Փաստ ինֆո

Ոտքի՛, Հայո՛ց Քաջեր՝ պաշտպանելու Հայոց Սուրբ Հողը: Նման հայտարարությամբ հանդես է եկել «Հայոց  Արծիվներ»  մարտական  ջոկատի հրամանատար,  գնդապետ   Խաչիկ  Ասրյանը:

Հայտարարության մեջ մասնավորապես ասվում է.

«Պատվախնդի՛ր Հայեր

Այսօր առավոտյան մեր Սուրբ Հայրենիքը հերթական անգամ ենթարկվել է թուրք-ադրբեջանական հրոսակների հարձակմանը:  Ինչպես հարյուրամյակներ շարունակ, այնպես էլ հիմա, թուրքական հրոսակների նպատակը մնում է նույնը՝ աշխատասեր ու ստեղծագործ Հայ մարդուն զրկել իր հայրենի հողի վրա ապրելու և արարելու իրավունքից՝ ոչնչացնելով Հայ Ազգը:

Հայոց Ազգային Բանակը հերոսաբար դիմագրավում է թշնամու հարձակումներին՝ պատճառելով անվերականգնելի կորուստներ:

Հայոց Հայրենիքի համար վճռորոշ այս պահին «Հայոց Արծիվներ. Միասնական Հայաստան» կուսակցությունը կոչ է անում մի կողմ դնել բոլոր տեսակի կուսակցական ու քաղաքական տարաձայնությունները և միասնաբար կանգնել Ազգային Բանակի կողքին՝ հանուն Հայոց Սուրբ Հողի, հանուն մեր նախնյաց հիշատակի և գալիք սերունդների՝ իրենց հայրենի հողում ապրելու իրավունքի պաշտպանության:

Հայաստանի իշխանություններին ևս կոչ ենք անում դադարեցնել հասարակությունը պառակտելու, ներազգային թշնամանք հրահրելու քաղաքականությունը և Հայաստանի ու Հայ Ազգի մարդկային և նյութական բոլոր ռեսուրսներն ուղղորդել Հայոց Սուրբ Հայրենիքի պաշտպանությանը:

2016 թվականի ապրիլի 2-ին ձևավորված «Հայոց Արծիվներ» մարտական ջոկատը պատրաստ է Պաշտպանության նախարարի առաջին իսկ հրամանով կանգնել Հայոց Ազգային Բանակի զինվորների և հրամանատարների կողքին ու կատարել իր առջև դրված մարտական գործողությունները:

ՄԵՐ  ՀԱՎԱՏՔՆ  ԱՆՊԱՐՏԵԼԻ՛ է,

ՄԵՐ  ԸՆԹԱՑՔՆ՝  ԱՆԿԱՍԵԼԻ՛,

ՄԵՐ  ՀԱՂԹԱՆԱԿՆ՝  ԱՆԽՈՒՍԱՓԵԼԻ՛:

«ԱՍՏՎԱ՛Ծ,  ՀԱ՛Յ ԱԶԳ,  ՀԱՅԱՍՏԱ՛Ն»»:

Հիշեցնենք, որ այսօր ղարաբաղա-ադրբեջանական շփման գծում թշնամու կողմից վերսկսված ռազմական ագրեսիայի արդյունքում ՀՀ վարչապետ Նիկոլ Փաշինյանը հայտարարել է, որ կառավարության որոշմամբ՝ Հայաստանի Հանրապետության տարածքում ռազմական դրություն կհայտարարվի և ընդհանուր զորահավաք կանցկացվի։

Աղբյուր` Փաստինֆո