Փաստ ինֆո

«Կարծում եմ, մեզ իսկապես քաղաքական թեժ աշուն է սպասվում, որի գագաթնակետը կլինի հոկտեմբերի 8-ի հանրահավաքը: Սա շատ կարևոր գործընթաց է, քանի որ ընդդիմությունը պետք է ցույց տա, որ իշխանությանը կա այլընտրանք»:

Քաղտեխնոլոգը վստահեցրեց՝ ընդդիմությունը պետք է ցույց տա, որ ունակ է պայքարելու՝ թե՛ մարդկային ռեսուրսների առումով, թե՛ ֆինանսական, քանի որ հասարակությունը, որը դժգոհ է իշխանությունից և ցանկանում է հույս դնել այլ քաղաքական ուժի վրա, պետք է վստահ լինի, որ այդ ուժը ունակ է կառավարելու:

Անդրադառնալով ռուսական «Դոսյե» ընկերության հրապարակած փաստաթղթերին՝ Վիգեն Հակոբյանը նշեց, որ սա փոխկապակցված է քաղաքական ուժերի ակտիվության հետ.

«Այդ տեղեկությունը առաջին անգամ չի հրապարակվում, սակայն ոչ մի արձագանք չի եղել, իսկ այս անգամ ԱԱԾ-ն հայտարարում է, որ փաստաթուղթը համարում է հայտարարություն հանցագործության մասին և քրեաիրավական գործընթաց է սկսում:Ես կարծում եմ, որ սա որոշակի կերպով փոխկապակցված է ներկայիս քաղաքական ակտիվության հետ: Չեմ հավատում, որ ներկայիս իշխանությունը, ի դեմս ԱԱԾ-ի, կարող է որոնել ռուսական ծառայությունների գործակալների»:

Քաղտեխնոլոգը հիշեցրեց, որ բազմիցս նմանատիպ տեղեկություններ են ներկայացվել արևմտյան կառույցների շահերը պաշտպանող ներկայացուցիչների մասին, սակայն չի եղել նման արձագանք, սրանք հարցեր են առաջացնելու ոչ միայն երկրի ներսում այլ նաև դրսում:

Անդրադառնալով ԲՀԿ-ՀՅԴ-Հայրենիք քաղաքական եռյակի համագործակցությանը և հոկտեմբերի 8-ի հանրահավաքին՝ քաղտեխնոլոգն ասաց, որ հոկտեմբերի 8-ին հեղափոխություն չի լինելու, սակայն սա որոշակի գործընթացի սկիզբ է.

«Ի հեճուկս պառակտումների՝ մենք տեսնում ենք որ հոկտեմբերի 8-ին այս երեք քաղաքական ուժերը մեծ հանրահավաք են իրականացնելու: Ես կարծում եմ, որ այս ուժերը պետք է ձևավորեն ռեալ և հասարակության համար ընկալելի այլընտրանք: Շատ կարևոր է, որ այս երեք ուժերը չփորձեն փնտրել լիդեր, եթե սկսեն փնտրել լիդեր, ապա վստահ կարող եմ ասել, որ նրանց համագործակցությունը կտապալվի»:

Հարցին՝ թե արդյո՞ք այս քաղաքական ուժերին կհաջողվի համախմբել ժողովրդին իրենց շուրջ, քաղտեխնոլոգը վստահեցրեց, որ եթե քաղաքական ուժերը ցույց տան, որ իրենք ունեն վճռականություն, ինստիտուցիոնալ հիմքեր, ֆինանսական միջոցներ, արտաքին կապեր, ովքեր դժգոհ են գործեղ իշխանությունից և այլընտրանք են փնտրում, կմինան այս երեք ուժերին:

Աղբյուր` Փաստինֆո