Փաստ ինֆո

Վերջին օրերին հայտնի դարձավ, որ ռուսական «Աէրոֆլոտ» ավիաընկերությունը բարձրացրել է Մոսկվա-Երևան տոմսերի արժեքը։

«Փաստինֆո»-ի հետ զրույցում ավիացիոն փորձագետ Նավիկ Խաչատրյանը նկատեց` եթե մրցակցություն չկա, այսինքն մի կողմից ավիաընկերության բացակայություն կա, ապա մյուս կողմի ավիաընկերությունը չի նայում ոչնչի և գները բարձրացնում է. «Դրան պետք է հանգիստ նայել, որովհետև դրա մեղավորները նախկիններն են, ովքեր 2013 թվականին ընդունեցին բաց երկինքը, որի հետևանքով ռուսական 6-7 ավիաընկերություն անմիջապես հայտարարեցին, որ իրենք ցանկություն ունեն թռչելու Մոսկվայից դեպի Երևան, իսկ 2013թ.-ին միակ գործող Air Armenia ավիաընկերությունը շատ իջեցրեց տոմսերի գները, ինչի հետևանքով Air Armenia-ն սնանկացավ և անմիջապես մեկ տարի հետո ռուսները սկսեցին բարձրացնել այդ ուղղությունների տոմսերի գները։ Սկզբից երկու անգամ, երեք-չորս անգամ, մինչև անցած տարի 4 անգամ բարձր էր։ Այն ժամանակ, երբ Արմավիան, Air Armenia-ն գործում էին, գներն այդպես չէին, ռեալ մրցակից կար, իսկ հիմա չկա։ Ասում են` գայլն առանց շուն գյուղ է մտնում, ոչխարներին հոշոտում է» հիմա այդ վիճակն է»,-ասաց փորձագետը։

Վերջինս ընդգծեց` մեր երկրում ավիացիան բարձիթողի վիճակում է։ Նրա խոսքով ոչ մարդիկ կարողանում են տարբեր ոլորտների զարգացման 50 տարվա ծրագիր, բայց բացարձակ չեն խոսում այդ գործիքակազմերի մասին, թե ինչպես պետք է մինչեւ 2050 թվականն ապահովել 15 մլն տուրիստների այցելություն դեպի Հայաստան, եթե Հայաստանը չունի ազգային փոխադրող. «Երբ այս կողմից ռեալ մրցակից չկա, մյուս կողմն իրեն թույլ է տալիս ամեն ինչ։ ICAO-ի փաստաթղթերի հիման վրա իրավունք ունեն իրենց օդային տարածքը հսկեն, բայց մերոնք չեն հսկում։ Չեն բողոքում Պուտինին, չեն բողոքում ԵԱՏՄ հարթակում, որ ինչպես կարելի է այս գները մնան։ Չէ որ ի վերջո վերջնական շահառուն ուղևորն է կամ ՀՀ քաղաքացին։ Մի անգամ կարելի է նախազգուշացնել, երկրորդ անգամ ուղղակի արգելել այդ ընկերության մուտքը Հայաստան։ Երբ մյուս կողմից մրցակից չկա, «Աէրոֆլոտ»-ն այդպես էլ պետք է աներ»,-ասաց փորձագետը։

Նավիկ Խաչատրյանը գտնում է, որ նախ օրենսդրական բազան պետք է փոփոխվի։ «Ավիացիայի մասին» օրենքը հին է և չի համապատասխանում նորօրյա խնդիրներին։ Փորձագետը նշեց, որ ICAO-ի փաստաթղթերը հիմնականում խորհրդատվական բնույթ են կրում, բայց այն երկրները, որոնք գիտակցում են ավիացիայի կարևորությունը, ընդունել են դա։

«Եթե ճիշտ օրենքը մշակվի, գրվի, ընդունվի, ապա հաջորդ փուլը համաձայն օրենքի կլինի այն կարգավորումները, որն օդային սահմանը պահպանում է և նման դեմպինգներ չի թույլատրվում»,-հավելեց Նավիկ Խաչատրյանը։

«Փաստինֆո»-ն փորձեց կապ հաստատել Քաղավիացիայի կոմիտեի, ինչպես նաև «Աէրոֆլոտ»-ի գրասենյակի հետ, սակայն մեր զանգերին չպատասխանեցին։

Մենք այցելեցինք նաև «Աէրոֆլոտ»-ի մասնաճյուղ, որտեղ բազմամարդ հերթ էր կուտակվել։ Ընդ որում մարդիկ եկել էին ոչ թե տոմս գնելու, այլ տոմսի գների վերաբերյալ տեղեկատվություն ստանալու համար։

Աղբյուր` Փաստինֆո