Փաստ ինֆո

«Բոլորովին պատահական չէ, որ վարչապետ Փաշինյանի ենթակայությամբ գործող կրթության նախարարն օրեր առաջ հայտարարեց, թե իրենց նպատակն է մի այնպիսի սերունդ կրթել, որը բոլորովին նոր արժեհամակարգի կրող կլինի, որի վրա այլևս չեն կարողանա հենվեն հները։

Եկեք փորձենք վերլուծել՝ իսկ ի՞նչի վրա էին հենվում հները։ Հները հենվում էին հայրենիքի, ընտանիքի, բարոյականության, եկեղեցու, հավատի, դավանանքի, ազգային արժեքների, միացյալ հայության գաղափարի, Սփյուռքի, պահանջատիրության հարցերի վրա, որոնցից որևէ մեկն այսօրվա իշխանությունների համար կրթական համակարգում ոչ միայն առաջնային, այլև որևէ տեսակի կարևորության ենթակա կատեգորիա չէ»,- «Փաստինֆո»-ի հետ զրույցում ասում է Արևմտահայոց հարցերի ուսումնասիրության կենտրոնի տնօրեն, հայագետ Հայկազուն Ալվրցյանն, անդրադառնալով կրթական համակարգում տեղի ունեցող, այսպես ասած, բարեփոխումների թեմային, որի մասին վերջերս հրավիրած մամուլի ասուլիսի ընթացքում ընդարձակ տեսլականներ էր ներկայացրել ԿԳՄՍ նախարար Արայիկ Հարությունյանը։

Հայագետն ահազանգ է հնչեցնում՝ Հայաստանում մեկնարկել է անդեմ, անդիմագիծ մի դպրոց, որը դեռևս հայալեզու լինելով, որևէ ազգային հենք չունի, բացարձակապես զուրկ է ազգային բաղադրիչից, այլ կերպ ասած, սա մի համակարգ է, որը ապագա սերունդներին չի փոխանցի որևէ կայուն գաղափարաբանական արժեք, այլ կզբաղվի պարզապես անհայտ ծագման քաղաքացի արտադրելով.

«Հենց սա է պատճառը, որ Փաշինյանն իր հրապարակային ելույթներում, ինչպես եղավ նաև երեկ, գրեթե երբեք չի անդրադառնում ազգային արժեքի խնդրին և դրանց անհրաժեշտությանը։ Փաշինյանը շատ լավ գիտի, թե ինչ է անում, նա չի շեղվում իրեն դրսից թելադրված ծրագրից։ Երբ նրա ենթակա՝ ԿԳՄՍ նախարարը հայտարարում է, թե այլևս նախկինի պես չի լինելու, սա նշանակում է, որ մեր դպրոցներից իսպառ կհանվեն ազգային արժեքների և գաղափարաբանության դասավանդման և դաստիարակության հարցերը, ինչի մեկնարկն արդեն իսկ տրվել է՝ դպրոցներից հանելով Եկեղեցու պատմություն, Ռազմագիտություն, վերախմբագրելով Հայոց պատմություն և Հայ գրականություն առարկաները։ Այլ կերպ ասած, Հայաստանում սկիզբ է դրվել ապազգային մեծ դպրոցի ստեղծման աշխատանքներին։ Ասեմ ավելին՝ ես շատ լուրջ կասկածներ և մտահոգություն ունեմ, որ մեր դպրոցներում սկսեն դասավանդել աղանդավոր, հակահայ ու ապազգային գաղափարախոսության կրող, ինչպես նաև սեռական փոքրամասնության համայնքը ներկայացնող ուսուցիչներ։ Հայաստանյան դպրոցներում այլևս բաբելոնյան խառնակության հիմքն է դրվում»,- ասում է հայագետ Հայկազուն Ալվրցյանը։

Անդրադառնալով ԿԳՄՍ նախարարի կողմից վերջին ասուլիսի ընթացքում հնչեցված վիճահարույց և անընդունելի ձևակերպումների թեմային, հայագետը նկատում է.«Եթե նկատել եք, այս իշխանություններն անընդհատ լափաման բառն են օգտագործում, ինչն արեց նաև նախարարը՝ ասուլիսի ընթացքում անընդունելի և առաջին հերթին հենց իրեն պատիվ չբերող որակումներ տալով ակադեմիական գիտնականների տարիների վաստակին։ Հավանաբար, իրենց օգտագործած միակ սպասքը, որով իրենք կերակուր են կերել, լափամանն է եղել, կերածն էլ՝ լափ, որ այդքան սիրում են օգտագործել այդ բառը։ Ահա առաջնորդվելով իրենց դավանած այս հարազատ արժեքներին, նրանք ցանկանում են լափամանի սպառողունակությամբ առաջնորդվող սերունդ դաստիարակել, որոնց անունը դրել են քաղաքացի, բոլորովին չնշելով, թե ինչպիսի քաղաքացու մասին է խոսքը։

Ակնհայտ է, որ այդ Արայիկ Հարությունյանն այսօր Նիկոլ Փաշինյանի կողմից մեկնարկած բաբելոնաշինության աշխատանքներում կատարողի, իրականացնողի դեր է ստանձնել, լինելով սակայն այս իշխանության և իշխանության առաջնորդ Նիկոլ Փաշինյանի դավանած արժեքների անմիջական կրողն ու գաղափարական համախոհը։ Նրանք ապազգային գաղափարների ավազանում մկրտված՝ անհայրենիք, անսրբություն մի զանգված են, որ դուրս գալով խառնարանից, մի նոր խառնարան են փորձում կառուցել՝ ներառելով ողջ կրթական համակարգը։ Բայց նրանց պետք է հիասթափեցնենք, ասելով, որ չեն հաջողելու։ Եթե նրանք այնքան խորն են թաղվել թմբիրի ու փառամոլության հորձանուտում, որ չեն տեսնում պարզ իրականությունը, այն է՝ արթնացած ժողովրդին, ապա այդ ժողովրդի ցասումն անակնկալ կմատուցի իրենց»։

Հեղինակ՝ Նվարդ Մանվելյան

Աղբյուր` Փաստինֆո