Փաստ ինֆո

Որոշների մոտ ստացվում է քաղաքական բանավեճն իջեցնել այդ մակարդակին: Այս մասին ՔՊ նիստից հետո լրագրողների հետ զրույցում ասաց ԱԺ փոխնախագահ Ալեն Սիմոնյանը՝ նշելով, որ, երբ իրենք ընդդիմություն են եղել, իրենց թույլ չեն տվել նման ձևով քաղաքական քննարկումներ անցկացնել: Իսկ թե ում էր ուղղված վարչապետի այդ գրառումը, Սիմոնյանը չմանրամասնեց և նշեց, որ կարծում է՝ բոլորն էլ հասկանում են, թե ում է ուղղված:

Անդրադառնալով հարցին, թե ինչու է իշխող ուժը հիշում, անդրադառնում անցյալում կատարած իրադարձություններին, եթե նույնիսկ արդարացման դատական ակտ է եղել, Սիմոնյանը նշեց, որ, երբ խոսվում է պարկեշտության, եկեղեցու, բարոյականության և այլասերության մասին, դա իր հետեւից բերում է հակադարձում և այդ պատճառով են նման խոսակցություններ տեղի ունենում: Ինչ վերաբերում է ԲՀԿ-ի հետ ստորագրված հուշագրին, Սիմոնյանը պարզաբանեց, թե իրենք հուշագիր են ստորագրել նոր ընտրություններ անցկացնելու անհրաժեշտության հետ կապված: Ըստ նրա՝ իրենք հուշագիր ունեն և ունենալու են միայն ՀՀ քաղաքացիների հետ ու ասել, թե իրենք ԲՀԿ-ի հետ հուշագիր են ունեցել, առնվազն քաղաքական սխալ է:

Նշենք, որ, թեև Սիմոնյանը պնդում է, որ հուշագիր ստորագրելու մասին պնդումները քաղաքական սխալ են, այդուհանդերձ, ԲՀԿ ղեկավար Գագիկ Ծառուկյանը և վարչապետ Նիկոլ Փաշինյանը 2018թ հոկտեմբերի 8-ին հուշագիր են ստորագրել՝ 2018թ դեկտեմբերին կայանալիք խորհրդարանական ընտրությունների վերաբերյալ: Ընդ որում՝ հուշագիր եզրույթը վերցված է բացառապես պաշտոնական աղբյուրներից:

Ավելի վաղ հայտնել ենք, որ որ այսօր իշխանական խմբակցության և ԲՀԿ-ի միջև մթնոլորտը սովորականից լարված էր: Նախ՝ Փաշինյանն էր գրառում կատարել՝ նշելով, որ դժվար է չհամաձայնել ԿԳՄՍ նախարարի հետ և հիշեցրել Գագիկ Ծառուկյանի անունը շոշափող տարիներ առաջ տեղի ունեցած բռնաբարության դեպքը: Նրան էլ իր հերթին հակադարձել է Գագիկ Ծառուկյանը՝ նշելով, որ ժամանակն է Սահմանադրությամբ հստակ ամրագրել, որ հոգեկան լուրջ խնդիրներ ունեցող անձինք իրավունք չունենան զբաղեցնել քաղաքական բարձրագույն պաշտոններ:

Աղբյուր` Փաստինֆո