Փաստ ինֆո

Պաշտպանական կողմին «Մարտի 1»-ի գործի ամբողջ նյութերը տրամադրելու մասին միջնորդությունը դատարանի կողմից մերժվել կարող է միայն այն դեպքում, եթե դատարանը կարող է հստակ ասել, որ մայր գործի նյութերից որևէ մեկն այս գործի համար նշանակություն ունենալ չի կարող։ Այս մասին ՀՀ երկրորդ նախագահ Ռոբերտ Քոչարյանի և մյուսների գործով դատական նիստին ասաց պաշտպան Հայկ Ալումյանը։ 

Բացի դա՝ Ալումյանը գտնում է. որ քննությունն արդարացի չի կարող համարվել, եթե մեղադրող կողմն է որոշում, թե ինչ նյութեր պետք է ուղարկել դատարան և պաշտպանական կողմն ինչ ծավալով պետք է իրազեկված լինի նյութերի բովանդակությանը։ Ինչ վերաբերում է նախաքննության գաղտնիության վերաբերյալ պնդումներին, ապա Ալումյանը նշեց, որ կա նախաքննության շահ և որևէ մեկը դրա դեմ չի վիճում և կա նաև արդար քննության սկզբունք, ստացվում է՝ երկու շահերը բախվում են և այս դեպքում առաջնահերթությունը պետք է տրվի արդար դատաքննության իրավունքին։

Ալումյանի հայտարարությունից հետո մեղադրող դատախազ Գևորգ Բաղդասարյանը խնդրեց դատարանին՝ ապահովել, որ փաստարկները փոխանակելուց հետո՝ հայտարարությունների շրջանակներում նույն հակափաստարկները չկրկնվեն։

Պաշտպան Հովհաննես Խուդոյանն էլ նշեց, որ իրեն հայտնի է՝ նախագահող դատավորի գործողությունների դեմ առարկություններ կամ բողոք ունենալը և կողմերի գործողությունների դեմ բողոքը քրեական դատավարությունում մի փոքր այլ է ընկալվում։

Նրա խոսքով՝ պաշտպանության կողմը իրավունք ունի կասկածի տակ դնել քննիչի, դատախազի գործողությունները։

«Մենք իրավունք ունենք Հրաչյա Մուշեղյանի գործողությունները կասկածի տակ դնել, որովհետև բազմիցս փաստարկվել է այդ գործողությունների ապօրինի լինելը»,- նշեց Խուդոյանը։

Նրա խոսքով՝ չտրամադրված նյութերից որոշակի ծավալ իրենց հասանելի եղել է և, որպեսզի չասեն՝ տվեք 600 հատորը, բացառությամբ 40-րդ հատորի, ասում են՝ ամբողջ նյութերը։

«Ես ցավում եմ ապրում, որ կարող է պնդում կատարվել, որ այդպիսի տվյալներ առկա չեն։ Այստեղ առանց կանոնների մենամարտ չէ, որ ով ինչ եղանակով կարողանում է, փորձում է իրեն առաջ տանել։ Այստեղ դատավարական սկզբունքների պահպանմամբ պետք է փորձել հաջողության հասնել»,- նշեց նա՝ հավելելով, որ դատախազությունը իր համար պիտանի զենքերը ընտրել է, երբ հերթը հասել է մեզ, ասում են՝ դուք այդ սենյակ մուտք գործելու իրավունք չունեք, պաշտպանվեք, ինչպես կարող եք։

Խուդոյանը գտնում է, որ, եթե պաշտպանական կողմից թաքցվում է տեղեկություն, քրեական գործը չի համապատասխանում արդար դատաքննության պահանջներին։ Խուդոյանի խոսքով՝ գործի նյութերում առկա են այնպիսի դրվագներ, որոնք վերաբերում են այլ պաշտոնատար անձանց ։ Բացի դա՝ պաշտպանը նշեց, որ մեղադրական եզրակացության մեջ կատարվել են պնդումներ, որոնք չեն համապատասխանում օբյեկտիվ իրականությանը և չեն համապատասխանում օրինական ուժի մեջ մտած դատական ակտերով հաստատված փաստական հանգամանքներին։

Հիշեցնենք՝ սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։

Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու մեջ, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։

Ինչպես ավելի վաղ հայտնել ենք՝ հունիսի 18-ին Վերաքննիչ քրեական դատարանը՝ նախագահությամբ դատավոր Արսեն Նիկողոսյանի, ՀՀ երկրորդ նախագահ Ռոբերտ Քոչարյանի նկատմամբ խափանման միջոց է կիրառվել գրավը՝ 2 մլրդ ՀՀ դրամի չափով։ Դատարանի դեպոզիտ հաշվին գրավի գումարը փոխանցելուց հետո Ռոբերտ Քոչարյանն ազատ է արձակվել։

Հեղինակ՝ Իզաբել Սահակյան

Աղբյուր` Փաստինֆո