Փաստ ինֆո

Հայաստանի Հանրապտության անկախության օրն այսօր նշանավորվեց ևս մեկ կարևոր իրադարձությամբ։ Գինեսի ռեկորդակիրներ Սաքունց եղբայրները սահմանեցին համաշխարհային նոր ռեկորդ։ Շահումյանի անվան հրապարակում Յուրի Սաքունցը 4.5 տոննա քաշ ունեցող մեքենան ատամներով բռնած ճոպանը քաշեց մինչև 3 մետր, իսկ եղբայրը՝ Արթուր Սաքունցը ատամներով ճոպանը բռնած քաշեց 14 տոննա քաշ ունեցող մեքենա։

«Շրջանցեցի ադրբեջանցի մարզիկին, որը նույն ռեկորդը կատարել է յոթ տարի առաջ 1.5-2 տոննա քաշ ունեցող մեքենա էր տեղաշարժել։ Կփորձեմ ավելի բարելավել ռեկորդները»,-«Փաստինֆո»-ի հետ զրույցում ասաց Յուրի Սաքունցը։

Աշխարհի կրկնակի չեմպիոն Յուրի Սաքունցը 6 տարեկանից մարզվում է։ Սպորտի ոլորտում առաջին քայլերը կատարել է իր հայրիկի մոտ, ով ըմբշամարտի աշխարհի չեմպիոն է։ Զբաղվել է ազատ ըմբշամարտով, բայց վնասվածք ստանալուց հետո սկսել է ռեկորդներ սահմանել։ 16 տարեկանում ճկույթով քաշել է 3 տոննա քաշ ունեցող մեքենա՝ սահմանելով իր առաջին ռեկորդը. «Մարզումներս արդյունավետ կազմակերպելու շնորհիվ ճկույթ մատով քաշել եմ 44 տոննա գնացք և այդ ռեկորդը գրանցվել է Գինեսի ռեկորդների գրքում»,-նշեց Յուրի Սաքունցը։

Տղաները նոր ռեկորդ սահմանելուց հետո պարգևատրվեցին Աղբյուր Սերոբի և Գևորգ Չավուշի մեդալներով։ Եղբայրները կշարունակեն մարզումները՝ փորձելով սահմանել նոր ռեկորդներ. «Էքստրեմալ ռեկորդների սիրահար եմ և տարբեր ձևի ռեկորդներ եմ սահմանում։ Եթե հաջողվի, կփորձեմ ճկույթով քաշել 70 տոննա քաշ ունեցող գնացք»,-հավելեց Յուրի Սաքունցը։

Աղբյուր` Փաստինֆո