Փաստ ինֆո

Կառավարության ներկայացված «Սոցիալական աջակցության մասին» օրենքում փոփոխություններ կատարելու մասին և կից ներկայացված օրենքների նախագծերի փաթեթով նախատեսվում է սոցիալական ծառայությունների պետական գրասենյակի փոխարեն ստեղծել համալիր սոցիալական ծառայություն, որում կմիավորվեն տարածքային մի շարք գրասենյակների գործառույթներ: 

Ազգային ժողովի արտահերթ նիստում «Բարգավաճ Հայաստան» խմբակցության պատգամավոր Միքայել Մելքումյանը աշխատանքի և սոցիալական հարցերի նախարարի տեղակալ Աննա Ժամկոչյանին դիմելով ասաց՝ պետք է լավ հիմնավորեն, թե միավորմամբ՝ ի՞նչ է փոխվում, սոցիալական ծառայության մատուցման որակը բարձրանո՞ւմ է, թե ոչ:

Աննա Ժամկոչյանը պատասխանեց, որ այս պահին ունեն սոցիալական ապահովման ծառայության 50 տարածքային մարմին, 51 զբաղվածության գործակալության տարածքային կենտրոն և 55 սոցիալական աջակցության տարածքային մարմին

«Միավորելով այս մարմինների տարածքային կենտրոնները մեկ մարմնում՝ 49 տարածքային կենտրոնով արդեն իսկ կարծում եմ կառուցվածքային մեծ բարեփոխում ենք իրականացնում: Այդ բոլոր մարմիններում այս պահին 1825 հաստիք կա՝ ներառյալ նաև նախարարության հաստիքները, և բարեփոխման արդյունքում ունենալու ենք շուրջ 135 հաստիքի կրճատում և մոտավորապես 1130 հաստիքով նոր մարմին: Մնալու է 1690 հաստիք, բայց ներառված են նաև նախարարության և սոցիալական ապահովության ծառայության հաստիքները, իսկ բուն համալիր սոցիալական ծառայության հաստիքակազմը կլինի շուրջ 1130»,-ասաց փոխվարչապետը և հավելեց, որ բարեփոխման արդյունքում աշխատավարձերը կբարձրանան, աշխատակիցները կդառնան քաղաքացիական ծառայողներ։

Աղբյուր` Փաստինֆո