Փաստ ինֆո

Հրայր Թովմասյանը ՍԴ նախագահի ընտրության քվեարկությանը չի մասնակցի։ Այս մասին լրագրողների հետ զրույցում ասաց Հրայր Թովմասյանը։

Նշենք, որ Թովմասյանը ՍԴ նախագահի պաշտոնում առաջադրել էր Աշոտ Խաչատրյանի թեկնածությունը, սակայն Խաչատրյանն ինքնաբացարկ էր հայտնել։ Թովմասյանի մոտ տպավորություն է ստեղծվել, որ կա ուղղորդված գործընթաց։

«Իմ կարծիքով կային այլ թեկնածուներ, որոնք պետք է առաջադրվեին և, երբ այլ թեկնածուներ չառաջադրվեցին, պարոն Խաչատրյանն էլ հանեց, ես ասացի, որ պարոն Խաչատրյանի հետ չեմ զրուցել, չեմ համաձայնեցրել, բայց, եթե հանվում է և մնում է մեկ թեկնածու, նման տպավորություն է ստեղծվել»,- նշեց Թովմասյանը։

Թովմասյանը նաև հայտնեց, որ ինքնառաջադրվելու ցանկություն ի սկզբանե չի ունեցել և իր մոտ տպավորություն էր, որ ավելի շատ հարցադրումն այն էր, թե ով պետք է չլինի ՍԴ նախագահ, որոնցից մեկն ինքն է կամ ևս մեկ դատավոր։ Թովմասյանը չի ցանկանում լինել ՍԴ նախագահ՝ պայմանավորված անձնական, օբյեկտիվ և սուբյեկտիվ տարբեր պատճառներով, իսկ կազմը, Թովմասյանի խոսքով, էական նշանակություն չունի։

Ինչ վերաբերում է Երվանդ Խունդկարյանի մասնագիտական հատկանիշներին, Թովմասյանը չմանրամասնեց՝ նշելով, որ նման հարցերը պետք է քննարկվեն Բարձր դատարանում, սակայն նշեց՝ կարծում է, որ Խունդկարյանը պետք է որ ունենա այդ փորձը, քանի որ պալատի ղեկավարումը և որոշումների կայացումը նման են, իսկ մարդկային հատկանիշների վերաբերյալ ոչինչ չասաց։ Թովմասյանն ընդգծեց, որ Խունդկարյանը սահմանադրական իրավունքի մասնագետ չի և իրենք երբեք այդ առումով քննարկումներ չեն ունեցել։

Ինչ վերաբերում է ՍԴ ճգնաժամին՝ Թովմասյանը նշեց, որ ճգնաժամն իր կարծիքով հետևյալն է՝ կարողանո՞ւմ են որոշումներ ընդունել, թե ոչ և անգամ ամենալարված պայմաններում ունեցել են խնդրանք Կառավարության կողմից՝ այս կամ այն վարկային համաձայնագիրը հնարավորինս արագ քննելու և եղել է, որ նույնիսկ 4-5 օրվա ընթացքում է քննարկվել ամբողջը, այսինքն՝ որևէ ճգնաժամի մասին խոսք լինել չէր կարող։

«Ցավով պետք է արձանագրել, որ չգիտեմ՝ աշխարհի որևէ ՍԴ պրակտիկայում կա՞ նման բան, թե ոչ, որ 3 ամիս ընդհանրապես որևէ որոշում չկայացվի»,- ասաց Թովմասյանը։

«Փաստինֆո»-ն ավելի վաղ հայտնել է, որ շուրջ 3 ամիս ՍԴ-ն նիստեր չի գումարել. Հունիսի 25-ից հետո նշանակված նիստերը չեն կայացել՝ քվորումի բացակայության պատճառով։

Հրայր Թովմասյանն ընդգծեց, որ ցանկացած եղանակով շարունակելու է պայքարել մինչև ՀՀ-ում սահմանադրականության վերականգնումը։
«Չեմ կարող ասել՝ երբ հաջողության կհասնեմ, բայց շարունակելու եմ»,- ասաց Թովմասյանը։

Մանրամասները՝ տեսանյութում։

Աղբյուր` Փաստինֆո