Փաստ ինֆո

Նիկոլ Փաշինյանը շատ ուժեղ կանխատեսումներ է անում, ուժեղ բաժակ է նայում։ Կանխատեսումներից ավել բան չեմ տեսել։ Այս մասին լրագրողների հետ զրույցում ասաց կառավարության շենքի դիմաց ակցիա իրականացնող քաղաքացիներից մեկը։

«Բռնելու ենք, տապալելու ենք, փռելու ենք ասֆալտին... հիմա մեր բանուգործն ինչ է, ասում են՝ պանդեմիա։ Առավոտից երեկո մեքենաների փարոսիկները միացրած ասում են՝ սիրելի հայրենակիցներ, կրեք դիմակ և վերջ։ Դիմում եմ ընդդիմադիր կուսակցություններին՝ եթե դուք իսկապես ընդդիմություն եք, ինչու՞ ձեր մանդատները վայր չեք դնում, ինչո՞ւ չեք ասում՝ այս իշխանության հետ չենք կարող աշխատել, արդեն երրորդ տարին է ասում են՝ համբերեք, համբերեք, հղի է, հեսա կունենա, համբերեք, ինչքա՞ն։ Դրա համար նախատեսված է 9 ամիս, դրանից ավել էլ չենք կարողանում ընկալել»,- ասաց բողոքի ակցիա իրականացնող քաղաքացին՝ նշելով, որ օդի հարկն էլ շուտով կվճարի, քանի որ չորս ոստիկան արդեն տուգանել է։

Վերջինս կառավարությունից պահանջում է, որ երկրի ղեկավարն իրավագիտակցություն ձեռք բերի՝ թիմի հետ միասին, ու հասկանա, թե ինչ է անում։

«Խեղել է։ Բոլոր ոլորտներում՝ արդարադատության համակարգ, ՍԴ, վեթինգ ենք անում, շրջապատում ենք»,-ասաց նա։ Հարցին, թե արդյո՞ք այս 2.5 տարիների ընթացքում որևէ լավ բան տեղի չի ունեցել, վերջինս պատասխանեց. «Ասֆալտապատել են։ Ստրկամիտ հասարակությունն ասում է՝ ասֆալտապատել են։ Հոր տնի՞ց է բերել այդ գումարը, որ ասֆալտապատել է։ Թոշակներն է բարձրացրել՝ 3000-4000 դրամ, պարգևավճարներն էլ՝ 8 մլն։ Ամեն ինչ պետք է համեմատության մեջ դիտարկենք»,- ասել է քաղաքացին։

Աղբյուր` Փաստինֆո