»-ի հարցին՝ ինչո՞վ է պայմանավորված նախկին գլխավոր դատախազի Հայաստան վերադառնալու հապշտապ ցանկությունը՝ Գևորգ Կոստանյանը պատասխանել է՝ միայն և միանշանակ սահմանային դեպքերով.«Անկախ ամեն ինչից մենք երկիրը պաշտպանելու խնդիր ունենք, այդ թվում նաև ֆիզիկապես պաշտպանելու խնդիր, ոչ միայն մեր մասնագիտական կարողություններով, հմտություններով և կապերով, այլ նաև ֆիզիկական մեր ներկայությամբ։ Անկախ ամեն ինչից ես ամեն ինչ անելու եմ նրա համար, որպեսզի ֆիզիկապես կարողանամ շուտափույթ կերպով վերադառնամ Հայաստան և կանգնեմ հայ զինվորների ու Հայոց բանակի կողքին»։

Աղբյուր` Փաստինֆո