Փաստ ինֆո

2020թ.-ի առաջին կիսամյակի (հունվար-հունիս) տվյալներով ներքին զբոսաշրջային այցելությունների թիվը կազմել է նախորդ տարվա նույն ժամանակահատվածի 59.5 տոկոսը։ «Փաստինֆո»-ի հետ զրույցում այս մասին ասաց Տուրիզմի հայկական ֆեդերացիայի նախագահ Մեխակ Ապրեսյանը։

Մեխակ Ապրեսյանը նշեց, որ այս տարի ջանքեր էին գործադրվում, որ ստեղծված իրավիճակով պայմանավորված զբոսաշրջության վերականգնման գործընթացը սկսել ներքին զբոսաշրջությունից, ինչը տեղի ունեցավ. «Կանգնած իրավիճակից շարժ սկսվեց։ Ներքին զբոսաշրջությունը սկսեց աշխուժանալ։ Առաջին կիսամյակի տվյալներով, թեև, զրո վիճակից բավականին աճ եղավ, բավական աշխուժացավ, բայց եթե համեմատում ենք նախորդ տարվա նույն ժամանակահատվածի հետ, բնականաբար չենք հասել նախորդ տարվա ցուցանիշին։ Ներքին զբոսաշրջության ոլորտում շուրջ 40 տոկոսով անկում ունենք, բայց շատ լավ էր, որ գոնե այդքանին էլ հասանք»,-ասաց Մեխակ Ապրեսյանը։

Վերջինս կարծում է՝ երրորդ եռամսյակի տվյալներն ավելի լավը կլինեն, քան առաջին կիսամյակինը։ Մեխակ Ապրեսյանը չի բացառում, որ հնարավոր է նախորդ տարվա ցուցանիշին մոտենանք. «Իհարկե լավ կլինի, որ սխալված լինեմ և գերազանցած լինենք նախորդ տարվա ցուցանիշը, բայց դատելով իրավիճակից, դինամիկայից, որ բնակչության եկամուտները նվազել են, եղել է նաև չվարակվելու զգուշավորությունը, համենայն դեպս հուսանք, որ նախորդ տարվա ցուցանիշին հասած կլինենք։ Սխալված կլինենք, եթե ոլորտի վերականգնման առումով հույսներս դնենք ներքին զբոսաշրջության վրա։ Շատ կարևոր է, որ ժամանակին նաև սկսենք վերականգնել միջազգային զբոսաշրջությունը»,-ասաց Մեխակ Ապրեսյանը՝ հավելելով, որ դրսից գումարների ներհոսքը նույնպես խիստ անհրաժեշտ է, և ընդհանրապես միջազգային զբոսաշրջության վերականգնումն անհրաժեշտ է ոլորտն ամբողջությամբ վերականգնելու համար։

Հարցին՝ արդյոք աշնան ամիսներին ներքին զբոսաշրջությունը կանգ կառնի կրկին, Մեխակ Ապրեսյանը նշեց, որ այնպես չէ՝ ամբողջությամբ զրոյին կմոտենա, բայց ինչպես նախորդ տարիներին, այնպես էլ այս տարի ներքին զբոսաշրջության համար ամենաակտիվ շրջանը եղել է երրորդ եռամսյակը. «Բնականաբար այս պահից արդեն գնալով նվազելու է, բայց զրո չի լինելու։ Ներքին զբոսաշրջության որոշակի ցուցանիշներ ունենալու ենք։ Հնարավորություն ունենք էլ ավելի խթանելու և զարգացնելու, միայն թե ճիշտ քաղաքականություն պետք է վարենք։ Եվ իհարկե չպետք է դա անենք միջազգային զբոսաշրջությունը սահմանափակելու միջոցով»,-նշեց Մեխակ Ապրեսյանը։

Դիտարկմանը, որ որոշ ավիաընկերություններ վերսկսում են կանոնավոր չվերթներ և մենք էլ թույլատրում ենք այլ երկրի քաղաքացիների մուտքը Հայաստան, Մեխակ Ապրեսյանը նշեց՝ ողջունելի է, որ սկսում ենք թույլատրել և ջանքեր գործադրել կանոնավոր ավիափոխադրումների վերականգնման ուղղությամբ, բայց միայն դա հայտարարելը քիչ է. «Շատ արագ անհրաժեշտ է մշակել, հաստատել, հրապարակել, գովազդել աշխարհով մեկ այն կարգերը, կանոնակարգերը, թե ինչ պայմաններով ենք վերականգնում միջազգային զբոսաշրջությունը։ Ինչպիսին պետք է լինեն պայմանները միջազգային զբոսաշրջիկների խմբերով այցելությունների համար։ Ինչ պայմանով են գալու Հայաստան, թեստ հանձնած են գալու, ճանաչելու ենք նրանց թեստի արդյունքները, թե լրացուցիչ անվտանգային միջոցառումներ պետք է կիրառենք նաև այստեղ թեստ հանձնեն։ Կամ եթե դրական լինի թեստի արդյունքը, ինչ է հետևում դրան, ինչ պետք է անի անձը, որը բացասական թեստով եկել է, բայց այստեղ թեստ է հանձնել և պատասխանը դրական է եղել։ Պետք է այդ մանրամասներն օր առաջ ունենալ։

Դա շատ արագ պետք է ունենալ և դրանից է կախված ամբողջ այս վերականգնման գործընթացը»,-ասաց Մեխակ Ապրեսյանը՝ ընդգծելով, որ շատ կարևոր է՝ օր առաջ բոլոր իրավասու մարմինները համատեղ արագ և մասնավոր հատվածի ներգրավմամբ մշակեն այս ամբողջը, հաստատեն և հրապարակեն. «Դա շատ կարևոր է, այստեղ դեռևս, ցավոք, հապաղում ենք»,-եզրափակեց Մեխակ Ապրեսյանը։

Աղբյուր` Փաստինֆո