Փաստ ինֆո

 «Բանակում ծառայությունից խուսափած անձինք միևնույն է չեն վերադառնալու Հայաստան՝ ծառայելու, ավելի լավ չէ այդ գումարը տալ բանակին օգնության համար»։

Այս մասին «Փաստինֆո»-ի հարցին ի պատասխան ասաց ԵԿՄ նախագահ, ԱԺ «Իմ քայլը» խմբակցության պատգամավոր Սասուն Միքայելյանը՝ անդրադառնալով շրջանառության մեջ դրվող նախագծին, համաձայն որի՝ 27 տարին լրացած և բանակում ծառայություն չանցած ՀՀ քաղաքացիները, որոնք գտնվում են հետախուզման մեջ, կարող են որոշակի վճարի դիմաց ազատվել քրեական պատասխանատվությունից։

Միքայելյանի կարծում է, որ նման մոտեցումը ճիշտ է և դասալքություն համարվել չի կարող։

«Դա դասալքություն չի կարող լինել։ Պետություններ կան, որ մարդիկ գումար են վճարում և չեն ծառայում։ Դա դասալքություն չէ, դա դասալիքներին հասկացնել է, որ սա քո երկիրն է»,- ասաց Միքայելյանը՝ հիշեցնելով, որ Արցախյան ազատամարտի դեպքում էլ տարբեր երկրներից տարբեր տարիքի մարդիկ են եկել՝ պատերազմին մասնակցելու և, եթե պատերազմ սկսվի, նույնն է լինելու։

Միքայելյանը գտնում է, որ անհրաժեշտ է ժամկետներ սահմանել, մասնավորապես, օրենքը կիրառվի այն քաղաքացների դեպքում, որոնք կոնկրետ ժամակահատվածում եղել են ՀՀ-ից դուրս, իսկ մյուսների վրա դա չպետք է տարածվի։ Միքայելյանը նաև դրական միտում նկատեց առ այն, որ շատերը ցանկանում են ծառայել բանակում և, համեմատելով նշեց, որ, եթե նախկինում՝ 10 տարի առաջ շատերը վախենում էին ծառայությունից, ապա այժմ շատերը ձգտում են ծառայել։

«Գրեթե 70 տոկոսն ուզում են ծառայել՝ ավելորդ քաշքշուքներից խուսափելու համար»,- ասաց Միքայելյանը։

Ավելի վաղ «Փաստինֆո»-ն հայտնել է, որ ԱԺ պատգամավոր Արման Բաբաջանյանը եւ «Իմ քայլը» խմբակցության պատգամավորներ Մխիթար Հայրապետյանը եւ Անդրանիկ Քոչարյանը մի օրինագիծ են շրջանառության մեջ դրել, ըստ որի՝ 27 տարին լրացած այն ՀՀ քաղաքացիները, որոնք չեն անցել պարտադիր զինվորական ծառայություն և գտնվում են քրեական հետախուզման մեջ, պայմանագրային զինվորական ծառայողի երկու տարվա աշխատավարձը վճարելու դեպքում կազատվեն քրեական հետապնդումից։

Աղբյուր` Փաստինֆո