Փաստ ինֆո

«Իր վերջին հայտարարությամբ Ադրբեջանն՝ ի դեմս այդ երկրի ղեկավարի, պատերազմի վերսկսման ուղղությամբ տեղեկատվական քարոզչական նախապատրաստում է իրականացնում»,- «Փաստինֆո»-ի հետ զրույցում ասաց քաղաքագետ Հրանտ Մելիք- Շահնազարյանը՝ անդրադառնալով Ադրբեջանի նախագահ Իլհամ Ալիևի՝ վերջին հայտարարություններին, որով Հայաստանին մեղադրում էր նոր պատերազմ հրահրելու մեջ։

Ըստ քաղաքագետի՝ Ալիևի հայտարարությունները գնահատականներ էին՝ ուղղված պատերազմի պատասխանատվությունը Հայաստանի վրա բարդելու համար։ Այլ կերպ ասած, հայտարարությունն ուղղված էր սա միջազգային հանրությանը՝ միջազգային լրատվամիջոցների միջոցով պատվիրված հոդվածներ տարածելու տարբերակով, անգամ ստի տարածմամբ, որը միանշանակ պետք է լիարժեք և համարժեք պատասխան ստանար Հայաստանի Հանրապետության կողմից։

Մինչդեռ՝ Ալիևի այդ ագրեսիվ հայտարարություններն ընդամենը խորը հիասթափություն են առաջացրել Հայաստանի Հանրապետության Արտաքին գործոց նախարարությունում։ «Կարելի է կարծել, որ մեր Արտաքին քաղաքական գերատեսչությունն այլ սպասելիքներ ուներ թշնամի երկրի ղեկավարից։ Արդեն այսօր ինքը՝ գերատեսչության ղեկավարը հայտարարում է, որ չի պատրաստվում որևէ կերպ մեկնաբանել էմոցիոնալ գնահատականներն ու մտքերը, այն պարագայում, երբ ակնհայտ է, որ այս պահին Հայաստանի և Արցախի դեմ տեղեկատվական քարոզչական ագրեսիա է իրականացվում։ Ստացվում է, որ փաստացի պաշտոնական Երևանը դրան որևէ կերպ չի ցանկանում արձագանքել, իր այդ կեցվածքով հնարավորություն տալով թշնամուն էլ ավելի մոտ կանգնել իրենց գաղափարների իրականացմանը, վերջին հաշվով, իսկապես սկսել լայնամասշտաբ պատերազմ, որի պատասխանատուն և մեղավորն, իսկապես Հայաստանը կհայտարարվի։ Բնական և օրինաչափ է, որ երբ չկա համարժեք հակազդեցություն, հակառակորդն էլ ավելի լկտի վարք է կիրառում, համապատասխանաբար, ավելի ագրեսիվ դարձնելով իր մոտեցումները»։

Հարցին՝ ինչի՞ պետք է պատրաստ լինի Հայաստանի Հանրապետությունն՝ Ալիևի վերջին սադրանքին ի պատասխան, քաղաքագետ Հրանտ Մելիք -Շահնազարյանն ասում է. . «Պատրաստվենք, որ մեզ պատերազմն է սպառնում, որը կարող է լինել շատ ավելի մեծամասշտաբ, քան մենք պատկերացնում ենք, չսահմանափակվելով միայն Արցախի հետ շփման գծում, այլ նաև՝ Հայաստանի Հանրապետության սահմանին։ Խոսք կարող է գնալ նաև թուրքական կողմի ներգրավվածության մասին, որովհետև ակնհայտ է, որ Թուրքիան իր իսկ պաշտպանության նախարարի բերանով, ինքն իրեն հայտարարել է որպես հակամարտության կողմ, որին ծառայում է նաև քուրդ զինյալների մասին ստահոդ տեղեկատվության շրջանառումը։ Սա հիմքեր է նախապատրաստում Թուրքիայի կողմից ՀՀ-ի նկատմամբ անմիջական գործողությունների ծավալման համար»։

Լրատվամիջոցի այն դիտարկմանը, որ ռազմական փորձագետ Տիգրան Աբրահամյանը որպես առաջնային քայլ կարեւորել է պահեստազորայինների կազմի հավաքների մասնակիցների թվի էականորեն մեծացումը, եւ որ աշխարհազորայինների մասին օրենքը հրատապ կարգով պետք է մտցնել Ազգային ժողով ու ընդունել, անցնելով կազմավորման աշխատանքներին՝ Հրանտ Մելիք-Շահնազարյանը արձագանքեց՝ ավելի քան համամիտ է Տիգրան Աբրահամյանի հետ.«Արագորեն պետք է համակարգել պահեստազորի ուժերը, իսկ աշխարհազորայինների հետ կապված օրենքը պետք է ժամ առաջ, նույնիսկ արտահերթ նիստով մտնի խորհրդարան և արագ հաստատվի, մարդկանց պետք է զինել, պատրաստել հնարավոր լայնածավալ պատերազմի»։

Հարցին՝ ի՞նչ է մեզ սպասվում լայնածավալ պատերազմի պարագայում, քաղաքագետը նկատում ՝այս առումով լավատես է, վստահ է, որ մեր զինված ուժերը կարող են լուծել իրենց առջև դրված ցանկացած մարտական խնդիր. «Անհանգստությանս պատճառն այն է, որ անվտանգությունը կարելի էր ապահովել դիվանագիտական խողովակներով, ինչը չի արվել, և, ցավոք սրտի, այն թանկ է արժենալու մեր ժողովրդի և պետության համար։ Այն խնդիրները, որ կարելի էր լուծել առանց մարդկային կորուստների, այնուամենայնիվ, ստիպված կլիենք լուծել մարդկային կորուստներով»,- ասում է Հրանտ Մելիք-Շահնազարյանը։

Հեղինակ՝ Նվարդ Մանվելյան

Աղբյուր` Փաստինֆո