Փաստ ինֆո

Ալիևն իր հայտարարությամբ երկար դադարից հետո փորձեց պատասխանել Նիկոլ Փաշինյանի հայտնի 7 կետերին, սակայն նա արեց դիվանագիտական բառապաշարին ոչ հարիր արտահայտություններ։ «Փաստինֆո»-ի հետ զրույցում այս մասին ասաց ԱԺ «Իմ քայլը» խմբակցության պատգամավոր Տաթևիկ

Հայրապետյանը՝ անդրադառնալով Ադրբեջանի նախագահ Իլհամ Ալիևի հայտարարությանը։

Պատգամավորը կարծում է՝ Ալիևը քաջ գիտակցում է, որ բանակցային գործընթացի միակ խնդիրը և մեղավորը հենց ինքն է, որ աչքի է ընկնում իր ռազմատենչ հայտարարություններով, սադրիչ ելույթներով, հայատյաց քարոզչությամբ. «Դրանից հետո փորձել հայկական կողմին ինչ-որ բանում մեղադրել, կատարյալ անհեթեթություն է։ Ամիսներ առաջ նաև փորձում էր մեղավորներ գտնել ԵԱՀԿ Մինսկի խմբի համանախագահների մեջ, մինչդեռ միակ մեղավորն ինքն է և իր վարած քաղաքականությունը»,-ասաց Տաթևիկ Հայրապետյանը։

Ինչ վերաբերում է բանակցային գործընթացի փակուղային լինելուն, պատգամավորն ընդգծեց՝ չկա փակուղի ո՛չ գործընթացի, ո՛չ էլ ձևաչափի առումով։ ՏԱԹևԻԿ Հայրապետյանի խոսքով կա հստակ խնդիր, որ մթնոլորտը պետք է առողջացվի և հայկական կողմի օրակարգը վերջին երկու տարիներին հենց դրան է միտված եղել. «Որոշակի դրական դինամիկա ունեցել ենք, սակայն լավ հասկանալով դրա հետագա հետևանքները՝ Ալիևը փորձում է ամեն կերպ կանխել դա, նաև մոնիթորինգային մեխանիզմների հնարավոր ներդրումը, որը հստակ ցույց կտա՝ ով է սադրիչ կողմը»,-ասաց պատգամավորը՝ հավելելով, որ այս հայտարարությունը պետք է հաշվի առնեն և շարունակեն խաղաղ բանակցային գործընթացը։

Հարցին՝ հնարավո՞ր է մթնոլորտն առողջացնել՝ հաշվի առնելով Ալիևի ագրեսիվ հայտարարությունները, Տաթևիկ Հայրապետյանը նկատեց, որ բավականին բարդ է, սակայն այլընտրանք չունեն. «Միշտ եղել են նման ագրեսիվ հայտարարություններ, այդուհանդերձ պետք է շարունակենք գործընթացը, որովհետև խաղաղ բանակցային գործընթացին այլընտրանք չի կարող լինել»,-ասաց պատգամավորը։

Ինչ վերաբերում է Ալիևի հայտարարությանը հայկական կողմի պատասխանին, ապա պատգամավորը նշեց, որ պետք է հասկանալ՝ որքանով է նպատակահարմար արձագանքել կամ ինչ մակարդակով պետք է արձագանքել. «Խոսեց Պաշտպանության նախարարը ՝ նշելով, որ հանգիստ լինենք, այսինքն` ինչ վերաբերում է սահմանին և սահմանների անվտանգությանը, այդ առումով ավելի քան պատրաստված ենք»։

Պատգամավորն ընդգծեց՝ միջազգային հանրության առումով շատ անելիքներ կան, որպեսզի հստակ լինի, թե ինչպես է Ադրբեջանը պրովոկացնում իրավիճակը և հնչեն հասցեական հայտարարություններ ու կոչեր։ Տաթևիկ Հայրապետյանը նկատեց՝ վերջին շրջանում հատկապես ռուսական կողմը նման հայտարարություններ անում է։
Դիտարկմանը, որ, ըստ էության, երկու կողմերին է կոչ հնչում, մինչդեռ սադրող կողմն Ադրբեջանն է, պատգամավորն ասաց. «Հաշվի առնելով միջնորդական առաքելությունը բնականաբար ավելի ընդհանրական են կոչերը հնչում, բայց կարծում եմ բոլորս էլ քաջ գիտակցում ենք՝ ով է հասցեատերն այս իրավիճակում»,-նշեց Տաթևիկ Հայրապետյանը։

Աղբյուր` Փաստինֆո