Փաստ ինֆո

2017թ Վանաձորում նախատեսվել էր, որ պետք է բացվի գազաբալոնների գործարան, հետո 2018թ հայտարարվեց, որ 30 մլն դոլարի ներդրում է լինելու։ Այս մասին լրագրողներում հետ ճեպազրույցում ասել է «Լուսավոր Հայաստան» խմբակցության ղեկավար Էդմոն Մարուքյանը։

Ըստ նրա՝ Վանաձորի համար դա կարող էր մոտավորապես «Քիմպրոմի» էֆեկտը տալ և բոլորն ուրախացել էին, սպասում էին այդ ներդրմանը։

«Վարչապետը գնացել է, մասնակցել բացմանը։ Մեր պատգամավորը հարց էր տալիս, թե բա ինչ եղավ, վարչապետն ասում է, որ չի հիշում։ Մենք հիշեցնում ենք, որ անգամ մեքենան եք փորձարկել։ Դրանից հետո վարչապետի ընտանիքին պատկանող լրատվամիջոցը գնացել է Վանաձոր, էդ մարդը, իբր, կազմակերպել է ասուլիս, որ ցույց տա ներդրումները և այդ ասուլիսի ընթացքում վիրավորական արտահայտություններ է հնչեցրել իմ ու մեր պատգամավորների հասցեին։ Այս մակարդակի պահվածքից արդեն հոգնել ենք, նյարդեր չի մնացել»,- ասաց Մարուքյանը՝ նշելով, որ սկզբում խոստացել էին 80 աշխատատեղ, հետո 300-400 աշխատատեղ, սակայն գործարանն առայսօր ունի 7 աշխատող, բայց տնօրենին, պահակին ու հաշվապահին հանելու դեպքում ստացվում է չորս մարդ՝ բալոն արտադրող։

«Հիմա, եթե հարց ենք տալիս ներդրման մասին, դա պրոբլե՞մ է, որ դրա դիմաց պատվիրում է հակաքարոզչություն»,- ասաց Մարուքյանը՝ նկատելով, որ նման հարձակման են ենթարկում, որ մարդկանց բերանները փակեն։

«Բերանները չեն փակվելու, հարցերը չեն ավարտվելու, անընդհատ տրվելու են»,- նշեց նա։
Ինչ վերաբերում է ԿԳՄՍ նախարար Արայիկ Հարությունյանի հրաժարականին, ապա Մարուքյանը նշեց, որ Հարությունյանի հրաժարականը նախաձեռնել են դեռևս հունիսին և հերքեց շրջանառվող լուրերը, թե դա արել է Նիկոլ Փաշինյանի հորդորով։

Անդրադառնալով նրան, որ ընդդիմության ներկայացուցիչների պնդումներից հետո իշխանությունը ողջ պետական ապարատը հանել է իրենց դեմ, իշխանության ներկայացուցիչն էլ պատասխանել է, որ, եթե նման բան լիներ, տվյալ կուսակցության կլոր կնիքն արդեն իրենց մոտ կլիներ, Մարուքյանը նշեց, որ դա դատապարտելի հայտարարություն է։

«Սա նշանակում է, որ իշխանությունն ասում է՝ մենք ունենք բռնատիրական ռեժիմով աշխատելու պոտենցիալը, բայց դա չենք անում ու ձեզ լավություն ենք անում: Կամ ասում են՝ խոսքի ազատությունը չենք սահմանափակելու, այսինքն կարանք սահմանափակենք, բայց ձեզ լավություն ենք անում: Փաստորեն մարդիկ գլուխ են գովում, որ կարող են ապօրինություն անել»,-նշեց պատգամավորը։

Աղբյուր` Փաստինֆո