Փաստ ինֆո

Ցավում եմ՝ Գայանե Աբրահամյանը մանդատը վայր դրեց, բայց կարծում եմ՝ յուրաքանչյուրն իրավունք ունի ինքը որոշելու՝ ինչպես և ինչ տարբերակով է ուզում հետագայում ծառայել իր երկրին։ «Փաստինֆո»-ի հետ զրույցում այս մասին ասաց ԱԺ «Իմ քայլը» խմբակցության պատգամավոր Լուսինե Բադալյանը։ 

Հիշեցնենք, որ այսօր ԱԺ «Իմ քայլը» խմբակցության պատգամավոր Գայանե Աբրահամյանը հայտարարեց՝ մանդատից հրաժարվելու մասին։
Հարցին՝ արդյոք անակնկալ էր Գայանե Աբրահամյանի այս քայլը, պատգամավորն ասաց. «Ինձ համար անակնկալ չէր։ Չգիտեմ՝ խմբակցությունում ընդհանուր առմամբ խոսակցություններ եղել են, թե ոչ, բայց ոչ մի բան անակնալ չէ։ Ամեն դեպքում ես ընդունում եմ մարդկանց այնպիսին, ինչպիսին կան, հարգում եմ իրենց որոշումները, ինչ որոշումներ էլ դրանք լինեն, հետևաբար անակնկալի գալ որևիցե դեպքում պետք չէ»,-ասաց Լուսինե Բադալյանը։

Անդրադառնալով շրջանառվող լուրերին, որ ինքը ևս պատրաստվում է մանդատը վայր դնել, Լուսինե Բադալյանն ասաց. «Չգիտեմ՝ մամուլում ինչից սկսեց շրջանառվել, որ ես պատրաստվում եմ մանդատ դնել։ Ամեն դեպքում ինչ-որ լուրջ, վերջնական որոշում դրա հետ կապված չունեմ, չգիտեմ՝ որտեղից է այդ միտքը շրջանառվել»,-ասաց պատգամավորը։

Հարցին՝ այնուամենայնիվ պատրաստվու՞մ է մանդատը վայր դնել, Լուսինե Բադալյանը պատասխանեց. «Ես չեմ կարող ասել։ Նախկինում էլ չեմ ասել, որ այդպիսի մտադրություն ունեմ։ Դրա համար ասում եմ՝ չեմ հասկանում, թե որտեղից այդ տրամադրությունները թե՛ դրսում, թե՛ փաստորեն խմբակցությունում էլ այդպես են մտածել, որ ես նման հայտարարություն եմ արել։ Ես նման հայտարարություն չեմ արել, իսկ թե ինչ կլինի, հետո կերևա։ Ոչինչ չեմ կարող ասել»,-նշեց Լուսինե Բադալյանը։

Ինչ վերաբերում է տարբեր հարցերի շուրջ խմբակցության ներսում եղած անհամաձայնություններին, Լուսինե Բադալյանը նկատեց՝ բազմիցս խոսել է այդ մասին ու խնդրել, որ մարդիկ դրան նայեն որպես բնականոն գործընթաց, քանի որ չեն կարող բոլորը միևնույն հարցի վերաբերյալ նույն կարծիքն ունենալ. «Բնականաբար պետք է թեժ քննարկումներ լինեն, տարբեր տեսակետներ, բայց այդ ամենն ամփոփվում է վերջնական արդյունքի մեջ, հետևաբար այդ անհամաձայնություններն ապոկալիպտիկ նշանակություն բացարձակ չունեն։ Ոչ մի սարսափելի բան չի կատարվում, եթե օրինակ չափորոշիչների կամ որևէ այլ դեպքում պատգամավորները տարբեր կարծիքներ են ունենում և բանավիճում են իրար հետ»,-նշեց պատգամավորը։

Դիտարկմանը՝ կարող են այդ անհամաձայնությունները պատճառ հանդիսանալ, որ որևէ մեկը, այդ թվում նաև ինքը մանդատը վայր դնի, Լուսինե Բադալյանն ասաց. «Ամեն ինչ հնարավոր է։ Այսպես չեմ կարող ասել՝ հենց այս ամենն ինչ-որ պատճառ կհանդիսանա, թե ոչ, բայց եթե գալիս է ընդհանուր մի կետ, որտեղ ինչ-որ մեկը սկզբունքային անհամաձայնություններ է ունենում որոշումների հետ՝ անկախ նրանից ինքը ճիշտ է, թե սխալ, բայց այնուամենայնիվ հաշտ չի իր ներսում, ապա հնարավոր է՝ այդպիսի հետևանքներ լինեն»,-հավելեց Լուսինե Բադալյանը։

Աղբյուր` Փաստինֆո