Փաստ ինֆո

«Երևանի մշակույթի և արվեստի պետական քոլեջ»-ում ուսումնական տարին կսկսվի հոկտեմբերի մեկից. COVID-19-ով վարակված 38 աշխատակից կա։ Այս մասին «Փաստինֆո»-ի հետ զրույցում նշեց հաստատության տնօրենի ժամանակավոր պաշտոնակատար Աննա Կիրակոսյանը։

«Դասերը մեր մոտ կսկսվեն ամսի մեկից, քանի որ մեր մոտ կորոնավիրուսի դեպք է գրանցվել, որի արդյունքում ինքնամեկուսացվել է 37 աշխատող։ Դասախոսներից մեկի հետ մի քանի րոպե առաջ խոսեցի, վատ է զգացել թեստավորվել է՝ պատասխանը դրական է։ Չգիտենք որտեղից է՝ հնարավոր է հաստատությունից, հնարավոր է՝ քաղաքային տրանսպորտից»,- ասաց Աննա Կիրակոսյանը։

Քանի որ ուսանողները մինչև այդ էլ հնարավորություն չեն ունեցել քոլեջ հաճախել` այս անգամ էլ կազմակերպչական հարցերի պատճառներով, նրանք չեն շփվել վարակակիր աշխատակիցների հետ։ Իսկ նրանք, ովքեր մուտք են ունեցել ուսումնական հաստատություն, բոլորի մուտքն արգելվել է, ինքնամեկուսացման ցուցում են ստացել վերահսկող համապատասխան բուժհաստատություններից:

Հարցին, թե արդյոք ուսումնական հաստատության դասախոսները չեն թեստավորվել մինչև դասապրոցեսի սկսվելը՝ սեպտեմբերի 22-ը, տնօրենի ԺՊ-ն տեղեկացրեց, որ դպրոցներում են թեստավորվել, քոլեջներում նման գործընթաց չի իրականացվել։

«Երբ որ դասերը կսկսվեն, երևի լինի, համենայնդեպս միջին մասնագիտական հաստատություններում նման բան չի եղել»։

Աննա Կիրակոսյանը վստահեցնում է, որ հոկտեմբերի մեկին պատրաստ կլինեն ուսանողներին ընդունելու։ Կարանտինը կավարտվի մինչև ամսի մեկը։ Ըստ տնօրենի՝ վարակի աղբյուրը դասախոսական կազմից չի եղել։

«Պահակն է վարակակիր եղել, իր հետ ովքեր, որ շփում են ունեցել, բոլորը ինքնամեկուսացվել են։ Առաջին օրը, երբ նա զանգահարել է, ասել է, որ թեստավորվել է, պարզվել է, որ քովիդ է։ Որևէ մեկը չի կարող ասել որտեղից է վարակը։ Ջերմաչափվել է մեզ մոտ, նորմալ է եղել, գնացել է տուն, վատթարացում է եղել, երեկոյան արդեն իմացել ենք, որ առողջական խնդիր ունի, անմիջապես հաջորդ օրը համապատասխան կառույցների ենք դիմել, ուղղորդել են հիվանդությունների վերահսկման և կանխարգելման ազգային կենտրոն, որտեղից ցուցակ են ուզել այն անձանց, ովքեր որ ներս ու դուրս են արել, շփում են ունեցել՝ որպես կոնտակտավոր։ Ես էլ եմ շենքում եղել, բայց որպես կոնտակտավոր չեմ եղել, որովհետև հետևի մուտքից եմ ներս եկել, ջերմաչափվել, ոչ ոքի հետ չեմ առնչվել»,- ասաց Աննա Կիրակոսյանը։

Բաց թողնված ամիսները ուսանողները լրացուցիչ դասաժամերով լրացնելու են, բայց ոչ ձմռանը։

«Այս երեք ամիսների ընթացքում դասերը կլրացվեն։ Դասերի տևողությունը սահմանվում է 30-45 րոպե, բայցի այդ երկրորդ հերթի հնարավորություն ունենք, այդ տարբերակով լրացնելու ենք»,- ասաց Կիրակոսյանը, հավելեց, որ դասացուցակները պատրաստ են։ Երկու քոլեջների միավորումից ոչ մի աշխատակից, որոնցից որևէ մեկը անգործ չի մնացել։

Հիշեցնենք, որ Երևանի Մշակույթի և Ջազ քոլեջների միավորումով ստեղծվել էր մեկ ընդհանուր՝ «Երևանի մշակույթի և արվեստի պետական քոլեջ»։ Միավորման պատճառով որոշակի պրոցեսներ կային, որոնք չէին հասցրել իրականացնել՝ պետական ռեգիստրում նոր ՊՈԱԿ-ը չէր հաստատվել։ Խնդիր էր առաջացել նաև դասաբաշխման, դասացուցակների կազմման հետ կապված, որի պատճառով դասերը պետք է սկսվեին սեպտեմբերի 22-ից։

Աղբյուր` Փաստինֆո