Փաստ ինֆո

ՀՀ վարչապետ Նիկոլ Փաշինյանը նախօրեին ներկայացրեց մինչեւ 2050 թվականի Հայաստանի վերափոխման ռազմավարությունը՝ որպես 4 առանցքային արժեք նշելով հայոց պետականությունը, կրթությունը, անհատը, աշխատանքը։ Գործադիրի ղեկավարը խուսափել էր օգտագործել «ազգային» եզրույթը։ Թեմայի շուրջ «Փաստինֆո»-ն զրուցել է հոգեբան, «Ազգային արժեքների պահպանման» նախաձեռնության անդամ Կարինե Նալչաջյանի հետ:

- Տիկի՛ն Նալչաջյան,Նիկոլը Փաշինյանը Հայաստանի վերափոխման ռազմավարությունը ներկայացնելիս առանձնացրեց 4 արժեք՝ չմատնանշելով ազգային, դրանց պահպանման կարևորությունը: Ինչո՞վ է սա պայմանավորված, արդյոք մեր ազգային արժեքները լավը չեն, որ պետք է հրաժարվենք մեր ակունքներից։

-Դա բխում է իշխանության համոզմունքներից, իշխանության կրողների անձնային արժեքներից, որոնք ձևավորվել են ինչ-ինչ արժեքների ազդեցության տակ: Ազգային արժեքները հետամնաց համարելը, մեղմ ասած, պարզունակություն է: Մեզ պես հարուստ պատմություն ունեցող ազգի արժեքները ուզում են ջնջել ու նորը ստեղծել, այն դեպքում , երբ իրենք էլ որևէ արժեքի կրող չեն, միայն փողոց են փակել ու արդյունքում եկել իշխանության, դա է իրենց միակ արժեքը: Սա ինքնասիրահարվածության արդյունք է, Նարեկացին մի խոսք ուներ «հավամիտ գոռոզներ»՝ նրանց մասին է: Ազգային արժեքներ պահպանել, նշանակում է ապրել, իսկ մեր ազգային արժեքներն այսօր վտանգված են, և դա արվում է հետևողականորեն և մտածված:

- Այսինքն` որևէ ուղղորդում գործող իշխանության վարած քաղաքականության մեջ տեսնու՞մ եք.

-Իհարկե, կա միտում:Գիտեք, աշխարհաքաղաքականությունն այսօր ամենուր է, նույնիսկ մտել է մեր առօրյա, մեր երեխաներին սեռականության վերաբերյալ դասեր են տալիս, դա նշանակում է, որ այո՝ որոշակի միտում կա: Մեր պետությունը, կրթությունը, արժեքները և մնացած ամեն ինչ այսօր վտանգված է, պետք է միավորել ուժերը և փրկել դրանք:

- Մեր՝ հայերիս համար առանցքային տեղ ունի ընտանիքը, որը տեղ չէր գտել Փաշինյանի առանձնացրած 4 արժեքների մեջ։ Նա սեպտեմբերի 21-ին կրկին նշեց, որ հեղափոխական Հայաստանում բարձրագույն արժեք է լինելու անհատը: Սա ի՞նչ հետևանքներ կունենա:

-Ընտանիք-անհատ տարանջատումը գալիս է հենց գլոբալիստական ուժերի գաղափարախոսությունից: Կենտրոնում դնում են անհատին, բայց անհատը միայնակ չէ, այն տարբեր սոցիալ-հոգեբանական խմբերի անդամ է: Այդ խմբերից մեկն էլ ընտանիքն է, որից անհատին չի կարելի տարանջատել:Պատահական չէ, որ այսօր սեռականության շեշտադրումները շատ են, կարծես անհատի համար գոտկատեղից վերև ոչինչ չկա: Անհատին պոկել սոցիալ-հոգեբանական խմբերից նշանակում է քանդել հասարակությունը:

-Հեղափոխական նոր «արժեքների» սերմանումը սկսում են դեռևս դպրոցականներից՝ կարծես ընտրելով նրանց որպես թույլ օղակ, Արայիկ Հարություննյանն էլ արդեն տևական ժամանակ է իբրև կրթական «բարեփոխումներ է» իրականացնում, որոնք դեմ են մեր ազգային արժեքներին։ Այս ամենը փոխկապակցվա՞ծ է

-Նախ նշեմ, որ հեղափոխության միակ արժեքը տրանսգենդերներին հատուկ փայփայանքով վերաբերվելն է, շատ կուզեի, որ նոր արժեքներ, բարեփոխումներ լինեին, բայց՝ ոչ: Նրանց արած բարեփեխումները երեխայի կյանք մտնելն է և տարիքին ոչ համապատասխան սեռական զգացողություն արթնացնելը, ինչն էլ խեղաթյուրում է երեխանեի էությունը: Արժեք անվան տակ՝ ինչքան աղբ կա բերում են մեր երկիր:

-Տիկի՛ն Նալչաջյան, այնումենայնիվ , իշխանություններին կհաջողվի՞ իրենց ծրագրերն իրագործել, թե՞ արդյունքում իրենք էլ կհեռանան:

- Պետք չէ թերագնահատել, եթե արժանի դիմադրության չհանդիպեն , եթե մենք ինքներս չպաշտպանենք մեր ազգային արժեքները, մեր հոգեկերտվածքը, նրանք ամեն ինչ էլ կարող են:Պատահական չէ, որ այսօր երեխաներին խեղաթյուրում են, մի քանի տարի հետո կունենանք խեղված սերունդ:

Աղբյուր` Փաստինֆո