Փաստ ինֆո

Անչափահաս աղջկա տեսողության սրության խնդիրը չունի որևէ պատճառահետևանքային կապ պատվաստման հետ: Այս մասին հայտնում է ՀՀ առողջապահության նախարարությունը` առանց որեւէ փորձաքննության:

Այսօր ավելի վաղ «Փաստինֆո»-ն հայտնել էր ստացած ահազանգի մասին, որ Երևանում սեպտեմբերի 14-ին գարդասիլի պատվաստումից հետո ամբողջական կուրացման ախտանիշով հիվանդանոց է տեղափոխվել Երևանի բնակչուհի՝ 2003 թվականին ծնված աղջիկը (անհատական տվյալները չենք հրապարակում՝ հաշվի առնելով նրա անչափահաս լինելը)։ Բժշկական կենտրոնից հաստատել էին, որ  կուրացման ախտանիշով 2003 թվականին ծնված աղջիկն իրենց մոտ է տեղափոխվել երկուշաբթի օրը, անցել է համապատասխան հետազոտություններ, երկու հետազոտություններ նա կանցնի վաղը, որից հետո կտեղափոխվի այլ հիվանդանոց՝ հետազոտությունների և բուժման կուրսը շարունակելու համար։

Առողջապահության նախարարությունը, արձագանքելով հրապարակմանը, հայտարարում է, թե այն  ապատեղեկատվություն է, չունի որևէ բժշկական հիմնավորում և դեռահասի մոտ չկա կուրություն: Մինչդեռ, ինչպես նշեցինք, բժշկական կենտրոնից հաստատել էին, որ կուրացման ախտանիշով դեռահասն իրենց մոտ է տեղափոխվել:

Ավելին` նույն նախարարությունը նշում է, որ  սեպտեմբերի 14-ին «Սուրբ Աստվածամայր» բժշկական կենտրոնում հոսպիտալացվել է «տեսողական նյարդի նևրիտ» նախնական ախտորոշմամբ 2003 թվականին ծնված աղջիկ: «Սուրբ Աստվածամայր» բժշկական կենտրոնում ախտորոշման հստակեցման նպատակով իրականացվել են մի շարք լաբորատոր-գործիքային հետազոտություններ, այդ թվում MRT 3T հետազոտություն, ինչպես նաև նեղ մասնագետների խորհրդատվություններ, որոնց արդյունքում երեխայի մոտ հերքվել է «տեսողական նյարդի նևրիտը»:

Նույնը գրել էր նաեւ «Փաստինֆո»-ն:

Առողջապահության նախարարությունը պնդում է, որ ակնաբույժի կողմից հայտնաբերվել է տեսողության սրության խնդիր, որը նյարդաբանական ծագում չունի և չունի որևէ պատճառահետևանքային կապ պատվաստման հետ՝ ախտորոշման հստակեցման նպատակով հետազոտությունները շարունակվում են: Ներկայում երեխայի վիճակը գնահատվում է բավարար և պատրաստվում է դուրսգրման»:

Այսինքն`ԱՆ-ն հաստատում է, որ աղջիկը պատվաստվել է, հաստատում է, որ ունի տեսողության խնդիրներ, իսկ թե այս դեպքում ինչու է ապատեղեկատվություն որակում տարածված «Փաստինֆո»-ի տեղեկությունը` անհասկանալի է: Ընդ որում`  առաջարկում ենք նախարարությանը ուշադիր կարդալ լուրը, քանի որ մեր հրապարակման մեջ նշված էր, որ կուրությունն առաջացել է պատվաստումից հետո, իսկ թե որքանով է այն պատճառահետեւանքային կապի մեջ մտնում` կարող է հաստատվել կամ հերքվել միայն փորձաքննությունից հետո: Առանց նման վերջնական եզրակացության`  ԱՆ-ի նման շտապողականության ցուցաբերումը մտահոգության տեղիք է տալիս ու հիմք հաստատելու մեր կասկածները, որ փորձում են ազդել հետագա հնարավոր քննության արդյունքների վրա:

Աղբյուր` Փաստինֆո