Փաստ ինֆո

Հագուստ ներկրող քաղաքացիները ևս 7 ամիս կշարունակեն հագուստ մաքսազերծել նույն կերպ, ինչպես նախկինում էին անում։

Հագուստ ներկրողներից Կարինե Գևորգյանը «Փաստինֆո»-ի հետ զրույցում ասաց, որ հանդիպում են ունեցել ՀՀ վարչապետի երկու օգնականների և ՊԵԿ փոխնախագահ Շուշանիկ Ներսիսյանի հետ, որի ժամանակ որոշում է կայացվել՝ շարունակել նույն կերպ հաշվարկել, իսկ 7 ամիս հետո բանակցությունների շնորհիվ կգտնեն խնդրի համապատասխան լուծումը.«Յոթ ամիս ոչինչ չի փոխվելու։ Կարող է ապրանքի տեսականի լինի, որ թանկ լինի չնչին տարբերությամբ, բայց պետք է խումբ կազմենք, քննարկումների գնանք, որ հասկանանք՝ ինչպես հաշվենք, որ անընդհատ չգնանք ու օրերով այնտեղ հաշվենք։ Ցուցակն օրինական կստանանք»,-ասաց Կարինե Գևորգյանը։

Վերջինս նշեց՝ հագուստ ներկրողներից շատերն արդեն գնացել են մաքսազերծելու իրենց ապրանքները. «Ինքս բեռ չունեմ, իմ բեռը դեռ նոր է գալիս, բայց մարդիկ գնացել են մաքսազերծելու իրենց ապրանքները»,-ասաց Կարինե Գևորգյանը՝ նշելով, որ տոնավաճառներում իրենց բնականոն աշխատանքը շարունակվում է. «Հիմա մաքսազերծելու ենք մոտ 3.3-ից 4 դոլարի սահմանում, նայած ինչ տեսակի ապրանք կա»,-նշեց Կարինե Գևորգյանը։

Հիշեցնենք, որ հագուստ ներկրող քաղաքացիները տևական ժամանակ է, ինչ բողոքի ակցիաներ էին իրականացնում։ Նրանք բողոքում էին մաքսազերծման նոր կարգի դեմ, ինչի հետևանքով մաքսազերծման արժեքը մի քանի անգամ պետք է բարձրանար։

Աղբյուր` Փաստինֆո