Փաստ ինֆո

Հագուստ ներկրողները շատ դեպքերում չեն հասցնում կանոններն ուսումնասիրել։ Միկրոբիզնեսի ներկայացուցիչները հաճախ չեն կարդում, ուսումնասիրում և իրենց թվում է՝ այդ օրենքը նույնն է մնացել։ «Փաստինֆո»-ի հետ զրույցում այս մասին ասաց Հայաստանի գործատուների միության նախագահ Գագիկ Մակարյանը՝ անդրադառնալով հագուստի մաքսազերծման նոր կարգին։

Գագիկ Մակարյանը նկատեց՝ նման դեպքերում միկրոբիզնեսի ներկայացուցիչները պետք է ավելի շատ կարդան և ծանոթանան, իսկ մաքսային ծառայություններն էլ բավականին լավ պետք է իրազեկեն. «Կորոնավիրուսի պատճառով կան նաև դեպքեր, որ որոշ պետություններում են կանոնները փոխվում, ինչի մասին իսկապես քաղաքացին կարող է չիմանալ։ Այսինքն լավ կլինի՝ բազմակողմանի ինֆորմացիաներ լինեն, որովհետև մարդիկ այսքան ամիս տանն են նստել կորոնավիրուսի պատճառով, մեկուսացված են եղել և կտրվել են հիմնական ինֆորմացիայից»,-ասաց Գագիկ Մակարյանը։

Ինչ վերաբերում է ապրանքի գների թանկացմանը, ապա տնտեսագետը նշեց, որ այս հարցին մի քանի տեսանկյունից պետք է նայենք։ Գագիկ Մակարյանի խոսքով դոլարի կուրսի փոփոխություն չունենք, ինչը կարևոր է, քանի որ գնաճի չի հանգեցնի։ Բացի այդ ժողովրդի գնողունակությունն ընկել է և այդ դեպքում պահանջարկն արհեստականորեն կնվազի. «Մնում է նաև հասկանալ՝ դրսում գներն ինչպես են պահպանվել, թե չէ այս փոքր տուրքերի տարբերությունները մեծ չեն։ Դրանք գնաճ չեն կարող առաջացնել, ուղղակի նրանք անտեղյակ են կամ վրդովված։ Նրանց մարժան միշտ շատ փոքր է եղել, հիմա մտածում են՝ եթե մի քիչ էլ գները փոխվում են, նրանց ոչինչ չի մնում, դրա համար անհանգստացած են, բայց պետությունն այդտեղ կարող է իրենց չկարողանա օգտակար լինել, որովհետև պետությունն այստեղ խառը չի։ Այստեղ պետության մեղավորության խնդիրը չկա»,-նշեց Գագիկ Մակարյանը՝ հավելելով, որ պետության մեղավորությունը միայն պետք է վերագրել իրազեկման բավարար աշխատանքներ չկատարելու մեջ։

Դիտարկմանը, որ հագուստ ներկրող քաղաքացիները պնդում են՝ մաքսազերծման նոր կարգի դեպքում մի քանի անգամ թանկանալու է նաև հագուստը, Գագիկ Մակարյանը նկատեց՝ դա չափազանցություն է. «Նման բան չի կարող լինել։ Այդ թանկացումները վերաբերում են մաքսատուրքի չափին, ոչ թե ապրանքին։ Մաքսատուրքի մեջ մի քանի չնչին տոկոսները գին չեն ավելացնում։ Ասում եմ, որ իրենք էլ հանգիստ լինեն։ Կարևոր է, որ ներորդողների աջակցության կենտրոնը ոչ թե խնդիրը թողնի մաքսայինի վրա, այլ ինքը որպես ՓՄՁ-ների, միկրոբիզնեսին պաշտպանող կազմակերպություն հանդիպի նրանց հետ և իրազեկի այս ամենի մասին։ Այդ մարդիկ էլ ավելի հանգիստ կլինեն»,-ամփոփեց Գագիկ Մակարյանը։

Աղբյուր` Փաստինֆո