Փաստ ինֆո

Քրեական հեղինակություն համարվող Արթուր Ասատրյանի՝ Դոն Պիպոյի դեմ մահափորձի գործով պաշտպանական կողմը դատական նիստերին չի մասնակցի այնքան ժամանակ մինչև դատավոր Վահե Խալաթյանն ինքնաբացարկ չհայտնի։ Այս մասին «Փաստինֆո»-ի հետ զրույցում ասաց գործով մեղադրյալ Զոհրաբ Ղումաշյանի պաշտպան Վահան Հովհաննիսյանը։

Ավելի վաղ հայտնել ենք, որ մեղադրյալի պաշտպանը հանցագործության մասին հաղորդում է ներկայացրել դատախազություն՝ նախագահող դատավոր Վահե Խալաթյանի գործողությունների դեմ։ Պաշտպանը գտնում է, որ դատավոր Խալաթյանն առերևույթ կատարել է հանրորեն վտանգավոր արարքներ՝ նախատեսված ՀՀ քրեական օրենսգրքի 315-րդ հոդվածի 1-ին մասով (պաշտոնեական անփութություն) և ՀՀ քրեական օրենսգրքի 314-րդ հոդվածի 1-ին մասով (պաշտոնեական կեղծիք)։ Ներկայացված հաղորդումը վերահասցեագրվել է ՀՔԾ ։Դեռևս որոշում չի կայացվել՝ քրեական գործ հարուցելու կամ քրեական գործի հարուցումը մերժելու մասին։

Փաստաբան Վահան Հովհաննիսյանը «Փաստինֆո»-ի հետ զրույցում ասաց, որ նախօրեին կայացած դատական նիստին այդ հիմքով ինքնաբացարկի միջնորդություն են ներկայացրել։ Նրա խոսքով՝ հիմքում դրված էր այն հանգամանքը, որ դատավորը չի կարող դատաքննություն իրականացնել այն գործով, որով կատարված առերևույթ հանցագործության հատկանիշներով իր դեմ հաղորդում է ներկայացված։ Պաշտպանական կողմը միացել էր միջնորդությանը, սակայն դատավորը մերժել է ինքնաբացարկի միջնորդությունը։ Հովհաննիսյանը նշեց, որ դատարանի որոշումից հետո լքել են դատական նիստերի դահլիճը և այլևս հավանաբար չեն մասնակցելու դատական նիստերին այնքան ժամանակ, մինչև դատավորն ինքնաբացարկ չհայտնի։

Նշենք, որ ՀՀ դատական օրենսգիրք սահմանադրական օրենքի 71-րդ հոդվածի համաձայն՝ դատավորը պարտավոր է ինքնաբացարկ հայտնել, եթե նա տեղյակ է այնպիսի հանգամանքների մասին, որոնք անկողմնակալ դիտորդի մոտ կարող են ողջամիտ կասկած հարուցել տվյալ գործով նրա անաչառության մեջ։ Նույն հոդվածի 2-րդ մասով սահմանված է ինքնաբացարկի հիմքերը, որի 1-ին կետով ամրագրված է, որ դատավորը պետք է ինքնաբացարկ հայտնի, եթե դատավորը կանխակալ վերաբերմունք ունի որպես կողմ հանդես եկող անձի, նրա ներկայացուցչի, փաստաբանի, դատավարության այլ մասնակիցների նկատմամբ։ Այս դեպքում՝ դատավորի գործողությունների դեմ հանցագործության մասին հաղորդում է ներկայացված, ինչն օբյեկտիվ դիտորդի մոտ կարող է որոշակի կասկածներ առաջացնել առ այն, որ այս դատարանը չի կարող լինել օբյեկտիվ։

Ավելին՝ պաշտպանական կողմը համոզված է, որ դատավորի նման գործողությունների անմիջական պատճառը գործով տուժողի՝ Դոն Պիպոյի և վերջինիս ընտանիքի անդամների հետ ունեցած մտերիմ հարաբերություններն են։ Ըստ նրա կան ներքին պայմանավորվածություններ, որ հնարավորինս երկար ամբաստանյալները պահվեն արգելանքի տակ։

Հեղինակ՝ Իզաբել Սահակյան

Աղբյուր` Փաստինֆո