Փաստ ինֆո

Նշենք, որ խոսքը գնում է ենթադրյալ խոշտանգման դեպքի մասին, մասնավորապես, ծանրամարտիկն օրերս հայտնել էր, որ սեպտեմբերի 6-ին գտնվել է Նոր Նորք վարչական շրջանի բակերից մեկում իր ծանոթի հետ, որտեղից առևանգվել է նույն շրջանի ոստիկանության ծառայողների կողմից՝ միայն այն բանի համար, որ ներկա է գտնվել և բացատրություն պահանջել այդ պահին մեկ այլ քաղաքացու առևանգման համար։

«Սրան էլ ջարդեք, ծալեք» հրահանգից հետո քաղաքացիական հագուստով ոստիկանները բռնի ուժով՝ ուղեկցված հայհոյախառն արտահայտություններով, առևանգել են նաև ինձ և իրենց անձնական օգտագործման ավտոմեքենայով տեղափոխել են Նոր Նորքի ոստիկանության բաժանմունք։ Հետագայում պարզ դարձավ, որ երկրորդ քաղաքացու առևանգումը տեղի էր ունենում ոստիկանության աշխատակիցներից մեկի անձնական շարժառիթներով»,- հայտնել էր ծանրամարտի միջազգային կարգի սպորտի վարպետը՝ նշելով, որ բաժանմունքի 3-րդ հարկում, կիսամութ ինչ-որ սենյակում տևական ժամանակ ենթարկվել եմ խմբակային ծեծի։ Նա ազատ է արձակվել մոտավորապես 3 ժամ անց՝ պայմանով, որ կստորագրի ինչ-որ փաստաթուղթ, որի բովանդակությանը ծանոթ չի։ Նա պատմել է նաև, որ հաջորդ օրը դիմել է «Էրեբունի» ԲԿ՝ հետազոտման, որտեղ ստացել է ախտորոշում՝ կրծքավանդակի փակ վնասվածք,թոքերի սալջարդ, կրծքավանդակի աջ կեսի փափուկ հյուսվածքների սալջարդ։

ՀՔԾ մամուլի քարտուղար Մարինա Օհանջանյանը «Փաստինֆո»-ի հարցին ի պատասխան հայտնեց, որ ՀՔԾ-ում ստացված հաղորդումների առթիվ նախապատրաստված նյութերի հիման վրա 2020 թվականի սեպտեմբերի 17-ին ՀՀ քրեական օրենսգրքի 309.1-րդ հոդվածի 2-րդ մասի 1-ին և 4-րդ կետերով հարուցվել է քրեական գործ` ոստիկանության մի խումբ պաշտոնատար անձանց կողմից ոստիկանության Նոր Նորքի բաժնում երկու անձանց խոշտանգելու առերևույթ հանցագործության դեպքի առթիվ:

Նրա փոխանցմամբ՝ հիշյալ անձինք քրեական գործով տուժող են ճանաչվել:

Աղբյուր` Փաստինֆո