Փաստ ինֆո

«Բարգավաճ Հայաստան», «Հայ հեղափոխական դաշնակցություն» և «Հայրենիք» կուսակցությունների՝ հոկտեմբերի 8-ին համատեղ համապետական հանրահավաք հրավիրելու հայտարարությունը դարձել է քաղաքական դաշտի հիմնական քննարկվող հարցը։ Ինչ սպասել հանրահավաքից. «Փաստինֆո»-ի զրուցակիցն է քաղաքագետ Հրանտ Մելիք-Շահնազարյանը:

- Պարո՛ն Մելիք-Շահնազարյան, ԲՀԿ-ն, ՀՅԴ-ն ու «Հայրենիք» կուսակցությունները հայտարարեցին համատեղ հանրահավաքի մասին՝ նշելով, որ նպատակն է լսելի դարձնել հանրության դժգոհության ձայնը: Ի՞նչ սպասել հանրահավաքից, քաղաքական ուժերին կհաջողվի՞ ձևավորել նոր ընդդիմադիր բևեռ:

 -Հանրահավաքը հանրային և քաղաքական դիրքորոշում հայտնելու միջոց է: Ըստ իս՝ բազմամարդ հանրահավաք է լինելու, քանի որ այսօր հանրային դժգոհության մեծ ալիք կա, բացի դա, հանրահավաք կազմակերպող երեք քաղաքական ուժերն էլ ունեն մեծ թվով կողմնակիցներ: Ակնհայտ է, որ հասարակության շրջանում դժգոհությունները հետզհետե մեծանում են, իսկ այս երեք քաղաքական ուժերը դառնում են այդ դժգոհություններն արտահայտող հարթակներ: Այդ ուժերն արդեն բավական երկար ժամանակ համագործակցում են, բազմիցս ականատես ենք եղել նրանց համատեղ հայտարարություններին: Կարծում եմ՝ այս փուլում նրանց համագործակցությունը ստացված է, չգիտեմ՝ թե որքա՞ն նրանք համատեղ կքայլեն, որքա՞ն երկարաժամկետ է նրանց համագործակցությունը, բայց այժմ քաղաքական ուժերի միջև կա կոնսոլիդացիա: Միայն այս երեք քաղաքական ուժերն են երևում, սակայն նրանց միացել են նաև շատ քաղաքական և հասարակական կազմակերպություններ, կարծում եմ, որ հոկտեմբերի 8-ի հանրահավաքին, բացի այս երեք ուժերից, այլ կազմակերպություններ էլ տեսնենք:

- Գագիկ Ծառուկյանի խոսնակ Իվետա Տոնոյանը հայտարարել է, որ իշխանական քարոզչամեքենան շրջանառության մեջ  է դրել նոր թեզ, որի համաձայն առաջիկա երկու օրերի ընթացքում Գագիկ Ծառուկյանը կկալանավորվի:Սա կարո՞ղ ենք դիտարկել ընդդիմությանը հակազդելու և լռեցնելու միջոց: 

 -Չեմ բացառում, որ իշխանությունները, զգալով հանրային համախմբում այս ուժերի շուրջ, սկսեն քաղաքական հետապնդումներ, ոչ միայն Գագիկ Ծառուկյանի, այլ նաև՝ Արթուր Վանեցյանի և Իշխան Սաղաթելյանի նկատմամբ: Հնարավոր է նաև իշխանությունները, իբրև համավարակով պայմանավորված, սահմանափակեն հանրահավաքների անցկացումը: Ոչ քաղաքական պայքարի միջոցներ այս իշխանությունը շատ ունի, սակայն քաղաքական պայքարում մերկ է:

 - Այսինքն, կարո՞ղ ենք մեկ անգամ ևս ամրագրել՝ ով դեմ է արտահայտվում իշխանությանը, ենթարկվում է քաղաքական և քրեական հետապնդումների:

 -Երկու տարի շարունակ մենք քաղաքական հետապնդումների ականատեսն ենք՝ մեծ և փոքր մասշտաբներով, պարզ օրինակներ՝ «Ադեկվատ» միաբանության ղեկավարը կամ «Վետո» շարժման ղեկավարը, գրեթե ամեն օր նրանք քրեական կամ վարչական գործերով ոստիկանություն են քարշ տալիս: Փաշինյանը որոշել է օգտագործել իրավապահ մարմիններին մարմիններին իր քաղաքական ընդդիմախոսներին լռեցնելու համար, այլ նպատակներ Փաշինյանը չունի:

 - ՀՀԿ փոխնախագահ Արմեն Աշոտյանը հայտարարեց, որ առանց ՀՀԿ-ի բարդ է որևէ քաղաքական գործընթաց իրականացնել: Ի՞նչ եք կարծում այս առիթով:

 -Կարծում եմ դա բնական դիրքորոշում է, բայց  այդքան էլ միանշանակ չէ: Իհարկե, «Հանրապետական կուսակցության» մեջ մեծ պոտենցիալ կա, բայց այնպես չէ, որ առանց նրա որևէ արդյունքի հնարավոր չէ հասնել:«Հանրապետականը»  միշտ պայքարելու է պետության հիմքերը քայքայող այս իշխանության դեմ:

- Պարո՛ն Մելիք- Շահնազարյան, ի՞նչ եք կարծում, ո՞ր դեպքում ընդդիմադիր ուժերին կհաջողվի լուրջ քաղաքական գործընթացներ իրականացնել երկրում: 

 -Համախմբման և նոր, երիտասարդ, բանիմաց կադրերի վրա հիմնվելով: Այս երեք նախապայմաններն անհրաժեշտ են Փաշինյանին իշխանությունից հեռացնելու համար:

Աղբյուր` Փաստինֆո