Փաստ ինֆո

Գնդեվազի բնակիչների և Ամուլսարի հանքի շահագործման դեմ պայքարող բնապահպան-ակտիվիստներ Գագիկ Գրիգորյանը և Բորիս Խաչատրյանը չեն կալանավորվի։ Երևանի ընդհանուր իրավասության դատարանը՝ դատավոր Արման Հովհաննիսյանի նախագահությամբ, մերժել է Գագիկ Գրիգորյանի նկատմամբ կալանավորումը որպես խափանման միջոց ընտրելու մասին քննիչի միջնորդությունը, իսկ Բորիս Խաչատրյանին կալանավորելու միջնորդությունը քննել է նույն դատարանի դատավոր Դավիթ Հարությունյանը ու մերժել այն։ Գործով երրորդ մեղադրյալի խափանման միջոցի հարցը դեռևս չի քննարկվել։ Այն կքննարկվի այսօր՝ դատավոր Արմինե Մելիքսեթյանի նախագահությամբ։ 

Ավելի վաղ տեղեկացրել ենք, որ սեպտեմբերի 15֊ին ծեծկռտուք է տեղի ունեցել Գնդեվազ համայնքում Ամուլսարի հանքի շահագործմանը կողմնակից բնակիչների և ճանապարհը փակող ցուցարարների միջև։ Դեպքի առթիվ հարուցվել է քրեական գործ՝ խուլիգանության հատկանիշներով, որի շրջանակներում ձերբակալվել էր երեք անձ՝ որպես զենք օգտագործվող առարկայի գործադրմամբ խուլիգանություն կատարելու կասկածանքով։ Ձերբակալման որոշումները դատարանի կողմից ճանաչվել են ոչ իրավաչափ և վերջիններս սեպտեմբերի 23-ին ազատ են արձակվել։ Բնապահպան-ակտիվիստներին մեղադրանք է առաջադրել՝ ՀՀ քրեական օրենսգրքի 258-րդ հոդվածի 4-րդ մասի՝ որպես զենք օգտագործվող առարկայի գործադրմամբ խուլիգանության հատկանիշներով և նրանց նկատմամբ կալանավորումը որպես խափանման միջոց ընտրելու մասին միջնորդություն ներկայացվել դատարան։ Պաշտպան Սասուն Ռաֆաելյանը «Փաստինֆո»-ի հետ զրույցում ասաց, որ իր պաշտպանյալները հրաժարվել են ցուցմունք տալուց և հարցերին պատասխանելուց՝ օգտվելով իրենց դատավարական իրավունքներից, քանի որ գտնում են, որ իրենց նկատմամբ իրականացվում է ապօրինի քրեական հետապնդում։

«Այս պայմաններում, եթե իրենց միջև երկար ժամանակ եղել է ոչ բարիդրացիական հարաբերություններ, միջանձնային ոչ բարենպաստ հարաբերություններ, այս դեպքում արարքը որևէ կերպ խուլիգանություն համարվել չի կարող»,- նշեց պաշտպանը՝ հավելելով, որ գործով հիմնավորված է, որ Ամուլսարի պահապաններին հրավիրել են պարզաբանումներ տալու և, որ Գնդեվազի բնակիչները կեղծ տեղեկություններ են տարածում։ Պաշտպանը հաստատեց, որ վիճաբանության պատճառը եղել է Ամուլսարի հանքի շահագործման հարցը, մասնավորապես, ըստ իր պաշտպանյալների՝ ի սկզբանե՝ 2018թ հունիս ամսին քաղաքական իշխանությունները հայտարարել էին, որ Ամուլսարը չպետք է աշխատի, սակայն առ այսօր դրան հակառակ որևէ բան չեն ասել և, քանի դեռ հավաստիացումներ չեն ներկայացվել առ այն, որ հանքը պետք է շահագործվի, ապա հանքը պետք է չաշխատի։ Ինչ վերաբերում է վարույթն իրականացնող մարմնի կողմից ներկայացված կալանավորման միջնորդություններին, ապա պաշտպանը գտնում է, որ նպատակն ակտիվիստներին հնարավորինս վախեցնելն է՝ նախազգուշացնելով, որ մյուս ակտիվիստները ևս նույն ճակատագրին կարժանանան։ Պաշտպանը նշեց, որ կալանավորման միջնորդության մեջ դրվել է և վարույթն իրականացնող մարմնից խուսափելու, և՛ քննությանը խոչընդոտելու հավանականությունը, և՛ հանրային նոր վտանգավոր արարք կատարելու հավանականությունը։ Պաշտպանը նշեց, որ, թեև դատարանի որոշումը դեռևս չի ստացել, սակայն կարծում է, որ միջնորդությունները մերժվել են կալանավորման հիմքերի բացակայության հիմքերով, միևնույն ժամանակ հույս հայտնեց, որ դատարանը նաև հիմնավոր կասկածի մասով է մերժել միջնորդությունները։ Պաշտպանը նաև հայտնեց, որ քրեական գործի շրջանակներում տուժող ճանաչված անձինք չկան։

Հեղինակ՝ Իզաբել Սահակյան

Աղբյուր` Փաստինֆո