Փաստ ինֆո

Ամուլսարի հանքավայրի հարակից մի քանի համայնքների բնակիչները քիչ առաջ ԱԺ պատգամավորներին հանձնեցին նամակ, որով կոչ են անում կանգնել համայնքների իրական շահերի կողքին, չզրկել բնակիչներին՝ բարեկեցիկ կյանքից։

«Ընդամենը երկու տարի առաջ մեր համայնքներում բարեկեցիկ ու արժանապատիվ կյանքի հնարավորություն ունեինք։ Մենք ունեինք աշխատանք, Ամուլսարի շնորհիվ ստեղծվում էին նոր բիզնեսներ, իրականացվում էին սոցիալական ծրագրեր։ Ավելի քան երկու տարի է մենք զրկվել ենք Ամուլսարի տված հնարավորություններից, քանի որ մի խումբ մարդիկ որոշել են իրենց դրսևորել որպես «բնապահպան» ու «գիտնական», հանդես գալով համայնքի անունից, որը չեն ներկայացնում »,- նշված է Ամուլսարի հարակից համայնքների բնակիչների ԱԺ պատգամավորներին ուղղված բաց նամակում, որն այսօր մասնակիցները հրապարակեցին ԱԺ շենքի մոտ: 

Գնդեվազի բնակիչները նշում են , որ իրենց համար անհասկանալի է թե՝ ինչու՞ են տարբեր պատգամավորներ աջակցում ապօրինություն իրականացնողներին։

«Չէ՞ որ օրենսդիր մարմնի ներկայացուցիչը պետք է պաշտպանի օրենքը։ Մեր համայնքներում հազարավոր բնակիչներ ապօրինի զրկված են աշխատանքից, ապօրինի փակ են Ամուլսարի ճանապարհները։ Համայնքին աջակցելու փոխարեն, որոշ պատգամավորներ՝ թե' իշխանական, թե' ընդդիմադիր երկու տարի պարբերաբար այցելում են ու քաջալերում ապօրինություն անողներին։ Իսկ քանի՞ անգամ են ԱԺ պատգամավորները այցելել իրենց աշխատանքով իրենց տունը պահելու օրինական իրավունքից զրկված այս համայնքների բնակիչներին» ,- նշեցին Գնդեվազի բնակիչները։

Գնդեվազցիները օրենսդիր մարմնից պահանջում են կատարել օրենքի պահապանի դերը և միայն քաղաքական շահերով առաջնորդվել. «Դուք խաղում եք այս համայնքներում հազարավոր մարդկանց ճակատագրերի, այս տարածաշրջանի ապագայի, երկրի հեղինակության հետ։ Ամուլսարը չունի ոչ մի շոշափելի բնապահպանական խնդիր։ Այն վաղուց դարձել է քաղաքական ու ոմանց համար քաղաքական էժան դիվիդենտների առիթ։ Կոչ ենք անում սթափվել ու կանգնել օրենքի և այս համայնքների իրական շահերի կողքին»,-հավելեցին բնակիչները։

Մանրամասները՝ տեսանյութում

Աղբյուր` Փաստինֆո