Փաստ ինֆո

Կհամակարգվի եւ կընդլայնվի ԵԱՏՄ անդամ պետությունների ֆինանսական շուկան վերահսկող մարմինների միջեւ տեղեկատվության փոխանակման գործընթացը։ ԱԺ-ում քննարկվեց ԵԱՏՄ երկրների ֆինանսական ոլորտում տեղեկությունների փոխանակմանն առնչվող համաձայնագրին միանալու արձանագրությունը: 

«Համաձայնագիրը ստորագրվել է 2014 թվականի դեկտեմբերի 23-ին Բելառուսի Հանրապետության, Ղազախստանի Հանրապետության եւ Ռուսաստանի Դաշնության կառավարությունների եւ կենտրոնական (ազգային) բանկերի միջև: Հայաստանը անդամակցում է այդ համաձայնագրին: Համաձայնագրի նպատակն է` համակարգել եւ ընդլայնել ԵԱՏՄ անդամ պետությունների ֆինանսական շուկան վերահսկող մարմինների միջեւ տեղեկատվության փոխանակման գործընթացը, այդ թվում՝ կոնֆիդենցիալ տեղեկատվության փոխանակման»,-ասաց ԿԲ նախագահի տեղակալ Վախթանգ Աբրահամյանը:

Համաձայնագիրը սահմանում է այն տեղեկատվության շրջանակը, որը պետք է հրապարակվի վերահսկող մարմինների ինտերնետային կայքերում, ինչպես նաեւ այն տեղեկատվության շրջանակը, որը պետք է տրամադրվի հարցում կատարող անդամ պետության վերահսկող մարմնին` որոշակի պայմանների բավարարման դեպքում:
«Մասնավորապես խոսքը գնում է լիցենզավորված սուբյեկտների մասով հարցումների իրականացմանը՝ կարգավորող մարմինների կողմից: Օրինակ մեր կողմից լիցենզավորված սուբյեկտի վերաբերյալ անդամի երկրի պատկան մարմինը կարող է հարցում իրականցնել բաժնետերերի կառուցվածքի վերաբերյալ, թույլտվություն ստացած բաժնետերերի մասին և այլն»,-ասաց ԿԲ նախագահի տեղակալը:

Նախագիծը քննարկվում էր «Հայաստանի Հանրապետության` «Կապիտալի ազատ տեղաշարժի ապահովման համար ֆինանսական շուկաներում պայմանների ստեղծման նպատակով ֆինանսական ոլորտում տեղեկությունների, այդ թվում` կոնֆիդենցիալ, փոխանակման մասին» 2014 թվականի դեկտեմբերի 23-ի համաձայնագրին միանալու մասին» արձանագրությունը վավերացնելու մասին օրենքի նախագծի շրջանակում։

Աղբյուր` Փաստինֆո