Փաստ ինֆո

Վերջին երկու օրերին կորոնավիրուսով վարակակիրների թիվն էականորեն ավելացել է։ Այս մասին կառավարության նիստի մեկնարկին ասաց ՀՀ վարչապետ Նիկոլ Փաշինյանը։

Վարչապետը նշեց, որ հայտնաբերման տոկոսը մեզ մոտ բավականին բարձր է։ Թեստերի թիվը մեծ է. «Երեկ ունեցել ենք 4319 թեստ, նախորդ օրը 4135 թեստ։ Ամենաբարդ շրջանում մեր օրական թեստերի մաքսիմալ ծավալը 3000 չի հասել, բայց այնուամենայնիվ միտումն անհանգստացնող է և կարծում եմ, որ մենք բոլորի և հանրության ուշադրությունը պետք է հրավիրենք այս խնդրի վրա»,-ասաց վարչապետը, այնուհետև դիմեց ՀՀ առողջապահության փոխնախարար Անահիտ Ավենսյանին՝ հետաքրքրվելով վերջինս ունի՞ որևէ վերլուծություն՝ ինչու են մեր թվերն աճում. «Երեկ մարտից հետո առաջին անգամ Երևանում խցանում նկատեցի։ Դա թերևս կապված է դպրոցների բացման հետ, որովհետև աշակերտների շարժն ամենամեծ շարժերից մեկն է»,-նշեց վարչապետը։

Անահիտ Ավանեսյանը նշեց, որ հետազոտությունների թիվը մեծ է և դրա համար էլ վարակման դեպքերի թիվն էլ է մեծ, բայց նաև թեստավորման մեջ նկատում են տոկոսային աճ. «Այսօր մոտ 7 տոկոս է կազմում, ինչը մեզ համար մտահոգիչ է։ Վերլուծությունների արդյունքում կարծում ենք՝ այս աճը կապված է մինչդպրոցական շրջանի ակտիվացման և տեղաշարժի ավելի ակտիվացման, մինչդպրոցական առևտուր անելու, հանգստյան տներից վերադառնալու հետ»,-ասաց փոխնախարարը։

Վերջինս նշեց, որ առաջիկա երկու շաբաթների ընթացքում նոր կտեսնեն դպրոցների բացման արդյունքները, ինչպես է ընթանում կորը։

Աղբյուր` Փաստինֆո