Փաստ ինֆո

«Մի քանի օր առաջ, մինչ մանկապարտեզների վերաբացումը, ինձ զանգահարեցին և ճշտեցին՝ պատրաստվո՞ւմ եմ ես երեխային տանել մանկապարտեզ։ Ասացի, որ ևս մի քանի օր կսպասեմ, ես արձակուրդի մեջ էի և կարող էի ինձ թույլ տալ ևս մի քանի օր երեխային չտանել։ Մանկապարտեզից ինձ տեղեկացրին, որ երեխաների ընդունման ընթացքում առաջնայնությունը տրվելու է պետական համակարգում աշխատող հայր կամ մայր ունեցող երեխաներին։ Ես ինքս էլ պետական համակարգի աշխատող եմ և վստահ էի, որ երեխան առանց որևէ խոչընդոտի կհաճախի մանկապարտեզ, ես էլ արձակուրդս ավարտելուն պես, կանցնեմ աշխատանքի։ Բայց այսօր, երբ ուզում էի երեխային տանել, ինձ տեղեկացրին, որ խմբերն արդեն կազմված են, ամեն խմբում նախատեսվում է ընդունել 12 երեխա, իսկ իմ երեխան, պարզվում է՝ 13-րդ է,- «Փաստինֆո»-ի հետ զրույցում պատմում է Աբովյան քաղաքի բնակչուհի Արևիկը։ Վերջինս այսօր է պարզել, որ երեխան չի կարող հաճախել մանկապարտեզ, որտեղ նա գրանցված է դեռևս 2019 թվականից և մինչ կորոնավիուսային վարակը նորմալ գրաֆիկով հաճախել է։

Արևիկի խոսքերով ասած, անելանելի իրավիճակում է հայտնվել և չգիտի ո՞ւմ խնամքին թողնի մանկահասակ երեխային, այն պարագայում, երբ ինքը պետական համակարգի աշխատող է, ամուսինն էլ շուտով աշխատանքի կանցնի. «Ստացվում է, որ ես վերջին պահին եմ տեղեկացվում այն մասին, որ մանկապարտեզում, ուր հաճախում է երեխաս, լրացել են 12 հոգանոց խմբերը և երեխաս մնացել է այսպես ասած՝ օդում կախված։ Առավոտյան խոսեցի մանկապարտեզի դայակի հետ, ասաց, որ կփորձի հասկանալ՝ արդյո՞ք հարակից խմբերում ազատ տեղ կա, որպեսզի երեխային վերցնեն, բայց մինչ այս պահը ինձ որևէ ինֆորմացիա դեռ չեն տվել։ Եթե այսպես շարունակվի, ես ստիպված կլինեմ նորից արձակուրդ վերցնել, մինչև կհասկանանք, թե ինչպես կլուծվի երեխայի զբաղվածության և խնամքի հարցը, հակառակ պարագայում՝ չգիտեմ ինչ պետք է անեմ, ուղղակի նման իրավիճակի պատրաստ չէի»,- ասում է մանկապարտեզ հաճախող երեխայի ծնողը։

«Փաստինֆո»-ի հարցին՝ ի վիճակի՞ է արդյոք ծնողն օգտվել դայակի ծառայություններից, այն պարագայում, եթե պարզվի, որ մանկապարտեզն, ուր հաճախում է իր զավակը, թափուր տեղ չունի նրան վերցնելու համար, Արևիկը պատասխանում է՝ իհարկե ոչ։

Լրատվամիջոցը փորձեց պարզել նաև՝ արդյո՞ք օրենքը թույլ է տալիս, որպեսզի պետական կառույցի աշխատակիցն անընդմեջ արձակուրդ ձևակերպի, որովհետև, ըստ վերջինիս տրամադրած տեղեկության, ինքը նոր է վերադարձել օրենքով իրեն հասանելիք տարեկան արձակուրդից, վերջինս տարակուսում է՝ տեղյակ չէ՝ արդյո՞ք հնարավոր կլինի կրկին արձակուրդ ձևակերպել, բայց այլ ելք չի տեսնում՝ քանի դեռ երեխայի զբաղվածության հարցը լուծված չէ։

Ի դեպ, ծնողի տվյալներով, մանկապարտեզին սահմանափակումների վերաբերյալ հրահանգավորումը տվյալ պարագայում տրվել Աբովյանի քաղաքապետարանի կողմից։

Հիշեցնենք, որ նոր երեխաների ընդունելությունը դադարեցնելու մասին հայտարարությամբ էր հանդես եկել նաեւ Երեւանի քաղաքապետարանը եւ օրեր առաջ «Փաստինֆո» լրատվականը հարցում էր ուղարկել Երևանի քաղաքապետարան՝ պարզելու համար՝ ինչո՞վ է պայմանավորված կառույցի կողմից տարածված հայտարարությունը, եւ ինչ լուծում են առաջարկել աշխատող մայրերին։

Ի պատասխան մեր հարցմանը Երևանի քաղաքապետարանի տեղեկատվության և հասարակայնության հետ կապերի վարչությունից լրատվամիջոցին ուղարկել էր մի պատասխան, որում բարձրացված հարցերի առնչությամբ, ըստ էության, չկար ոչ մի սպառիչ պատասխան։ Ավելին՝ քաղաքապետարանը մեզ էր ուղարկել նախօրեին իրենց կողմից հրապարակած հայտարարության տեքստը՝ աննշան փոփոխություններով։ Ըստ մեզ ուղարկված պաշտոնական պատասխանի պարզվում է համաձայն ՀՀ պարետի 2020թ. մայիսի 24-ի հ.74 որոշման՝ առաջնահերթություն է տրվում խնամող չունեցող 2019-2020թթ. ուս տարում հաճախած երեխաներին, որոնց թիվը յուրաքանչյուր խմբում չպետք է գերազանցի 12-ը՝ սոցիալական հեռավորությունը պահպանելու նպատակով: Ընդ որում, վերոնշյալ որոշմամբ ժամանակավորապես արգելվում է լրացուցիչ ընդունելություն կազմակերպելը՝ պայմանավորված COVID-19-ով: Արդյունքում, խմբերում չեն ընդգրկվում ոչ միայն հերթագրված երեխաներ, այլ նաև՝ ընտանիքում խնամող ունեցող 2019-2020թթ. ուստարում հաճախած երեխաներ: Հետևաբար, ընդունելությունը ժամանակավորապես կասեցված է: Երեխաների լիարժեք ընդունելությունը, ըստ վերջիններիս կողմից տարածած տեղեկատվության, կիրականացվի մանկապարտեզների բնականոն գործունեությունը վերսկսելու պարագայում: Տարիքային խմբերը կձևավորվեն խմբերի խտության նորմատիվին համապատասխան:

Փաստացի ունենք իրավիճակ, երբ քաղաքացին ու նրա խնդիրները հետաքրքիր չէին իշխանություններին ու իրենց որոշումներում հաշվի չի առնվում նրանց օրինական իրավունքներն ու շահերը։

Աղբյուր` Փաստինֆո