Փաստ ինֆո

Հայ կնոջ վերաբերյալ այն գարշելի դիսկուրսը, որով այսօր լցված էր ադրբեջանական տեղեկատվական դաշտը, ամենևին զարմանալի չէր ինձ համար։ Նման գրառմամբ է հանդես եկել Արցախի նախկին ՄԻՊ Ռուբեն Մելիքյանը։

Ինչպես արդեն նշել ենք՝ Ադրբեջանի տեղեկատվական հարթակում այսօր քննարկվում է՝ գերի վերցնելու դեպքում հայ կնոջ, տվյալ պարագայում՝ Աննա Հակոբյանին բռնաբարելու նպատակահարմարության հարցը, եւ որ այդ քննարկումներին մասնակցել է ընդհուպ Իլհամի խորհրդականը։ Անգամ Ադրբեջանի ՊՆ պաշտոնական ֆեյսբուքյան էջն է այդ թեմայով արտահայտվել։ Ասել են. «Ադրբեջանի զինվորին վայել չէ նման բանը»։ «Ակնհայտ է, որ թեման ավելի թեժացնելու համար է այդ «պաշտոնական պատասխանը»,- գրել է ռազմական փորձագետ Կարեն Վրթանեսյանը՝ նշելով, որ պաշտոնական մակարդակով ադրբեջանական կողմից նման լկտիություն չի հիշում։

Արձագանքելով թեմային՝ Արցախի նախկին ՄԻՊ Ռուբեն Մելիքյանը նկատել է, որ իր համար խիստ զարմանալի էր տեսնել այդ ստորությունը զարմանքով ընդունողներին։

«Ուղղակի մոռանում եմ, որ իմ և յուրաքանչյուրիս համոզմունքները հիմնված են մեր կենսական փորձառության վրա, իսկ ինձ բախտ ու պատիվ է վիճակվել աշխատելու Արցախում ու Արցախի համար, ըստ այդմ էլ՝ ավելի լավ պատկերացնել թորքերի «եղած-չեղածը»։ Ու հենց այդ փորձառության հենքի վրա եմ ես իշխանափոխության առաջին իսկ օրից, մեղմ ասած, անհանգստացած։

Որովհետև ես լավ գիտեմ, շատ լավ գիտեմ, թե ինչի են ընդունակ դրանք։ Լավ գիտեմ, որ խորքային մակարդակում ունեն մեր նկատմամբ ցեղասպանական մոտիվացիա, և դա փաստ է։

Ի՞նչ կարող ենք դրան հակադրել։ Միայն ու միայն բարձր արդյունավետություն ունեցող Պետություն։ Իսկ այսօրվա իշխանությունները պարզապես ունակ չեն դա ապահովել - ու դա ինձ պարզ էր առաջին իսկ օրից (թեպետ ապաշնորհության այս մակարդակն ինձ համար իրոք անակնկալ էր): Ինչու՞։ Որովհետ ողջ գիտակցական կյանքում նրանց «ուշքն ու միտքը» իշխանության գալն էր։ Դա՛ էլ լավ գիտեմ։

Օր-օրի հավաքվող մութ ամպերի ֆոնին թիթեռնիկ նկարողները չե՛ն կարող մեզ առաջնորդել այս խառնակ ժամանակներում։ Պարզապես ունակ չեն։ Ու շատ լավ է, որ օր-օրի այս գիտակցումն ավելանում է մեր քաղաքացիների մոտ։ Նույնիսկ սկսում եմ մտածել՝ իշխանությունը վայելողներն էլ են սկսել դա հասկանալ, թեև ամենայն հավանականությամբ՝ ինչքան ուժ ունեն կառչելու են աթոռներից»,- նշել է նա։

Աղբյուր` Փաստինֆո