Փաստ ինֆո

Ես իմ պորտալարը քաղաքական գործունեությունից կտրել եմ և քաղաքական պրոցեսները չեմ մեկնաբանում։ Այս մասին լրագրողների հետ զրույցում ասաց ՍԴ դատավոր Հրայր Թովմասյանը։

Դիտարկմանը, որ հիմա քաղաքական պրոցեսներով է պատճառաբանում իր չմասնակցելը՝Հրայր Թովմասյանն ասաց. «Երբ ընտրում է խորհրդարանը, խորհրդարանական մեծամասնությունը որոշել է, սա բնականաբար քաղաքական պրոցես է և կարող էր լինել քաղաքական որոշում։ Սա մի այլ բան է և իրենց իրավասությունն է հենց այդպես որոշելու։ Երբ որոշում է ՍԴ-ն, բայց դրսից ցանկացած քաղաքականը, ոչ քաղաքականը փորձում է ազդել, սա արդեն այլ պրոցես է։ Ուզում եք ասել, որ ինձ ընտրելը եղել է քաղաքական որոշում, միգուցե։ Ես ոչ կարող եմ հաստատել, ոչ ժխտել, թե իմ քաղաքական գործունեությունն են հաշվի առել, թե մասնագիտական, բայց քաղաքական մեծամասնությունը որոշել է և դա բնական է։ Բոլոր նրանք, ովքեր վերջերս են ընտրվել, դրանից առաջ են ընտրվել խորհրդարանի կողմից, քաղաքական որոշումներ են և դրա մասին ոչ ոք չի թաքցրել։ Այսօրվա քաղաքական մեծամասնությունն է հայտարարել, որ երբ նախորդ անգամ չընտրեց Վաղարշյանին, Հովհաննիսյանին, ասաց՝ քաղաքական որոշում է։ Դա նորմալ է, ես դրա մասին որևէ խոսք չունեմ։ Խոսքն այստեղի մասին է, երբ փոխանցված է արդեն այստեղ և քաղաքական ուժերը փորձում են ազդել, որոշել ՍԴ-ի փոխարեն, սրա մասին է խնդիրը»,-ասաց Հրայր Թովմասյանը։

Հարցին՝ իր պայքարը, ՍԴ-ում որպես նախագահ մնալը և «խրամատ չթողնելը» քաղաքական որոշում չէ՞ր և քաղաքական շրջանակների կողմից ուղղորդված չէ՞ր, Հրայր Թովմասյանն ասաց. «Բացարձակ։ ՍԴ նախագահ ընտրվել էի, որևէ մեկն այդ ընտրությունը չի վիճարկել, կասկածի տակ չի դրել, չկա այլ ակտ և ես շարունակում եմ որպես ՍԴ նախագահ։ Ո՛չ մեր սահմանադրությունը, ո՛չ օրենքը չի նախատեսում ՍԴ նախագահին պաշտոնանկ անելու որևէ ընթացակարգ, բայց հաշվի առնելով, որ ՍԴ նախագահն ի վերջո այս հաստատության դիրեկտորը չէ, ինքն ընդամենը մեկն է բոլորից և չի կարող որոշի՝ ինքն է և վերջ։

Եթե հանենք այդ ներկայացուցչական ազդեցությունը, որ ՍԴ նախագահն ամառանոցում մնալու իրավունք ունի։ Պարոն Թովմասյանը երբեք չի օգտվել դրանից, թիկնազոր երբեք չի ունեցել, իր ծառայողական մեքենայից վերջին անգամ օգտվել է երևի 8 ամիս առաջ։ Այդ ամբողջն իմ դեպքում չի եղել, որ ասեմ ես սրանից եմ կառչած եղել։ Այդ դեպքում, երբ հրաժարական ես տալիս, նշանակում է՝ քաղաքական ազդեցության տակ հրաժարական տվեցիր։ Մի բան, որ չէր կարող լինել։ Ես բոլոր դատավորների ներկայությամբ արդեն մի քանի անգամ ասել եմ, որ երբ կորոշեք՝ ես չեմ, եկեք և ինձ ասեք»,-ասաց Հրայր Թովմասյանը։

Հարցին՝ առաջադրելու՞ է այլ թեկնածու, Հրայր Թովմասյանը նշեց՝ իրավիճակն այնքան արագ է փոխվում, որ այս փուլում չի կարող ասել, թե ինչ կլինի։

Հրայր Թովմասյանն ընդգծեց, որ ՍԴ-ի կողմից ինքնուրույն, առանց արտաքին որևէ ներգործության, ամենավատ թեկնածուի ընտրությունը շատ ավելի լավ է, որովհետև այդ դեպքում խոսվում է, արձանագրվում է ՍԴ-ի ինքնուրույնությունն ու անկախությունը, քան ի սկզբանե նոր կազմով նման էլեմենտների առկայությունը, որը Հրայր Թովմասյանի խոսքով բացասական հետևանքներ կարող է ունենալ, եթե անգամ այդ ճանապարհով ընտրվում է լավագույնը. «Երվանդ Խունդկարյանն իմ նախընտրելի թեկնածուներից մեկն է եղել, բայց դա զրո նշանակություն ունի։ Եթե իմ նախընտրելինն էլ լինի և դրսից ուղղորդված լինի, միևնույն է իմ վարքագիծը սա է լինելու»,-ասաց Հրայր Թովմասյանը։

Աղբյուր` Փաստինֆո