Փաստ ինֆո

ԵՄ արտաքին քաղաքականության եւ անվտանգության քաղաքականության հարցերով գերագույն ներկայացուցիչ Ժոզեպ Բորելը կարծում է, որ Բելառուսի նախագահի պաշտոնից Ալեքսանդր Լուկաշենկոյի հեռանալուց հետո Հանրապետությանը տնտեսական օգնություն կպահանջվի: Նա այդ մասին հակիրճ խոսել է Եվրամիության երկրների ԱԳ նախարարների խորհրդի նիստից հետո, հաղորդում է ՌԻԱ Նովոստի-ն:

Բորելը պատասխանել է լրագրողի այն հարցին, թե արդյոք նախկին Խորհրդային հանրապետության համար աջակցության որևէ փաթեթ պլանավորվում է իշխանափոխությունից հետո։ Նրա խոսքով՝ գագաթաժողովում այդ հարցը չի քննարկվել։ «Բայց ոչ մի կասկած չկա, որ Բելառուսին անհրաժեշտ կլինի լուրջ տնտեսական աջակցություն՝ այդ ճգնաժամից դուրս գալու համար», - հավելել է նա:

Ավելի վաղ սեպտեմբերի 21-ին հաղորդվել էր, որ Եվրամիությունում չեն կարողացել միաձայն հավանություն տալ Բելառուսի ղեկավարության դեմ սահմանված պատժամիջոցներին: Բանակցությունները ձախողվել են Կիպրոսի իշխանությունների պատճառով. նրանք պնդում են, որ միաժամանակ սահմանափակումներ մտցվեն Թուրքիայի կառավարության դեմ։ Անկարան առճակատման մեջ է մտել իր մերձավոր եվրոպական երկրների հետ՝ Միջերկրական ծովի արեւելյան մասում բնական գազի արդյունահանման ծրագրերի պատճառով:

Սեպտեմբերի 17-ին Եվրախորհրդարանը հավանություն է տվել Լուկաշենկոյի եւ այլ անձանց դեմ պատժամիջոցների սահմանմանը, որոնք պատասխանատու են հանրապետության ղեկավարի ընտրությունների արդյունքների կեղծման եւ երկրում բռնաճնշումների համար: Բելառուսի ԱԳ նախարարը սպառնացել է պատասխան միջոցառումներով. դրանք կարող են անդրադառնալ հանրապետությունում արեւմտյան ԶԼՄ-ների աշխատանքի վրա:

Բելառուսում երկրորդ ամիսն է, ինչ շարունակվում են զանգվածային բողոքի ակցիաները օգոստոսի 9-ի նախագահական ընտրությունների պաշտոնական արդյունքների պատճառով, որոնց համաձայն Լուկաշենկոն հավաքել է ձայների 80 տոկոսը:

Աղբյուր` Փաստինֆո