Փաստ ինֆո

«Արմավիր» քրեակատարողական հիմնարկի կալանավոր Տիգրան Բադալյանն իր ձայնը փորձում է լսելի դարձնել։ Երեկ նա դիմել էր ծայրահեղ քայլի՝ մեխելով ոտքերը։ Կալանավորը նման ծայրահեղ քայլի առաջին անգամ չէ, որ դիմում է. նախկինում նա ջրադուլ էր հայտարարել, կարել բերանը և շուրջ մեկ ամիս է, ինչ հացադուլ է անում։ Քրեակատարողական ծառայության հանրային կապերի բաժնի պետ Նոնա Նավիկյանը «Փաստինֆո»֊ի հետ զրույցում ասաց, որ «Արմավիր» քրեակատարողական հիմնարկի սոցիալական, հոգեբանական և իրավական աշխատանքների բաժնի կողմից կատարված բացատրական աշխատանքների շնորհիվ հանվել են կալանավոր Տիգրան Բադալյանի ոտքերի մեխերը, որից հետո նա տեղափոխվել է քաղաքացիական հիվանդանոց: «Հետազոտվելով և ստանալով առաջին բուժօգնությունը՝ կալանավորը վերադարձվել է քրեակատարողական հիմնարկ»,-֊նշեց Նավիկյանը։

Տիգրան Բադալյանին մեղադրանք է առաջադրվել ՀՀ քրեական օրենսգրքի 177-րդ հոդվածի 3֊րդ մասի 1.1֊րդ կետով՝ բնակարան ապօրինի մուտք գործելով գողության համար։

Պաշտպան Կառլեն Ավագյանը «Փաստինֆո»֊ի հետ զրույցում ասաց, որ իր պաշտպանյալը նման քայլերի է դիմում իր արդարությունը վերականգնելու համար։

«Այդ ամենը կատարվում է ընդամենն իր անմեղությունն ապացուցելու համար, այլ ոչ թե՝ դատարանի նկատմամբ որևէ ճնշում կամ նմանատիպ այլ գործողություն կատարելու նպատակով»,֊նշեց պաշտպանը՝ հավելելով, որ պարզապես դատարանը չի ցանկանում լսել գործի հանգամանքները։ Բադալյանի նկատմամբ ընտրված խափանման միջոցի փոփոխման վերաբերյալ բազմիցս միջնորդություններ են ներկայացվել դատարան, որոնք, պաշտպանի պնդմամբ, ենթակա էին բավարարման՝ հաշվի առնելով երկրում կորոնավիրուսի համավարակով պայմանավորված իրավիճակը և գործի հանգամանքները, սակայն, պաշտպանի խոսքով, դատարանն անդրդվելի էր, ինչը ստիպել է իր պաշտպանյալին գալ այն եզրահանգման, որ դատարանն արդեն որոշում է կայացրել՝ իրեն դատապարտելու։

Ավագյանը նշեց, որ Տիգրան Բադալյանը կարծում է, որ իր նկատմամբ հաշվեհարդար են ցանկանում տեսնել, քանի որ նման հանգամանքներ կան՝ կապված ոստիկանության Արտաշատի բաժանմունքի ծառայողների հետ։

«Այսինքն՝ այս պատմությունը կախված է ոչ միայն այս գործով տեղի ունեցող հանգամանքներից, այլ՝ հին արմատներ ունի։ Այսպես ասած՝ ոստիկանության բաժինը փորձել է ցանկացած գնով Բադալյանին մեկուսացնել հասարակությունից և իր նպատակին կարելի է ասել, որ հասել է, որովհետև ամբողջ գործը, որովհետև ամբողջ գործը ենթադրություններ հիման վրա է իրականացվում, մինչև օրս որևէ ապացույց չի ներկայացվել քրեական գործով»,֊նշեց փաստաբանը։

Ըստ մեղադրական եզրակացության համառոտ բնութագրի՝ Բադալյանն ուրիշի գույքի գաղտնի հափշտակելու դիտավորությամբ 2019թ. հոկտեմբերի 5-ին' ժամը 09:30-ից մինչև ժամը 23:30-ն ընկած ժամանակահատվածում, տեխնիկական միջոցների գործադրմամբ բացել է Արարատի մարզի Վերին Արտաշատ գյուղի Կոմիտասի փողոցի 11 հասցեի բնակիչ Համլետ Քաջիկի Լալայանի' նույն հասցեում գտնվող բնակարանի պատուհանը և ապօրինի մուտք գործելով բնակարան' այնտեղից գողացել է զգալի չափերով' 10.000 ՀՀ դրամ գումար, իսկ բաց դռնից մուտք գործելով նույն բնակարանի նկուղ, այնտեղից գողացել է սառնարանի համար նախատեսված, 115.000 ՀՀ դրամ ընդհանուր արժողությամբ թվով 5 այլումինե թիթեղներ, որոնք նույն օրը' երեկոյան, 15.000 ՀՀ դրամով վաճառել է համագյուղացի Կամո Մարտիրոսյանին:

Անդրադառնալով մեղադրանքին՝ պաշտպանը նշեց, որ Տիգրան Բադալյանի գյուղում մարդիկ զբաղվում են նաև մրգի արտահանմամբ և այդ թիթեղները սառնարանների համար նախատեսված ատրիբուտ է։

«Գյուղերում շատ են հանդիպում դեպքեր, երբ կարող ես քայլել և գտնել դեն շպրտված իր։ Նույնն էլ տեղի է ունեցել իմ պաշտպանյալի հետ։ Վերջինս մտածել է, որ ինչ-որ մեկը չի ցանկանում օգտագործել և դեն է նետել այդ ամենը, վերցրել և հանձնել է հենց նույն գյուղում գտնվող մետաղի ընդունման կետ»,֊ասաց փաստաբանը՝ հավելելով, որ անտրամաբանական կլիներ, եթե իր պաշտպանյալը գողացված ապրանքը հանձնի հենց նույն գյուղում գործող մետաղի ընդունման կետում։

Նա նշեց, որ, երբ ի հայտ է եկել, որ թիթեղները գտնվում են մետաղի ընդունման կետի աշխատակցի մոտ, Բադալյանը և տուժողները հանդիպել են, զրուցել, Բադալյանը հայտնել է, որ թիթեղները գտել է, իսկ տուժողն էլ նշել է, որ որևէ պահանջ չունի նրանից, բայց կդիմի ոստիկանություն, իսկ ոստիկանությունը զուտ ենթադրությունների հիման վրա է որոշել առաջ քաշել գողության վարկածը։ Կառլեն Ավագյանի խոսքով՝ թյուրիմացության մեջ մտնելով գործի քննությունն այդպես էլ շարունակվել է և այժմ չեն կարողանում արդարացնող դատավճիռ կամ մեղադրանքից հրաժարվելու մասին որոշում կայացնել։

«Եթե մեր քրեական արդարադատությունը քաղաքական որևէ մոտիվներ չեն տեսնում, բոլորն արդեն դառնում են երկրորդական, երրորդական և մարդիկ փորձում են իրենց իսկ արած սխալները կոծկել՝ մինչև վերջ տանելով, մոտավոր ճանաչելով։ Որևէ հետաքրքրություն չկա հասարակ մարդու իրավունքներ»,֊ասաց փաստաբանը։

Նշենք, որ քրեական գործի քննությունն արդեն ավարտական՝ դատական վեճերի փուլում է գտնվում։ Վաղը պաշտպանական կողմը կհրապարակի պաշտպանական ճառը։

Հեղինակ՝ Իզաբել Սահակյան

Աղբյուր` Փաստինֆո