Փաստ ինֆո

Հոկտեմբերի 1-ից ջրամատակարարման գրաֆիկը կփոխվի․ հաղորդում է Վեոլա Ջուր ընկերությունը, որը ներկայացրել է ջրամատակարարման գրաֆիկներն ըստ թաղամասերի և փողոցների։ Երևանում հիմնականում ջուրը մատակարարվելու է առավոտյան 7:00-ից մինչև 24:00-ն։ Գրաֆիկը կգործի մինչև հաջորդ տարվա ապրիլի վերջ։ Նորությունը, սակայն հանրությունը բացասական ընկալեց, մասնավորապես, թե հետ ենք գնում դեպի 90-ականներ, և որ ջուրը այսուհետև ժամով է լինելու։ Ընկերությունից, սակայն զարմանում են՝ ինչո՞ւ է հանրությունը վատ արձագանքում․ Ընկերության հանրային կապերի պատասխանատու Մուրադ Սարգսյանը «Փաստինֆո»-ի հետ զրույցում նշեց, որ նախկինում էլ են հրապարակել նոր գրաֆիկները՝ վերջինը այս տարվա մայիսին, բայց չգիտի ինչո՞ւ, այն ժամանակ նման աղմուկ չբարձրացավ։ Նախորդ և ներկա գրաֆիկներում փոփոխություն շատ չի եղել։

«Որոշ տարածքներում ժամային է գրաֆիկը տարիներ շարունակ։ Ավելի բարելավված կիրականացվի ջրամատակարարումը՝ նախորդ գրաֆիկի համեմատ։ Ամեն բնակավայր իր գրաֆիկն ունի, որոշները նախկինում կանոնավոր ջուր չեն ունեցել։ Այսօր ավելի երկարաժամկետ են ստանալու, քան նախկինում։ Մենք չենք կրճատում ժամերը, մենք ավելացրել ենք դրանք։ Նախկինում ավելի վատ է եղել, սա չի ենթադրում նվազեցում։ Մենք մարզերում լավացնում ենք ջրամատակարարումը։ 2007 թվականին աղետալի վիճակ էր, համակարգը կարգի ենք բերել, պարտավորություն ունենք լավացնելու նրանց ջրամատակարարումը, որոնք քիչ ժամեր են ջուր ստանում»։

Ըստ Սարգսյանի՝ ժամանակի ընթացքում Հայաստանում ջրամատակարարումը հասցրել են գրեթե իննսուն տոկոսի։ Երևանում մատակարարման հիմնական մասը շուրջօրյա է, քիչ տոկոսն է տասնյոթ ժամվա գրաֆիկով։ Սարգսյանն ասում է՝ մտածում են այն տարածքների մասին, որտեղ ջրամատակարարումը չորս ժամվա գրաֆիկով է։

«Տեղեր կան, որ 4 ժամ են ստանում։ Աննորմալ է, որ 17 ժամը դառնա 24, իսկ 4-ը չդառնա 17։ Մենք միտում ենք տեսնում այստեղ, որովհետև տարին երկու անգամ ներկայացնում ենք գրաֆիկ, բայց այս մեկը, որ ավելի լավն է քան մայիսինը, կան ուժեր, որ այս առաջընթացը ձեռք չի տալիս, ուղղորդող բան կա։ Ջրամատակարարման վատթարացում չի կարող լինել, օրենքն արգելում է այնպիսի գրաֆիկ կազմել, որը նախորդի համեմատ ժամերի կրճատում կենթադրի։ Մարդ կլինի, որ բաժակը կիսով չափ դատարկ կտեսնի։ Հարցրեք՝ երեք տարի առաջ այն գյուղերում ոնց էր, ջրի կարոտ էին մնացել։ Մեկը չկա հարցնի՝ քանի՞ բնակավայրում եք խնդիրներ լուծել։ Բաներ կան, որ զգում ենք ուղղորդում են»։

