Փաստ ինֆո

Լոռու մարզի ընդհանուր իրավասության դատարանի դատավոր Սուսաննա Գզոգյանը հանցագործության մասին հաղորդում է ներկայացրել իրավապաշտպան Մարինա Պողոսյանի դեմ՝ դատավորին զրպարտելու համար։ ՀՀ գլխավոր դատախազության հանրային կապերի բաժնի պետ Արևիկ Խաչատրյանը «Փաստինֆո»-ի հարցին ի պատասխան հայտնեց, որ դատավորի հաղորդման հիման վրա Լոռու մարզային քննչական վարչության Սպիտակի քննչական բաժնում նախապատրաստված նյութերով հարուցվել է քրեական գործ՝ ՀՀ քրեական օրենսգրքի 344-րդ հոդվածի 3-րդ մասի հատկանիշներով, այն է՝ դատավորին զրպարտելը, որը զուգորդվել է անձին ծանր կամ առանձնապես ծանր հանցագործության մեջ մեղադրելով։

Հիշեցնենք, որ դատավոր Սուսաննա Գզոգյանը քրեական հեղինակություն համարվող Վահագն Աբգարյանի՝ «Ալավերդցի Վահագնի» գործը քննող դատավորն է, իսկ Պողոսյանը՝ ամբաստանյալի ներկայացուցիչը։ Վահագն Աբգարյանը մեղադրվում է ապօրինի կերպով ռազմամթերք հանդիսացող փամփուշտներ, ակոսափող հրազեն հանդիսացող 2 ատրճանակ ձեռք բերելու, Ալավերդի քաղաքի բնակիչ Կամո Փիրուզյանի սպանությունը կազմակերպելու, ՔԿ Լոռու մարզային վարչության պետին առանձնապես խոշոր, իսկ քննիչ Արտակ Հովհաննիսյանին՝ խոշոր չափերով կաշառք տալու մեջ։ Հատկանշական է, որ 2020թ ապրիլի 1-ին Լոռու մարզի ընդհանուր իրավասության դատարանը՝ հենց դատավոր Սուսաննա Գզոգյանի նախագահությամբ, բավարարել էր Աբգարյանին գրավի դիմաց ազատ արձակելու մասին պաշտպանական կողմի միջնորդությունը՝ գրավի չափ սահմանելով 15 մլն ՀՀ դրամը։ Ազատության մեջ 1.5 ամիս մնալուց հետո Աբգարյանը կրկին կալանավորվել է՝ Վերաքննիչ քրեական դատարանի որոշմամբ։ Թեև Աբգարյանին ազատ արձակելու մասին որոշումը կայացվել է հենց դատավոր Գզոգյանի կողմից, այդուհանդերձ, Աբգարյանի ներկայացուցիչը բազմիցս քննադատել և հրապարակավ հայտարարություններով է հանդես եկել, բացի դա, նաև դատավորին կարգապահական պատասխանատվության ենթարկելու հարցն է բարձրացրել՝ դիմում ներկայացնելով ՀՀ արդարադատության նախարարություն, ԲԴԽ և ՀՀ դատավորների ընդհանուր ժողովի էթիկայի և կարգապահական հարցերի հանձնաժողովին։

Վերջինս հայտարարել էր, որ դատավորն անտեսել է օրենքի պահանջը՝ անձի ազատությունից զրկումը ոչ իրավաչափ ճանաչելու բողոքը անհապաղ քննելու վերաբերյալ և դատական նիստի ընթացքում դատավորը հայտարարել էր, որ ստացվել է անձի ազատությունից զրկումը ոչ իրավաչափ ճանաչելու մասին միջնորդություն, ոչ թե՝ բողոք, մինչդեռ, պաշտպանը պնդում էր, որ ներկայացվել է բողոք։ Բացի դա՝ բողոքի մերժումը իրավապաշտպանի կարծիքով ապօրինի է և հակասում է միջազգային իրավունքի հանրաճանաչ նորմերի պահանջներին և կոպիտ կերպով ոտնահարում է Աբգարյանի անազատության և անձնական անձեռնմխելիության իրավունքը։ Ավելին՝ նա հայտարարել է, թե «Տիկին Գզոգյանն ինքը ցուցմունք կտա կոնկրետ դրդապատճառների, դրանց չափի, վալյուտաների, զանգերի մասին», «(իր վերցված) մնացած գումարներն ավելի մեծ են եղել, որ դիրքորոշում է փոխել», «դատավոր Գզոգյանը եղել է անձեռնահաս, գիտելիքներ չի ունեցել, հետո գիրք է կարդացել, մակարդակը բարձրացել է դարձել մի այլ կարգի ձեռնահաս կամ եղել են կոռուպցիոն ռիսկեր, միգուցե իրեն ինչ-որ մեկը փող է տվել, կամ նա եղել է ձեռնահաս դատավոր, որից հետո այս երեք ամիսների ընթացքում իրեն ճնշել են», «աղջիկ ջան, ինչու էս բերանտ ջուր առել ու նստել», «չվեթված ու վեթված դատավորներ, եթե ժամանակին վեթվեր, կպարզվեր, որ միգուցե անձեռնահաս է, միգուցե կոռումպացված է, կամ վախ ունի, որով իրեն կարողանում են ճնշել», «երկու տարվա մեջ ինչ է արել այս օրիորդը, բացարձակապես ոչինչ և չի հասկանում, թե ինչ պետք է անի», «դատավոր Սուսաննա Գզոգյանը ոչ թե մազերի հետ պետք է խաղա, այլ արդարադատություն իրականացնի», «շատ հաց ու պանիր պետք է ուտի, որ հասնի Արթուր Գրիգորյանին», «դատավոր Գզոգյանը կատարել է ամենամեծ հանցագործությունը», «կոծկում է բոլոր հանցագործությունները, որոնք կատարվել են Արթուր Դավթյանի և այլ անձանց կողմից», «գործում է հանցավոր համագործակցություն, մի հանցավոր խումբ, որի մեջ պակասում էր մի աղջիկ, այն էլ հայտնվեց Գզոգյանի տեսքով, որի կողմից բռնաբարվեց արդարադատությունը», «խոստացել են, որ Վահագն Աբգարյանին չազատելու դեպքում, արագ կերպով կտեղափոխվի Երևան, կարծում եմ, որ Երևան կարող է գալ, քանի որ «Վարդաշեն» քրեակատարողական հիմնարկը գտնվում է Երևանում», «վատ լուր ունեմ իր համար, որևէ կերպ Երևան քաղաք՝ բացի Վարդաշեն հիմնարկից, ոտք չի դնելու»:

Օգոստոսի 19-ին դատավոր Գզոգյանը սեփական նախաձեռնությամբ ինքնաբացարկ է հայտնել՝ նշելով, որ հանցագործության մասին հաղորդում է ներկայացրել եւ քրեական գործը մակագրվել էր դատավոր Սուրեն Բաղդասարյանին, ով սեպտեմբերի 2-ին կրկին սեփական նախաձեռնությամբ ինքնաբացարկ է հայտնել՝ նշելով, որ Աբգարյանի հետ կենցաղային պատճառներով ունեն վատ հարաբերություններ։ Գործը սեպտեմբերի 4-ին մակագրվել է դատավոր Անդրանիկ Սիմոնյանին, սակայն դեռևս չկա տեղեկություն՝ քրեական գործը վարույթ ընդունելու մասին։

Հեղինակ՝ Իզաբել Սահակյան

Աղբյուր` Փաստինֆո