Փաստ ինֆո

«Ոչ սեփականություն, ունեմ ոչ փող, «պրինցիպի» համար էլ չեն մուծելու»,- «Փաստինֆո»-ի հետ զրույցում ասաց ՎԱՐԿՍ ԷՅ ԷՄ Լուծարվող ՈւՎԿ»-ի վարկառուն:

Հիշեցնենք, որ դեռևս մարտի 24-ին Կենտրոնական բանկի որոշմամբ ուժը կորցրած ճանաչվեց «Վարկս ԷՅ ԷՄ» վարկային կազմակերպության լիցենզիան: Ստեղծվեց լուծարման հանձնաժողով, որի որոշմամբ զիջվեց ժամկետանց պարտավորություններ ունեցող հաճախորդների տույժ-տուգանքները:Դրանից հետո քաղաքացիներից տարբեր հարթակներում շատ էին դժգոհությունները, որ վճարումը անգամ մեկ օր ուշացնելը ազդում է իրենց վարկային պատմության վրա:

«Վարկս ԷՅ ԷՄ»-ից զանգել ասում էին՝ լավով չես ուզում վատով կստանանք:Հենց իրենց պահվածքի համար էլ՝ փող ունենամ չեմ վճարելու»,- նշեց վարկառուն՝ ասելով, որ ենթարկվել է հոգեբանական ճնշման, հոգնել են ամեն ինչից ուզում են հեռանալ։

«Ես սպասում եմ, որ ճանապարհները բացվի գնամ երկրից»- ասաց քաղաքացին:

Մեկ այլ վարկառու էլ մեզ հետ զրույցում նշեց, որ անելանելի վիճակում է հայտնվել տվյալ կազմակերպության պատճառով, դարձել է անվճարունակ և հայտնվել սև ցուցակում:

«Լուծարումից հետո 360.000 պարտք ունեի, վճարեցի 15%-ը, մնացած գումարը բաժանեցին 5 ամսվա մեջ, երկու ամիս վճարելուց հետո չկարողացա վճարել, հայտնվեցի սև ցուցակում»,- այս մասին մեզ հետ զրուցում ասաց քաղաքացին:

Մեր այն հարցին, թե արդյո՞ք հաջողվել է կապ հաստատել «Վարկս ԷՅ ԷՄ»-ի ղեկավարության հետ, նրանց հետ համաձայնության գալ, վարկառուն նշեց, որ այլևս չեն ցանկանում անգամ որևէ կերպ առնչվել տվյալ կազմակերպության հետ.
«Սկզբում փորձում էինք խոսել, գոնե մեզ զիջեն կամ ժամանակ տան, բայց ոչինչ էլ չստացվեց, հիմա այլեւս ցանկություն չունենք իրենց հետ գործ ունենալ»,- ասաց վարկառուն:

Պետական մարմինների տարիների անտարբերության ու թերացումների հետեւանքով վաշխառուական կազմակերպության զոհ դարձած քաղաքացիներն այսօր եւս չեն կարողանում լուծում գտնել իրենց խնդիրներին։ Իրենց բողոքներով հեղեղել են ՀՀ ԱԺ Մարդու իրավունքների պաշտպանության հանձնաժողովը, որի նախագահ Նաիրա Զոհրաբյանը «Փաստինֆո»-ի թղթակցին հայտնեց, որ գործադիրն ականջալուր չի լինում։

«Երկար ժամանակ է փորձում էինք կապ հաստատել տվյալ վարկային կազմակերպության ղեկավարության հետ, սակայն այդպես էլ չհաջողվեց: Հետո ստեղծվեց լուծարման հանձնաժողով, եւս այլեւս հանձնաժողովն է զբաղվում խնդրով»,- մեզ հետ զրույցում նշեց պատգամավորը՝ ավելացնելով, որ քաղաքացիներից բողոքներ առ այսօր ստանում են։ Մարդու իրավունքների պաշտպանության հանձնաժողովը հանդես է եկել տարբեր նախաձեռնություններով, սակայն կառավարությունը այդպես էլ ականջալուր չի եղել:

Ավելացնենք, որ քաղաքացիների բարձրացրած խնդրի վերաբերյալ փորձեցինք պարզաբանում ստանալ թե Կենտրոնական բանկից, թե վարկային կազմակերպության լուծարման հանձնաժողովից, որտեղից առաջարկեցին տեղեկություն ստանալու համար դիմել էլեկտրոնային փոստի միջոցով, սակայն մինչ այժմ չկա որևէ պատասխան:

Աղբյուր` Փաստինֆո