Փաստ ինֆո

Երբ ՀՀ վարչապետի տիկին, «Ժպիտների քաղաք» կամ՝ «Սիթի օֆ Սմայլ» բարեգործական հիմնադրամի հոգաբարձուների խորհրդի նախագահ Աննա Հակոբյանը նախօրեին հայտնեց, որ դադարեցնում է հիմնադրամի հոգաբարձուների խորհրդի նախագահի իր լիազորությունները, շատերը զարմացան, թե ինչու՞ պիտի նա հրաժարվի իր իսկ ստեղծած հիմնադրամից:

Բնականաբար, մինչ օրս քչերը, թերևս, հատուկենտ մարդիկ են իմացել, որ այդ հիմնադրամի ստեղծումը բնավ էլ Աննա Հակոբյանի հետ չի կապված, որքան էլ, որ այն գործառույթների կրկնությամբ անսպասելիորեն հաջորդեց լեյկեմիայով հիվանդ երեխաների բուժմանն ուղղված «Նվիրիր կյանք» հիմնադրամին /հիմնադիր՝ Մարինա Ալես/, կամ գրավեց վերջինիս տեղը, որի հոգաբարձուների խորհրդի նախագահը ՀՀ 3-րդ նախագահի տիկին Ռիտա Սարգսյանն էր և որը բավական արդյունավետ գործում էր տարիներ շարունակ:

Այն ժամանակ շատերն էին զարմացել, թե, ասենք Աննա Հակոբյանը, որ երկու օր առաջ ասուլիսի ժամանակ խոստովանել էր, թե մանկական ուռուցքաբանության և արյան հիվանդությունների բնագավառն իր համար անհայտ ոլորտ է, հանկարծ մի քանի օրից հայտարարեց՝ «Ժպիտների քաղաք» կամ որ նույնն է «City of Smile» հիմնադրամի շրջանակում իր գործունեության մասին:
Ըստ ամենայնի, ԱՄՆ -ում գտնվող «City of Smile»-ի հիմնադիր, այժմ՝ Յոլյանի անվան արյունաբանական կենտրոնի տնօրեն Սամվել Դանիելյանը իշխանափոխությունից հետո Հայաստան գալով՝ առաջարկել էր Աննա Հակոբյանին հովանավորել իր հիմնադրամը՝ դառնալով հոգաբարձուների խորհրդի նախագահը: Առաջարկը ընդունվել էր՝ այսպիսով ինքնաբերաբար դառնալով «Նվիրիր կյանքի» գործունեության նվազման և դադարեցման կամ սառեցման պատճառը:

Գաղտնիք բացահայտած չենք լինի, եթե ասենք, որ այդօրինակ հիմնադրամների հիմնական նվիրատվություն անողները ոգեշնչվում են երկրի առաջին դեմքի հետ հեռակա և մոտ առնչություններից: 2018-ից հետո «Նվիրիր կյանքի» փոխարեն նրանք հովանավորում էին «Ժպիտների քաղաքին»:

Ո՛չ այդ շրջանում, ո՛չ էլ հետագայում երբևէ տեղեկատվություն չի տրվել հանրությանն այն մասին, որ «City of Smile» բարեգործական հիմնադրամի հիմնադիրը արյունաբանական կենտրոնի տնօրեն Սամվել Դանիելյանն է: Մշտապես շեշտվել է Աննա Հակոբյանի անունը և բոլոր հովանավորներն էլ այսպես ասած՝ Աննայի ֆոնդին են նվիրաբերել որոշակի գումարներ:

Միայն օրերս, Աննա Հակոբյանի՝ հիմնադրամի հոգաբարձուների խորհրդի նախագահի իր լիազորությունները դադարեցնելուց հետո էր, որ գաղտնազերծվեց այն փաստը, թե՝ «City of Smile» բարեգործական հիմնադրամն ստեղծվել է դեռևս 2014 թվականին ԱՄՆ-ում, որտեղ այդ շրջանում ապրում և գործունեություն էր ծավալում Ս. Դանիելյանը:

Թե ինչու էր նա գաղտնի պահել իր հիմնադրամը, միայն ենթադրել կարելի է:

Ընդհանրապես, նա երկար տարիներ հանդիսանում էր «Նվիրիր կյանք» հիմնադրամի հոգաբարձուների խորհրդի անդամ և նրա ղեկավարած՝ «Մուրացան» բուժմիավորման՝ մանկական ուռուցքաբանական բաժնում բուժում ստացող հիվանդ երեխաների բուժման ողջ ծախսերը հոգում էր «Նվիրիր կյանք» հիմնադրամն՝ իր նվիրատուների միջոցների հաշվին: Այս պարագայում, ո՞րն էր մեկ այլ հիմնադրամ ստեղծելու անհրաժեշտությունը: Ի վերջո, հետաքրքիր է՝2014-2018 թվականների ընթացքում արտերկրում գործող «City of Smile» բարեգործական հիմնադրամն ինչո՞վ էր զբաղվում:

Հիմնադրամի կայքը ծանուցում է, որ «Սիթի օֆ Սմայլ» կամ «Ժպիտների Քաղաք» բարեգործական հիմնադրամը ստեղծվել է քաղցկեղ եւ արյան հիվանդություններ ունեցող մարդկանց աջակցելու համար։ Մեր առաքելությունն է լինել նրանց և նրանց ընտանիքների կողքին և օգնել արժանապատվորեն անցնել քաղցկեղի հաղթահարման դժվարին ճանապարհը»,- գրված է այնտեղ ։
Սակայն կայքում 2014-2017 թվականների վերաբերյալ հաշվետվությունները պասիվ լինքեր են և միայն 2018-ից հետո է, որ դրանք նվիրատվությունների և ծախսերի մասին տեղեկատվություն են պարունակում:

Իսկ հիմնադրամի ամերիկյան գործունեությունն առայժմ անհայտ է և այդ բաժինն ընդամենը ծանուցում է՝ «Սիթի օֆ սմայլ»– ԱՄՆ՝ այս էջը շուտով կթարմացվի:

Հեղինակ՝ Ա. Աթանեսյան

Աղբյուր` Փաստինֆո