Փաստ ինֆո

Սեպտեմբերի 18-ին «Շենգավիթ» ԲԿ-ում մահացած 30-ամյա ծննդկանի մահը հնարավոր կլիներ կանխել, եթե բժշկական օգնությունը կատարվեր պատշաճ։ Տուժողի իրավահաջորդի ներկայացուցիչ, փաստաբան Նարեկ Ալոյանը «Փաստինֆո»-ին պատմեց, որ Սեդա Ասատրյանը ԲԿ-ում նախածննդյան հսկողության նպատակով հաշվառվել էր դեռևս 2020թ փետրվարին։

«Բժշկական քարտում հստակ նշված է եղել, որ նա ունի ալերգիա «Ցևտրիաքսոն» դեղամիջոցի նկատմամբ և մինչև ծննդաբերության օրը բժշկական հաստատությունը՝ գլխավորապես բժիշկը, բավականին ժամանակ է ունեցել համապատասխան միջոցներ ձեռնարկելու և ճիշտ դեղամիջոց ընտրելու համար, ինչը չի արվել»,- նշեց Ալոյանը։
Բացի դա՝ տուժող կողմին հետաքրքրում է, թե ինչ չափորոշիչներով է ընտրվել դեղամիջոցը, որը ներարկվել է ծննդկանին, ինչի հետևանքով առաջացել է շոկ, հետագայում՝ մահ։

Ավելի վաղ հայտնել ենք, որ սեպտեմբերի 18-ին «Շենգավիթ» ԲԿ-ում ծննդկան էր մահացել։ Դեպքի առթիվ հարուցվել է քրեական գործ՝ ՀՀ քրեական օրենսգրքի 130-րդ հոդվածի 2-րդ մասի հատկանիշներով, այն է՝ բժշկական օգնություն և սպասարկում իրականացնողների կողմից մասնակգիտական պարտականությունները չկատարելը կամ ոչ պատշաճ կատարելը, որն անզգուշությամբ առաջացրել է բուժվողի մահը։ Քրեական գործով նախաքննությունն իրականացվում է ՀՀ քննչական կոմիտեում։

Փաստաբան Նարեկ Ալոյանը «Փաստինֆո»-ի հետ զրույցում մտահոգություն հայտնեց առ այն, որ դեպքից անմիջապես հետո մի շարք անհետաձգելի գործողություններ չեն կատարվել, ինչի վկայությունն է նաեւ դեպքից հետո ԲԿ-ի ղեկավար անձնակազմի տված հարցազրույցը, որտեղ մասնավորապես, բժշկական կենտրոնի ղեկավարի տեղակալը ի պատասխան լրագրողի հարցի նշել է, որ ոստիկանությունից ոչ ոք չի եկել։

Արդյոք այստեղ միտում կա՝ Ալոյանը չմանրամասնեց՝ նշելով, որ այժմ զերծ կմնա գնահատականներ տալուց և գնահատականները կտրվեն միայն որոշակի փուլում։ Ինչ վերաբերում է բժշկական կենտրոնի մասնագետների, մասնավորապես՝ բժշկի գործողություններին, ապա փաստաբանը կարծում է, որ վերջիններս դրսևորել են անգործություն։

«Արդյո՞ք փետրվար ամսից մինչև սեպտեմբեր ընկած ժամանակահատվածը բավարար չէր դեղամիջոց ընտրելու համար, որը նման ռեակցիա չէր առաջացնի։ Նմուշառումից բացի այլ բազմաթիվ եղանակներ կան դեղամիջոց որոշելու համար, ավելին՝ կինը ժամանակին հակաբիոտիկ դեղորայքային բուժում է ստացել, այսինքն՝ կա հակաբիոտիկ, որից ինքն ալերիգիա չի ունեցել, ընդ որում՝ այդ մասին բժշկին տեղեկացրել է»,- նշեց Ալոյանը՝ հետարքրվելով նաև, թե ինչ չափորոշիչներով է ընտրվել դեղամիջոց աբիցիլինը, որը ներարկվել է։ Փաստաբանը բժիշկների գործողությունները դիտավորություն չի դիտարկում, այլ՝ անփութություն։ Ավելին՝ տուժողի իրավահաջորդի

ներկայացուցիչը միջնորդություն է ներկայացրել վարույթն իրականացնող մարմին՝ բժշկին որպես մեղադրյալ ներգրավելու, ապա՝ մեղադրանք առաջադրելու մասին։

Հարցին, թե ինչու՞ վարույթն իրականացնող մարմինը չպետք է նախաձեռնի անձին որպես մեղադրյալ ներգրավելու գործընթացը՝ փաստաբանը պատասխանեց, որ քննիչն իր գործն է անում, ինքը՝ իր, և գործի հանգամանքներով, իրենց հայտնի տվյալներով պայմանավորված համապատասխան միջնորդություն է ներկայացվել։ Նա նշեց, որ բժշկին որպես մեղադրյալ ներգրավելու միջնորդություն ներկայացվել է տվյալների վերլուծությամբ։

Ինչ վերաբերում է քրեական գործի շրջանակներում կատարվող քննչական, դատավարական գործողություններին, փաստաբանը տեղեկացրեց, որ տուժողի իրավահաջորդները հարցաքննվել են, սակայն նախաքննական գաղտնիքից ելնելով, չմանրամասնեց։ Իսկ թե արդյո՞ք բժշկական կենտրոնի անձնակազմը և բուժող բժիշկը հարցաքննվել են՝ փաստաբանը տեղեկություն չուներ։

Թեև Ալոյանը չմանրամասնեց, թե հարցաքննության ընթացքում ինչ են հայտնել տուժողի իրավահաջորդները, սակայն պարզաբանեց, որ իրենք որևէ մեկի մեղավորության վերաբերյալ պնդումներ չեն անում, միայն նշում են, որ կա կոնկրետ մահ, որը հնարավոր էր կանխել, եթե բժշկական օգնությունը կատարվեր պատշաճ։ Նրա խոսքով՝ պնդում, որ անձամբ բժիշկն է մեղավոր, որպես այդպիսին չի արվում։

Հեղինակ՝ Իզաբել Սահակյան

Աղբյուր` Փաստինֆո