Փաստ ինֆո

Հայաստանում նախորդ տարվա համեմատ միջին ամսական աշխատավարձի թիվն աճել է 4.711 դրամով։ Այս մասին են վկայում պաշտոնական վիճակագրական տվյալները։
Հայաստանում նախորդ տարվա համեմատ միջին ամսական աշխատավարձի թիվն աճել է 4.711 դրամով։ 2019-ին միջին ամսական անվանական աշխատավարձը 187.280 դրամ էր, այս տարի այն ավելացել է՝ հասնելով 191.991 դրամի։ Սրանք Ազգային վիճակագրական ծառայության հրապարակած տվյալներն են։ Հիշեցնենք, որ ՀՀ վարչապետ Նիկոլ Փաշինյանը՝ անդրադառնալով միջին աշխատավարձերի աճին, հայտարարել էր, թե դրանք աճել են ավելի քան 7 տոկոսով։

«Մեկ մարդու միջին աշխատավարձն ավել է 13,841 դրամով կամ 7․14 տոկոսով»,- ասել էր Փաշինյանը։ Այսպիսով` փաստենք, որ Փաշինյանի հրապարակած տվյալները չեն համապատասխանում ԱՎԾ հրապարակած տվյալներին։

2020թ. հուլիսի դրությամբ, ըստ ԱՎԾ-ի, եղել է 632.410 աշխատատեղ, որից 200.671-ը պետական, 431.739-ը՝ ոչ պետական։

Մասնավոր ոլորտում ամենամեծ թվով աշխատատեղն ապահովել է ՝ մեծածախ և մանրածախ առևտրի, ավտոմեքենաների և մոտոցիկլետների նորոգման ոլորտը՝ 110.183, որտեղ միջին աշխատավարձը կազմել է ընդամենը 137.950 ՀՀ դրամ։

Ընդհանրապես աշխատաշուկայում աշխատավարձերի պատկերը խիստ տատանվող է՝ ամենաբարձր վարձատրվող ոլորտը տեղեկատվության և կապի, մասնավորապես՝ տեղեկատվական տեխնոլոգիաներն են՝ 616. 704 դրամ, իսկ ամենացածրը՝ կացության և հանրային սննդի կազմակերպման ոլորտում՝ 86. 856 դրամ։

Եթե այս ոլորտներում աշխատավարձի տատանումն ակնհայտ է, ապա ներկայացնենք նաև գյուղատնտեսություն, անտառային տնտեսություն և ձկնորսություն ոլորտը, որտեղ ամսական միջին անվանական աշխատավարձը 2020-ի հուլիսին 121.995 դրամ է։ Հանքագործական արդյունաբերություն և բացահանքերի շահագործման ոլորտում՝ 449.673 դրամ։

Մշակող արդյունաբերության ոլորտի աշխատակցի միջին աշխատավարձը 162.745 դրամ է, իսկ շինարարության ոլորտում՝ 205.534 դրամ։ Սպասարկման այլ ծառայություններ իրականացնողներինը՝ 118.180 դրամ։

Այսպիսով՝ ամենաբարձր աշխատավարձն ստանում են ՏՏ, հանքարդյունաբերության, ֆինանսական ու ապահովագրության ոլորտում, որոնցից յուրաքանչյուրը համապատասխանաբար ունի՝14.817, 10.864 եւ 21. 667 աշխատատեղ։ Ընդհանուր առմամբ 47.347 աշխատատեղ համեմատաբար ավելի բարձր աշխատավարձ է ստանում, որն աշխատաշուկայի անգամ 10 տոկոսը չի կազմում։

Համեմատության համար արձանագրենք, որ ամենացածր միջին աշխատավարձով ՝ կացության և հանրային սննդի կազմակերպման ոլորտում աշխատում է 25.325 մարդ։

Մշակող արդյունաբերությամբ՝ 78.098, իսկ շինարարությամբ՝ 24.348 մարդ է զբաղվում։ Մեծածախ և մանրածախ առևտրի և ավտոմեքենաների նորոգման ոլորտում՝ 110.183, սպասարկման այլ ծառայությունների ոլորտում՝ 20.869։ Այս ոլորտներում աշխատավարձը տատանվում է 86-205 հազար դրամի շրջանակներում։

632.410 հազար աշխատատեղից 405. 558-ը Երեւանում է, իսկ մնացածը՝ մարզերում։ Ամենաքիչ աշխատատեղը կա Վայոց Ձորում՝ 5. 919, որտեղ նախորդ տարի աշխատել է 6.166-ը։

Նշենք, որ հունվարի մեկի դրությամբ մարզում հաշվառվել է 60.594 մարդ։ 2020-ի աշխատողների թվաքանակի մասին երկրորդ եռամսյակի տեղեկություններով՝ Արագածոտնի մարզում 2020-ին 11.828 մարդ է աշխատում։ Նախորդ տարի նույն ժամանակահատվածում 253 անձ ավելի էր աշխատում այս մարզում։ Լոռիում 26. 408 մարդ է աշխատում հիմա, նախկինում՝ 404-ով ավելի, իսկ Կոտայքում 35 092 մարդ է աշխատում՝ 444-ով պակաս նախորդ տարվանից։

Ըստ ԱՎԾ-ի՝ 2020թ. ապրիլից սկսած՝ COVID-19 համավարակի տնտեսական ազդեցությունը հնարավորինս գնահատելու նպատակով, հաշվարկներում ներառվել են նաև աշխատողներին ամբողջությամբ կամ նրանց մի մասին չվճարվող հարկադիր պարապուրդ ուղարկած կազմակերպությունների տվյալները: Այդ աշխատողների աշխատանքային գործունեությունը չի դադարեցվել, սակայն չեն վարձատրվել: ՀՀ ՊԵԿ տվյալների բազայում հարկադիր պարապուրդի վերաբերյալ փաստական տվյալներ առկա չեն: Այնուհանդերձ, դրանք մոտարկվել են:

Աղբյուր` Փաստինֆո