Փաստ ինֆո

Պաշտպանության կողմը զրկված չէ իր պաշտպանական տակտիկան որևէ կերպ կառուցելու հնարավորությունից, բայց մեղադրանքի կողմը որևէ կերպ դրան օժանդակելու պարտականություն չունի։ Այս մասին ՀՀ երկրորդ նախագահ Ռոբերտ Քոչարյանի և մյուսների գործով դատական նիստին ասել է մեղադրող դատախազ Գևորգ Բաղդասարյանը։

«Պաշտպանական կողմի փաստարկների ծայրահեղությունը կայանում էր հատկապես նրանում, որ պաշտպանության կողմի տակտիկան ընտրելու հնարավորությունները փորձում էին կապել մեղադրանքի կողմի հետ։ Իրենք փորձում էին նախաքննության փուլում գտնվող գործերով տեղեկություններ ունենալ՝ իրենց պաշտպանական տակտիկան ճիշտ որոշելու համար »,- նշեց դատախազը։
Նրա մատուցմամբ՝ պաշտպանության կողմը սույն գործով ակնկալում է փոխել դատարանում մեղադրանքի պաշտպանության զենքերն՝ ըստ իրենց հարմարության։

«Պաշտպանության կողմը փորձում է հասցնել նրան, որ մեղադրանքի կողմը մեղադրանքը պաշտպանի իր պատկերացրած հնարավորություններով։ Մենք մեղադրանքը պաշտպանում ենք այս գործի նյութերով, որևէ բան չենք ասում, որին հակադարձելու հնարավորություն պաշտպանության կողմը չի կարող ունենալ»,- ասաց Բաղդասարյանը՝ ընդգծելով, որ մեղադրանքի կողմն է որոշում, թե ինչ ապացույցներով կմտնի քրեաիրավական վեճի մեջ և մեղադրանքի կողմը հենց այս ապացույցներով է մտել քրեաիրավական վեճի մեջ և այս ապացույցներով են դատարանից ակնկալում՝ կայացնել դատական ակտ։ Ըստ նրա՝ պաշտպանության կողմը զրկված չէ նաև դատարանում ապացույցների հետազոտումն ապահովելուց և ցանկության դեպքում կկարողանան դատարանին ներկայացնել որոշակի ապացույցների հետազոտման մասին միջնորդություններ և նման միջնորդություն արդեն իսկ կան ներկայացված։ Բաղդասարյանն ընդգծեց, որ միջնորդությունը հիմնավոր չէ և ենթակա է մերժման։ Մեղադրող դատախազ Պետրոս Պետրոսյանն էլ նշեց, որ փուլային կառուցակարգերով պայմանավորված՝ քրեական գործի նախաքննության ընթացքում գտնվող գործով որևէ դատարանի միջամտությունն անթույլատրելի է և դրանով պայմանավորված չի կարող սահմանվել վարույթն իրականացնող մարմնի պարտականությունը՝ հրապարակային դարձնելու այն քրեական գործի նյութերը, որոնք դեռևս նախաքննության փուլում են։ Ինչ վերաբերում է վկայակոչվող հանգամանքներին, Պետրոսյանը նշեց, որ դրանք վերացականության և հավանականության դաշտից են։

Նրա խոսքով՝ քրեական գործով բոլոր տվյալներն անջատվել և զետեղվել են քրեական գործում և նմանօրինակ հանգամանքների առկայությունը հիմք է տալիս վկայակոչելու, որ դա ընդամենը պաշտպանության կողմից ենթադրություններ են։

«Նրանք ունեն այնպիսի փաստական տվյալներ, որ հնարավորության դեպքում կարող են քննարկման առարկա դարձնել այս դատարանում՝ գործի քննության ընթացքում»,- ասաց Պետրոսյանը՝ ընդգծելով, որ ներկայացված հանգամանքներն ամբողջության մեջ նաև պարունակում են քրեադատավարական օրենքով նախատեսված պահանջի բացակայություն։ Բացի դա՝ Պետրոսյանը գտնում է, որ վկայակոչված չեն այն նորմերը, որոնց վրա դատարանը հղում կատարելով պետք է դատարանին միջնորդություն հարուցեր և ներկայացներ, թե դատարանն ինչ լիազորության գործադրմամբ պետք է նման գործողություններ իրականացնի։ Մասնավորապես, դատարանին ներկայացվող միջնորդությունները պետք է ունենան համապատասխան դատավարական ընթացակարգերի հենք, որոնք տվյալ պարագայում, դատախազի պնդմամբ, բացակայում են և դատարանը նման միջոցներ գործադրելու լիազորություններից զրկված է։
Հիշեցնենք՝ սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։

Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու մեջ, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։

Ինչպես ավելի վաղ հայտնել ենք՝ հունիսի 18-ին Վերաքննիչ քրեական դատարանը՝ նախագահությամբ դատավոր Արսեն Նիկողոսյանի, ՀՀ երկրորդ նախագահ Ռոբերտ Քոչարյանի նկատմամբ խափանման միջոց է կիրառվել գրավը՝ 2 մլրդ ՀՀ դրամի չափով։ Դատարանի դեպոզիտ հաշվին գրավի գումարը փոխանցելուց հետո Ռոբերտ Քոչարյանն ազատ է արձակվել։

Հեղինակ՝ Իզաբել Սահակյան

Աղբյուր` Փաստինֆո