Թե ինչ ուժեր են ուղղորդում մարդկանց՝ բողոքելու ջրամատակարարման գրաֆիկից, Սարգսյանը չպատասխանեց։
«Այսպես մասսայական դժգոհություն, որ այսօր է սկսվել՝ տարօրինակ է։ Մեծ մասը չի էլ նայել գրաֆիկը։ Նորը նախորդի համեմատ ենթադրում է որոշակի առաջընթաց։ Առավել լավ համակարգի համար մեծ գումարներ են պետք ներդնել այս համակարգում, զարգացնել։ Ջրամատակարարման համակարգը թանկ կառույց է, մենք կուզենայինք ջրամբար կառուցել, խողովակ դնել, բայց հարյուրավոր միլիոնների հարց է։ Ամեն փոփոխության հետևում կանգնած է գումար։ Անում ենք դրականը, վիրավորական է, որ մարդիկ սենց բաներ են գրում»,- ասաց Սարգսյանը։

Խոսելով այն մասին, թե ինչու է պարբերաբար ջրանջատումներ են լինում և քաղաքացիները չեն զգուշացվում, Սարգսյանն ասաց, որ իրենք նախապես չեն կարող իմանալ, որ վթար է, դրա համար չեն զգուշացնում քաղաքացիներին։ Մյուս դեպքերում քաղաքացիները զգուշացվում են․

«Ջուրը անջատվում է, մենք գնում միացնում ենք»,- ասաց Սարգսյանը։
Ընկերության հրապարակած հասցեներից մեկում նկատեցինք հետընթաց․ Մասնավորապես, Բաշինջաղյան 6 շենքում նախկինում եղել է շուրջօրյա ջրամատակարարում, իսկ հոկտեմբերի մեկից լինելու է 17 ժամվա գրաֆիկով։

Երևանի Աջափնյակ վարչական շրջանի վեց փողոցների ավելի քան քսան հասցեներում ջրամատակարարումը կլինի առավոտյան 7-ից մինչև կեսգիշեր։ Նախորդ հաշվետվությունում նույն հասցեները նույն ջրամատակարարման գրաֆիկն են ունեցել։

Ավան վարչական շրջանի Ծարավաղբյուր փողոցի չորս հասցեում ջրամատակարարում կլինի 17 ժամ՝ նույնը, ինչ նախկինում։
Արաբկիր վարչական շրջանի յոթանասունից ավելի բնակավայրում ջուրը կլինի 17 ժամով, որոշ հասցեներում 1-4 հարկանի շենքերում ջրամատակարարումը կլինի շուրջօրյա, բարձրահարկում՝ 17- ժամյա։

Դավթաշեն վարչական շրջանում ջուրը կլինի շուրջօրյա, Էրեբունի վարչական շրջանի հիմնական մասում 17 ժամյա գրաֆիկ կլինի՝ նախորդ զեկույցում տվյալները նույնն են։ Կենտրոն վարչական շրջանում ջրամատակարարումը շուրջօրյա է՝ բացառությամբ մի քանի հասցեների։

Մալաթիա Սեբաստիայի մոտավորապես 60 հասցեում շուրջօրյա ջուր չի լինի։ Շենգավիթ Վարչական շրջանի հիմնական հատվածներում ևս շուրջօրյա չի լինի ջրամատակարարումը։

Արագածատնի մարզում միայն Օշականի աջ ափում է, որ կլինի շուրջօրյա ջրամատակարարում, մնացած հատվածներում մինչև վեց ժամյա ջրամատակարարում կլինի։

Արմավիրի Մարզում երկու քաղաքում և երկու գյուղում կլինի շուրջօրյա ջրամատակարարում, մնացած հատվածներում մինչև վեց ժամյա ջրամատակարարում։

Առանձին մարզերում ևս ջրամատակարարումը կլինի և շուրջօրյա, սակայն մեծամասամբ ժամային, ինչպես որ ներկայացրել է ընկերությունը նախկին զեկույցում։

Աղետալի է  առանձին գյուղերի վիճակը, որտեղ ջրամատակարարումը իրականացվելու է միայն 4-5 ժամով՝ սովորաբար առավոտյան ժամերին։ Նման բնակավայրեր կան ՀՀ բոլոր մարզերում։

Աղբյուր` Փաստինֆո