Փաստ ինֆո

Բնականաբար ԲՀԿ ղեկավար Գագիկ Ծառուկյանի կալանավորումը քաղաքականություն է, այլ բան չկա և չի կարող լինել այստեղ։ «Փաստինֆո»-ի հետ զրույցում այս մասին ասաց քաղաքագետ Ստեփան Դանիելյանը։

Վերջինս նկատեց՝ Նիկոլ Փաշինյանի վարկանիշն օր -օրի ավելի է ցածրանում, իր քայլերի մեծ մասը մարդկանց համար արդեն անհասկանալի է. «Մարդիկ չեն տեսնում՝ կառավարությունն ինչ որոշումներ է անում, ինչի համար, դեպի ուր է գնում և այդ պոպուլիզմի վերջը չի գալիս։ Բնականաբար այդ ամենը հասկանալով՝ գործող իշխանությունը կամ Նիկոլ Փաշինյանը շատ ծանր է տանում, երբ հանրահավաքներ են լինում, որոնք գնալով ավելի են շատանում։ Ըստ էության արդեն ամբողջ քաղաքական դաշտը Նիկոլ Փաշինյանի դեմ է, բնականաբար նա փորձում է նման եղանակներով ինչ-որ կերպ խոչընդոտել սպասվող հանրահավաքների ալիքը։ Մյուս կողմից ինքն արդեն իրեն վստահ չի զգում «Իմ քայլը» խմբակցությունում, իսկ Հայաստանը խորհրդարանական երկիր է, ինքն էլ նախագահ չէ համապետական ընտրություններով ընտրված, այլ վարչապետ է՝ կախված խորհրդարանի ձայների քանակից։ Այս ամեն ինչն իրեն անհանգստացնում է և փորձում է նման եղանակներով թույլ չտալ, որպեսզի լինեն բողոքի ակտիվ դրսևորումներ։ Նա արդեն թշնամիներ է տեսնում ամեն տեղ, թե՛ ներքին կյանքում, թե՛ արտաքին հարաբերություններում, որտեղ նույնպես ամեն ինչ տապալել է։ Արդեն հոգեվարքի պրոցես է սկսվել»,-նշեց քաղտեխնոլոգը։

Ստեփան Դանիելյանն ընդգծեց՝ «Իմ քայլը» խմբակցությունն ակնհայտորեն քաղաքական միավոր չէ. «Դա ինչ-որ անհասկանալի մարդկանց խումբ է, որոնք, ըստ էության, պարգևավճարների դիմաց կոճակներ են սեղմում, բայց երբ հանրային անվստահությունը մեծանում է Նիկոլ Փաշինյանի նկատմամբ, բնական է այդ մթնոլորտը նաև նրանց վրա է ճնշում գործում»,-ասաց Ստեփան Դանիելյանը՝ հավելելով, որ մի կողմից պատգամավորները հասկանում են, որ այսօր պարգևավճար են ստանում, բայց մյուս կողմից այս ամեն ինչը վերջանալու է և իրենց նույնպես պատասխանատվության առաջ են կանգնեցնելու։ Քաղաքագետը գտնում է, որ դա սկսում է խախտել խմբակցության ամբողջականությունը։

Անդրադառնալով Գագիկ Ծառուկյանի կալանավորմանը հաջորդող հնարավոր բողոքի ալիքին, հաշվի առնելով, որ վերջինս գործարար է և նրա մի շարք ձեռնարկություններ ևս կկրեն այս ազդեցությունը, Ստեփան Դանիելյանն ասաց. «Չեմ կարող ասել՝ ինչպիսին կլինի սրան հաջորդող ալիքը։ Բնականաբար դա տնտեսության վրա ազդում է, ոչ միայն այն հատվածով, որը պատկանում է Ծառուկյանին, այլև մյուս գործարարների մոտ անվստահություն է առաջանում իրենց վաղվա օրվա համար, իսկ տնտեսության զարգացման համար ներդրումներ են պետք անել և այդ մարդիկ արդեն այդ ներդրումները չեն անի՝ հասկանալով, որ դրանք կարող է արդյունք չտան և ավելի արժեքավոր է դառնում կոնկրետ փողը, որ կարելի է պահել վաղվա օրվա համար, այլ ոչ թե ներդնել տնտեսության մեջ։ Բնականաբար այս անվստահության մթնոլորտը գործարարների մոտ նույնպես ազդեցություն է ունենում և չմոռանամ, որ Գագիկ Ծառուկյանը ոչ միայն գործարար է, այլև խորհրդարանական երկրորդ ամենամեծ ֆրակցիայի ղեկավարն է ու սա նույնպես նոնսենս է ցանկացած նորմալ երկրի համար»,-ամփոփեց քաղաքագետը։

Հիշեցնենք, որ երեկ՝ սեպտեմբերի 25-ին, Երևանի ընդհանուր իրավասության դատարանը՝ դատավոր Մնացական Մարտիրոսյանի նախագահությամբ բավարարեց ԲՀԿ ղեկավար Գագիկ Ծառուկյանի նկատմամբ կալանավորումը որպես խափանման միջոց ընտրելու մասին ԱԱԾ քննիչի միջնորդությունը։ Նա կալանավորվել է երկու ամսով։

Աղբյուր` Փաստինֆո